Genesis 16:1-16
16 Ita ni Sarai, asawa ni Abram, saan a nangipasngay kenkuana iti annak;+ ngem isu addaan iti Egipcio nga adipen a babai ket ti naganna Agar.+
2 Gapuna ni Sarai kinunana ken Abram: “Pangngaasim ita! Ni Jehova pinawilannak nga agipasngay iti annak.+ Pangngaasim, makidennaka iti adipenko a babai. Bareng makagun-odak kenkuana iti annak.”+ Iti kasta immimdeng ni Abram iti timek ni Sarai.+
3 Kalpasanna ni Sarai, asawa ni Abram, innalana ni Agar, ti Egipcio nga adipenna a babai, iti ngudo ti sangapulo a tawen a panagnaed ni Abram iti daga ti Canaan, ket intedna ken Abram nga asawana kas asawana a babai.+
4 Iti kasta nakidenna ken Agar, ket nagsikog. Idi naammuanna nga isu masikog, idin ti apona-a-babai nangrugi a maumsi kadagiti matana.+
5 Gapu itoy ni Sarai kinunana ken Abram: “Ti kinaranggas a naaramid kaniak dumteng koma kenka. Siak intedko iti barukongmo ti adipenko a babai, ket naammuanna nga isu masikog, ket nangrugi a maumsiak kadagiti matana. Ni Jehova mangukom koma iti nagbaetanta.”+
6 Gapuna ni Abram kinunana ken Sarai:+ “Adtoy! Ti adipenmo a babai adda iti panangikeddengmo. Aramidem kenkuana no ania ti naimbag kadagita matam.”+ Idin rinugian nga umsien ni Sarai iti kasta isu nagtalaw kenkuana.+
7 Idi agangay isu nasarakan ti anghel ni Jehova+ iti maysa nga ubbog ti dandanum idiay let-ang, iti ubbog idiay dalan nga agturong iti Sur.+
8 Ket rinugianna a kunaen: “Agar, adipen a babai ni Sarai, sadino aya ti naggapuam ken sadino ti papanam?” Iti daytoy kinunana: “Ay ket, agtaltalawak ken Sarai nga apok-a-babai.”
9 Ket kinuna kenkuana ti anghel ni Jehova: “Agsublika iti apom-a-babai ket ipakumbabam ti bagim iti sidong ti imana.”+
10 Kalpasanna kinuna kenkuana ti anghel ni Jehova: “Paaduekto unay ti bin-im,+ iti kasta saanto a mabilang gapu iti kinaaduna.”+
11 Kanayonanna ti anghel ni Jehova innayonna kenkuana: “Adtoy masikogka, ket mangipasngaykanto iti maysa nga anak a lalaki ket panaganamto iti Ismael;+ ta ni Jehova nangngegna ti rigatmo.+
12 No maipapan kenkuana, isu agbalinto a sebra ti maysa a tao. Ti imana maibusorto iti tunggal maysa, ket ti ima ti tunggal maysa maibusorto kenkuana;+ ket iti sanguanan ti amin a kakabsatna isu agtabernakulonto.”+
13 Idin rinugianna nga awagan ti nagan ni Jehova, nga agsasao idi kenkuana: “Maysaka a Dios ti panagkita,”+ ta kinunana: “Saan aya a ditoy pudpudno a kimmitaak iti daydiay makakitkita kaniak?”
14 Dayta ti makagapu a ti bubon naawagan iti Beer-lahai-roi.+ Adtoy adda iti nagbaetan ti Cades ken Bered.
15 Iti kalpasanna ni Agar impasngayna ken Abram ti maysa nga anak a lalaki ket pinanaganan ni Abram ti anakna nga impasngay ni Agar iti Ismael.+
16 Ket ni Abram walopulo ket innem ti tawenna idi a ni Agar impasngayna ken Abram ni Ismael.
