Genesis 39:1-23
39 No maipapan ken Jose, naisalog idiay Egipto,+ ket ni Potifar,+ maysa nga opisial ti palasio ni Faraon, ti panguluen dagiti para-guardia, maysa nga Egipcio, ginatangna isuna iti ima dagiti Ismaelita+ a nangisalog kenkuana sadiay.
2 Ngem ni Jehova adda idi ken Jose, iti kasta isu nagbalin a naballigi a lalaki+ ken nagaywan iti balay ni apona, ti Egipcio.
3 Ket nakita ti apona a ni Jehova adda idi kenkuana ken isuamin nga ar-aramidenna pinagbalin ni Jehova a naballigi iti imana.
4 Ket ni Jose nagtultuloy a nakasarak iti pabor kadagiti matana ket nagpatpatuloy a nagserbi kenkuana, iti kasta dinutokanna nga agaywan iti balayna,+ ket isuamin a kukuana intedna iti imana.
5 Ket naaramid a manipud iti tiempo a panangdutokna kenkuana nga agaywan iti balayna ken mangaywan iti isuamin a kukuana binembendisionan ni Jehova ti balay ti Egipcio gapu ken Jose, ket ti pamendision ni Jehova naadda iti isuamin nga adda kenkuana iti balay ken iti tay-ak.+
6 Kamaudiananna inkumitna iti ima ni Jose ti isuamin a kukuana;+ ket saanna nga ammo a pulos no ania idi ti adda kenkuana malaksid ti tinapay a kankanenna. Mainayon pay, dimmakkel ni Jose a napintas ti pormana ken nalibnos ti langana.
7 Ita kalpasan dagitoy a banag naaramid a ti asawa ni apona intangwana dagiti matana+ ken Jose ket kinunana: “Kaiddaennak.”+
8 Ngem agkitakit+ ken kunaenna iti asawa ni apona: “Adtoy saan nga ammo ti apok no ania ti adda kaniak iti balay, ket isuamin nga adda kenkuana inyawatna iti imak.+
9 Awan ti asinoman a dakdakkel ngem siak iti daytoy a balay, ket saanna a pulos impaidam kaniak ti aniaman malaksid kenka, agsipud ta asawanaka.+ Gapuna kasano koma a maaramidko daytoy dakkel a kinadakes ket pudno nga agbasolak a maikaniwas iti Dios?”+
10 Gapuna nagbanag a bayat a nagsasao ken Jose iti inaldaw-aldaw isu saan a pulos immimdeng kenkuana nga agidda iti sibayna, nga agtalinaed a kaduana.+
11 Ngem napasamak nga itoy nga aldaw kas iti sabali pay nga al-aldaw isu simrek iti balay tapno aramidenna ti trabahona, ket ti asinoman kadagiti lallaki ti balay awan idi iti balay.+
12 Idin ginammatanna iti kawesna,+ a kunkunana: “Kaiddaennak!”+ Ngem nabatina ti kawesna iti imana ket nagtalaw ket napan iti ruar.+
13 Gapuna napasamak nga apaman a nakitana a nabatina ti kawesna iti imana tapno makapagtalaw a rummuar,
14 nangrugi nga agpukkaw kadagiti lallaki iti balayna ken agkuna kadakuada: “Kitaenyo! Inyegna kadatayo ti maysa a lalaki, maysa a Hebreo, tapno pagbalinennatayo a pagkakatawaan. Isu immay kaniak tapno kaiddaennak, ngem rinugiak ti agpukkaw iti kapigsaan ti timekko.+
15 Ket naaramid nga apaman a nangngegna nga impigsak ti timekko ken rinugiak ti nagpukkaw, idin imbatina ti kawesna iti sibayko ket nagtalaw ket napan iti ruar.”
16 Kalpasan dayta pinagtalinaedna a naikabil ti kawesna iti sibayna agingga a ni apona dimteng iti balayna.+
17 Kalpasanna nagsao kenkuana sigun kadagitoy a sasao, a kunkunana: “Ti Hebreo nga adipen nga inyegmo kadakami immay kaniak tapno pagbalinennak a pagkakatawaan.
18 Ngem naaramid nga apaman nga impigsak ti timekko ket rinugiak ti agpukkaw, idin imbatina ti kawesna iti sibayko ket napan nagkamang iti ruar.”+
19 Ti imbungana ket apaman a nangngeg ni apona ti sasao ti asawana a sinaona kenkuana, a kunkunana: “Kastoy ken kastoy ti inaramid kaniak ti adipenmo,” gimmil-ayab ti ungetna.+
20 Gapuna ni Jose innala ti apona ket inyawatna iti balay a pagbaludan, ti lugar a sadiay ti pakaipupokan idi dagiti balud ti ari, ket nagtultuloy sadiay balay a pagbaludan.+
21 Nupay kasta, ni Jehova nagtultuloy nga adda ken Jose ket nangipapaay kenkuana iti naayat a kinamanangngaasi ken nangipalpalubos kenkuana a makasarak iti pabor kadagiti mata ti panguluen nga opisial ti balay a pagbaludan.+
22 Gapuna ti panguluen nga opisial ti balay a pagbaludan inyawatna iti ima ni Jose dagiti amin a balud nga adda iti balay a pagbaludan; ket isuamin nga ar-aramidenda sadiay isu idi ti nangpaaramid.+
23 Ti panguluen nga opisial ti balay a pagbaludan awan a pulos idi ti asikasuenna nga adda iti imana, agsipud ta ni Jehova adda ken Jose ken no ania idi ti ar-aramidenna pinagbalin ni Jehova a naballigi.+
