Genesis 43:1-34
43 Ket ti panagbisin nakaro idi iti daga.+
2 Ket naaramid nga apaman a naibusdan ti bukbukel nga inggapuda iti Egipto,+ kinuna kadakuada ni amada: “Agsublikayo, gumatangkayo iti bassit a taraon maipaay kadatayo.”+
3 Idin kinuna kenkuana ni Juda:+ “Awan duaduana a ti lalaki nangsaksi kadakami, a kunkunana, ‘Saanyo a makitan ti rupak malaksid no kaduayo ti kabsatyo.’+
4 No ibaonmo a kumuyog kadakami ti kabsatmi,+ situtulokkami a sumalog ket igatangandaka iti taraon.
5 Ngem no saanmo nga ibaon, saankamto a sumalog, agsipud ta kinuna kadakami ti lalaki: ‘Saanyo a makitan ti rupak malaksid no kaduayo ti kabsatyo.’”+
6 Ket inyebkas ni Israel:+ “Apay a kasapulan a dangrandak babaen ti panangibagayo iti lalaki nga adda pay sabali a kabsatyo?”
7 Gapu itoy kinunada: “Ti lalaki nagimtuod a mismo maipapan kadakami ken kadagiti kabagianmi, a kunkunana, ‘Sibibiag pay kadi ti amayo?+ Adda kadi sabali pay a kabsatyo?’ ket imbagami kenkuana maitunos kadagitoy a kinapudno.+ Kasano koma ti pannakaammomi a kunaenna, ‘Isalogyo ti kabsatyo’?”+
8 Kamaudiananna ni Juda kinunana ken Israel nga amana: “Ibaonmo ti ubing a kumuyog kaniak,+ tapno mabalinmi ti tumakder ken mapan ken tapno makapagtalinaedtayo a sibibiag ket saantayo a matay,+ agpadpada a dakami ken sika ken ti babassit nga annakmi.+
9 Siak ti pammasiguro maipaay kenkuana.+ Manipud iti imak mabalinmo a kalikaguman ti multa maipaay kenkuana.+ No mapaayak a mangisubli kenka ken mangidatag kenka, iti kasta nakabasolakto kenka iti isuaminen a tiempo.
10 Ngem no saankami a nagtaktak, nakapankami koma itan sadiay ken nakasublikamin kadagitoy namindua a daras.”+
11 Gapuna kinuna kadakuada ni Israel nga amada: “No, ngarud, kasta ti kasasaad,+ aramidenyo daytoy: Alaenyo dagiti kasayaatan a bunga ti daga kadagiti pagkargaanyo ket awitenyo nga isalog iti lalaki kas sagut:+ sangkabassit a balsamo,+ ken sangkabassit a diro,+ labdanum ken natutot nga ukis ti kayo,+ bungbunga ti pistasio ken dagiti almendro.+
12 Kasta met, paminduaenyo ti kuarta nga itugotyo ita imayo; ket ti kuarta a naisubli iti ngarab dagiti supotyo itugotyo manen ita imayo.+ Mabalin a biddut daydi.+
13 Ket alaenyo ti kabsatyo ket tumakderkayo, agsublikayo iti lalaki.
14 Ket ti Dios a Mannakabalin-amin ipaayannakayo koma iti kaasi iti sanguanan ti lalaki,+ tapno sigurado a luk-atanna koma kadakayo ti sabali pay a kabsatyo ken ni Benjamin. Ngem siak, no kas pagarigan masapul a maulilaak, pudno unay a maulilaakto!”+
15 Ngarud dagiti lallaki innalada daytoy a sagut, ket intugotda iti imada ti napamindua a kuarta agraman ni Benjamin. Kalpasanna timmakderda ket simmalogda idiay Egipto ket nagtakderda iti sanguanan ni Jose.+
16 Idi a ni Jose nakitana ni Benjamin a naikuyog kadakuada, madagdagus a kinunana iti lalaki nga agay-aywan iti balayna: “Ipanmo dagiti lallaki iti balay ket mangpartika kadagiti animal ket agisaganaka,+ agsipud ta dagiti lallaki makipanganda kaniak inton agmatuon.”
