Genesis 26:1-35
26 Ita adda timmaud a nakaro a bisin iti daga, malaksid ti immuna a nakaro a bisin a napasamak idi al-aldaw ni Abraham,+ iti kasta ni Isaac nagturong ken Abimelec, ari dagiti Filisteo, idiay Gerar.+
2 Kalpasanna nagparang kenkuana ni Jehova ket kinunana:+ “Dika sumalog idiay Egipto. Agtabernakuloka iti daga nga itudingko kenka.+
3 Agtaengka kas ganggannaet iti daytoy a daga,+ ket agtultuloy nga addaakto kenka ken bendisionanka, agsipud ta kenka ken iti bin-im itdekto amin dagitoy a daga,+ ket itungpalkonto ti sinapataan a sasao nga insapatak ken Abraham nga amam,+
4 ‘Ket paaduekto ti bin-im kas kadagiti bituen ti langlangit ket itdekto iti bin-im amin dagitoy a daga;+ ket babaen ti bin-im amin a nasnasion ti daga pudno unay a bendisionandanto ti bagbagida,’+
5 maigapu iti kinapudno a ni Abraham immimdeng iti timekko ken intultuloyna a salimetmetan dagiti pagrebbenganna kaniak, dagiti bilinko, dagiti paglintegak, ken dagiti lintegko.”+
6 Gapuna nagtultuloy a nagnaed ni Isaac idiay Gerar.+
7 Ala ket, dagiti lallaki ti disso nagim-imtuodda maipapan iti asawana, ket kunaenna: “Isu kabsatko.”+ Ta mabuteng a mangikuna “Asawak” ta amangan no, kas panangadaw kenkuana, “dagiti lallaki ti disso papatayendak gapu ken Rebecca,” agsipud ta makaatrakar ti langana.+
8 Gapuna naaramid a bayat a napaatiddog ti al-aldawna sadiay ni Abimelec, ari dagiti Filisteo, tumantannawag idi iti tawa ken kumitkita, ket adda idi ni Isaac a makipagragragsak ken Rebecca nga asawana.+
9 Madagdagus a ni Abimelec inayabanna ni Isaac ket kinunana: “Ay ket, isu awan sabali no di asawam! Gapuna kasano a nakunam, ‘Isu kabsatko’?” Gapu itoy kinuna kenkuana ni Isaac: “Kinunak dayta ta amangan no matayak maigapu kenkuana.”+
10 Ngem intuloy ni Abimelec: “Ania daytoy inaramidmo kadakami?+ Sangkabassit pay ket sigurado a maysa kadagiti umili nakikaidda koman iti asawam, ket inyegmo koma kadakami ti pannakabasol!”+
11 Idin binilin ni Abimelec dagiti amin nga umili, a kunkunana: “Asinoman a mangsagid itoy a lalaki ken ti asawana sigurado a mapapatayto!”
12 Kalpasanna nangrugi ni Isaac nga agimula iti bin-i iti dayta a daga,+ ket iti dayta a tawen isu makagunggun-od idi ti agingga iti sangagasut a rukod iti maysa,+ ta isu bembendisionan idi ni Jehova.+
13 Gapu itoy ti lalaki nagbalin a naindaklan ket nagtultuloy a rimmang-ay nga ad-adda pay ken dimmakkel agingga nga isu nagbalin a naindaklan unay.+
14 Ket naaddaan iti ar-arban dagiti karnero ken pangpangen dagiti baka ken maysa a dakkel a bagi dagiti adipen,+ iti kasta isu nangrugi nga apalan dagiti Filisteo.+
15 No maipapan kadagiti amin a bubon a kinali dagiti adipen ni amana idi al-aldaw ni Abraham nga amana,+ dagitoy pinullatan dagiti Filisteo ket gaburanda ida iti namaga a daga.+
16 Kamaudiananna ni Abimelec kinunana ken Isaac: “Pumanawka iti sangakaarrubaanmi, agsipud ta nagbalinka nga adayo a napigpigsa ngem dakami.”+
17 Gapuna pimmanaw sadiay ni Isaac ket nagpakarso idiay naapres a ginget ti Gerar+ ket nagnanaed sadiay.
18 Ket ni Isaac kinalina manen dagiti bubon ti danum a kinalida idi al-aldaw ni Abraham nga amana ngem pinullatan dagiti Filisteo kalpasan ti ipapatay ni Abraham;+ ket insublina a panaganan ida kadagiti nagan nga inyawag kadakuada ni amana.+
19 Ket dagiti adipen ni Isaac intultuloyda ti nagkali idiay naapres a ginget ket iti kasta nakasarakda sadiay iti maysa a bubon ti nadalus a danum.
