Yayandikwaga na Matayo 9:1-38
9 Yesu aja omu bwarho ayambuka oku lwindi lunda lw’enyanja aja omu vile y’emwabo.
2 Aho han’ahola bamulerhera omuntu ohunzize ey’alyamire oku chipoyi. Omu kubona obwemere bwabo, Yesu abwira oyola muntu walihunzize ntya: “Ochihe omurhima mwana wani! Ebyaha byawe byababalirwe.”
3 Bandisi baguma barhondera kubwirana: “Oyula muntu ali adukanga* Mungu.”
4 Bulala Yesu alimenyere amawazo mabo aderha: “Bulagurhe muherhe amawazo mabi omu mirhima yenyu?
5 Bichi biyorohere ey’okuderha: ‘Ebyaha byawe byababalirwe, changwa okuderha yumanga olambagire’?
6 Aliko yi mumenya oku Mwen’omuntu ahabirwe oburhwali b’okubabalira ebyaha oku gulu—” Yesu abwira oyola muntu walihunzize: “Yumanga orhole echipoyi chawe, ogaluke emwawe.”
7 Av’ayumanga agaluka emwage.
8 Abantu kamama baliri ahola babwene ntyo, bayubaha bwenene, bakuza Mungu wahaga abantu obuhashe buli nk’obola.
9 Naho Yesu abere arhenga ahola, agerere embere abona omulume mpu ye Matayo ayikere oku biro by’okulipisa ekoli amubwira: “Onkulikire obe mwanafunzi wani.” Aho han’ahola ayumanga amukulikira.
10 Buzinda Yesu abere y’alya omu mwa Matayo, bantu baguma banalipisa ekoli bayinja barhondera kusangira haguma na Yesu n’abanafunzi bage.
11 Abafarisayo babwene ntyo babwira abanafunzi ba Yesu ntya: “Nka gurhe mwalimu wenyu akasangira haguma n’abantu banalipisa ekoli n’abanyabyaha?”
12 Yesu abere abayunva aderha: “Abantu baherhe amagala menja barhakenere omunganga, s’abalwere babamukenere.
13 Lero mugendage muyige ebila binwa k’okuderha gurhe: ‘Indonzeze olukogo s’arhali enterekero.’ Bulala nayinjaga kuhamagala arhali abanyakunali s’abanyabyaha.”
14 Naho abanafunzi ba Yowane bamushimba n’okumubaza: “Bulagurhe rhwabo n’Abafarisayo rhunachishalisa* aliko abanafunzi bawe bowe nanga?”
15 Oku bilolere echola chibazo Yesu abashubiza: “Abera b’omuhya-mulume barhaherhe empanvu yoshi-yoshi y’okujira echiliyo banali haguma n’omuhya-mulume. Arhali ntyo? Aliko amango nji baba barhachili haguma n’omuhya-mulume nji bachishalisa.*
16 Nta muntu wakahangira echiraka chihyahya oku mwambaro gushajire, bulala echola chiraka chakafunyaza ogola mwambaro gwanaja gwabereka bwenene.
17 Changwa abantu barhabika edivayi y’omuhyo omu ndaha z’oluhu zishajire. Bulala nka bajirire ntyo endaha zabasha edivayi yanasheshekala banabula byoshi. Aliko abantu banabika edivayi y’omuhyo omu ndaha zihyahya z’oluhu, ahola ey’endaha ey’edivayi ntacho chaharabika.”
18 Okw’anali ababwira eyola myazi, murhegesi muguma amuyegera amuyunamira amubwira ntya: “Kugera kw’enosa mwali wani akwanene kuba y’afire, aliko oyinje omuhire kw’efune yawe na ntyo ashuba kulama.”
19 Yesu n’abanafunzi bage bava bayimanga bakulikira oyola mulume.
20 Mukazi muguma wali wamamala myaka 12 ey’alwere obulwala b’okuva eshagama arhengerera enyuma ahuma oku mukunjo g’omwambaro gwa Yesu gw’enyanya;
21 bulala aliri achibwira: “Inkafa chakuhuma oku mwambaro gwage gw’enyanya nafuma.”
22 Yesu ahindamuka amubona amubwira ntya: “Mwali wani, ochihe omurhima! Obwemere bwawe bwakufumize.” Aho han’ahola oyola mukazi afuma.
23 Yesu abere aja omu nju y’oyola murhegesi, abona abantu bali baziha emilizi n’abantu kamama bali bajira olwamo,
24 ababwira: “Muhuluke, bulala oyula mwana arhafire s’ajire ero.” Abola bantu bayunvirhe ntyo barhondera kumushekera omu kumuha akanyabwinyo.
25 Amalire kuhulusa abola bantu kamama, Yesu aja omu nju afarha efune y’oyola mwana w’obunyere, ava azuka.
26 Kweri, ogola mwazi gwava gwayenera mw’eyola teritware yoshi.
27 Yesu abere arhenga eyola munda, balume babiri b’empumi bamukulikira eyi bali bahamagala ntya n’omulenge gunene: “Mugala wa Daudi, orhubere obonjo.”
28 Amalire kuja omu nju abola balume babiri b’empumi bamukulikira, ababaza ntya: “Muyemerere oku nakagala kujira ntyo?” Bamushubiza: “Nechi Waliha.”
29 Naho Yesu abahuma oku mesho aderha: “Bibabere nk’ok’obwemere bwenyu bunali.”
30 Amesho mabo marhondera kubona. Echindi, Yesu abakomereza omu kubabwira ntya: “Nta muntu mupimage mwabwira.”
31 Aliko bahikire embuga, barhondera kubwira abantu boshi ba mw’eyola teritware oku bilolere Yesu.
32 Bamalire kugenda, abantu balerhera Yesu akaduma kafarhirwe n’omuzimu.
33 Yesu amalire kufukuza oyola muzimu, akola kaduma karhondera kuderha. Abantu basomerwa bwenene, baderha: “Rhurhasaga kubona ebintu bili nk’ebila byajirika omu Izraeli.”
34 Aliko Abafarisayo baderha: “Obula buhashe agwerhe b’okufukuza abazimu, mwami w’abazimu omuherebo.”
35 Yesu arhondera kuzunguluka omu mavile n’omu mavilaje moshi, y’ali ahubiri omu masinagogi n’okuhubiri emyazi minja y’Obwami n’okufumya buli bulwala na buli bulema.
36 Abwene abantu kamama, abayunvira obonjo bulala bali korotokere n’okufufuka nka ntama zirhaherhe mungeri.
37 Naho abwira abanafunzi bage: “Kweri, akasi k’okushalula kalugire, aliko abakozi bagehere.
38 Bobola mubwire nyina akasi k’okushalula arhume abakozi b’okushalula.”