17 Dagus nga inaramid ti lalaki kas iti kinuna ni Jose.+ Gapuna ti lalaki impanna dagiti lallaki iti balay ni Jose.
18 Ngem nagbuteng dagiti lallaki agsipud ta naipanda iti balay ni Jose,+ ket rinugianda a kunaen: “Ti kuarta a nagsubli kadatayo iti supsupottayo idi damo isu ti gapu a maip-ipantayo ditoy tapno duklosendatayo ket darupendatayo ken alaendatayo nga agpaay nga ad-adipen ken kasta met dagiti asnotayo!”+
19 Ngarud immasidegda iti lalaki nga agay-aywan iti balay ni Jose ket nagsaoda kenkuana iti pagserkan ti balay,
20 ket kinunada: “Dispensarennakami, apok! Pudno a simmalogkami idi damo tapno gumatangkami iti taraon.+
21 Ngem ti napasamak ket idi dimtengkami iti disso a pagdagusan+ ken rinugianmi a luktan dagiti supotmi, ay ket, adtoy ti kuarta ti tunggal maysa iti ngarab ti supotna, ti kuartami iti naan-anay a dagsen. Gapuna kayatmi nga isubli dayta babaen ti mismo nga im-imami.+
22 Ket ad-adu pay a kuarta ti insalogmi nga adda iti im-imami tapno igatangmi iti taraon. Pudno unay a saanmi nga ammo no siasino ti nangikabil ti kuartami kadagiti supotmi.”+
23 Idin kinunana: “Naimbag ti kasasaadyo. Dikay agbuteng.+ Ti Diosyo ken ti Dios ni amayo inikkannakayo iti gameng kadagiti supotyo.+ Ti kuartayo dimteng nga immuna kaniak.” Kalpasan dayta inruarna kadakuada ni Simeon.+
24 Idin ti lalaki impanna dagiti lallaki iti balay ni Jose ket nangted iti danum tapno mabugguanda ti saksakada,+ ket nangted iti taraon maipaay kadagiti asnoda.+
25 Ket insaganada ti sagut+ maipaay iti iyaay ni Jose iti agmatuon, agsipud ta nangngegda a sadiay ti pangananda iti tinapay.+
26 Idi simrek ni Jose iti balay, ngarud ti sagut nga adda iti imada impanda kenkuana iti balay, ket inruknoyda ti bagbagida kenkuana agingga iti daga.+
27 Kalpasan daytoy inimtuodna no nasayaat ti kasasaadda ket kinunana:+ “Ni kadi amayo, ti lakay a nasaoyo, nasayaat ti kasasaadna? Isu sibibiag pay kadi?”+
28 Iti daytoy kinunada: “Ti adipenmo nga amami nasayaat ti kasasaadna. Isu sibibiag pay.” Kalpasanna nagrukobda ket inruknoyda ti bagbagida.+
29 Idi intangwana dagiti matana ket nakitana ni Benjamin a kabsatna, ti anak ni inana,+ kinunana: “Isu kadi daytoy ti kabsatyo, ti inaudian a nasaoyo kaniak?”+ Ket innayonna: “Ti Dios ipakitana koma kenka ti paraburna,+ anakko.”
30 Agdardaras itan ni Jose, agsipud ta ti makin-uneg a rikriknana naggagar iti kabsatna,+ gapuna nagsapul iti lugar a pagsangitanna ket simrek iti maysa a makin-uneg a siled ket nagarubos dagiti luana sadiay.+
31 Kalpasan dayta diniram-osanna ti rupana ket rimmuar ket intultuloyna a minedmedan ti bagina ket kinunana:+ “Idasaryo ti makan.”+
32 Ket indasarda dayta maipaay kenkuana nga is-isuna ken maipaay kadakuada nga is-isuda ken maipaay kadagiti Egipcio a makipangpangan idi kenkuana nga is-isuda; ta dagiti Egipcio saanda a mabalin ti makipangan kadagiti Hebreo, agsipud ta nakarimrimon a banag dayta kadagiti Egipcio.+
33 Ket nagtugawda iti sanguananna, ti inauna maitunos iti kalinteganna kas inauna+ ken ti inaudian maitunos iti kinaubingna; ket dagiti lallaki nagkikinnitada a sisisiddaaw.
34 Ket nagpapaipan kadagiti bingay kadakuada manipud iti sanguananna, ngem iyad-aduna ti bingay ni Benjamin iti maminlima iti rukod dagiti bingay ti amin a sabsabali.+ Gapuna intultuloyda ti nakidaya ken nakiinum kenkuana agingga a napnekda.+