20 Ket ti papastor ti Gerar nakiririda iti papastor ni Isaac,+ a kunkunada: “Kukuami ti danum!” Ngarud pinanagananna ti bubon iti Esek, agsipud ta nakisupiatda kenkuana.
21 Ket nagkalida ti sabali pay a bubon, ket nagriririanda met dayta. Ngarud pinanagananna iti Sitna.
22 Idi agangay isu pimmanaw sadiay ket nagkali ti sabali pay a bubon,+ ngem saanda a nagriririan dayta. Ngarud pinanagananna iti Rehobot ket kinunana: “Agsipud ta ita impaayannatayo ni Jehova iti naglawa a lugar+ ket pinagbalinnatayo a nabunga iti daga.”+
23 Kalpasanna simmang-at idiay Beer-seba manipud sadiay.+
24 Ket ni Jehova nagparang kenkuana bayat dayta a rabii ket kinunana: “Siak ti Dios ni Abraham nga amam.+ Dika agbuteng,+ agsipud ta addaak kenka, ket bendisionankanto ken paaduekto ti bin-im maigapu ken Abraham nga adipenko.”+
25 Iti kasta nangibangon iti altar sadiay ket immawag iti nagan ni Jehova+ ket impatakderna ti toldana sadiay,+ ket dagiti adipen ni Isaac nagkalida iti bubon sadiay.
26 Idi agangay immay kenkuana ni Abimelec manipud Gerar agraman ni Ahuzzat a piaren a gayyemna ken ni Ficol a panguluen ti buyotna.+
27 Gapu itoy kinuna kadakuada ni Isaac: “Apay nga immaykayo kaniak, idinto ta dakayo ginuradak ket iti kasta pinapanawdak iti sangakaarrubaanyo?”+
28 Iti daytoy kinunada: “Di agbiddut a nakitami a ni Jehova adda kenka.+ Ngarud kinunami, ‘Maaramid koma, pangngaasim, ti maysa a sapata ti pagrebbengan iti nagbaetantayo,+ dakami ken sika, ket mamatalgedkami koma iti tulag kenka,+
29 nga awanto ti aramidem a dakes kadakami a kas iti saanmi a panangsagid kenka ken kas iti panangaramidmi laeng iti naimbag kenka ta pinapanawdaka a sitatalna.+ Sika ita ti bendito ni Jehova.’”+
30 Kalpasanna nangaramid iti padaya maipaay kadakuada ket nangan ken imminumda.+
31 Iti sumaganad a bigat nasapada a bimmangon ket nangaramidda kadagiti sinapataan a sasao iti maysa ken maysa.+ Kalpasan dayta pinagawid ida ni Isaac ket pimmanawda a sitatalna kenkuana.+
32 Ita iti dayta nga aldaw napasamak a dagiti adipen ni Isaac dimtengda ket impadamagda kenkuana maipapan ti bubon a kinalida,+ ket kinunada kenkuana: “Nakasarakkami iti danum!”
33 Ngarud pinanagananna iti Siba. Dayta ti makagapu a ti nagan ti siudad ket Beer-seba,+ agingga itoy nga aldaw.
34 Ket ni Esau dimmakkel a nagtawen iti uppat a pulo. Kalpasanna innalana kas asawa ni Judit nga anak a babai ni Beeri a Heteo ken kasta met ni Basemat nga anak a babai ni Elon a Heteo.+
35 Ket gubuayan ida ti kinapait ti espiritu da Isaac ken Rebecca.+
