Yayandikwaga na Matayo 12:1-50
-
Yesu, “Mukulu we Sabato” (1-8)
-
Okufumya omulume ohunzize okuboko (9-14)
-
Omukozi muzigirwa wa Mungu (15-21)
-
Okufukuza abazimu kugerera eroho lichesibwa (22-30)
-
Echaha chirhakababalirwa (31, 32)
-
Omurhi gunamenyikana kugerera amatunda mago (33-37)
-
Echimenyeso cha Yona (38-42)
-
Amango omuzimu amagaluka omu muntu (43-45)
-
Bene-babo Yesu na nyina (46-50)
12 Agola mango Yesu agera omu shwa ly’engano olusiku lwe Sabato. Abanafunzi bage bayunva enzara, barhondera kuhulula engano banazihekenya.
2 Abafarisayo babwene ntyo bamubwira: “Tala, abanafunzi bawe yibajira ebi rhakwanene kujirwa olusiku lwe Sabato.”
3 Yesu abashubiza: “Murhasomaga ebi Daudi ajiraga amango yewe n’abalume aliri nabo bayunvaga enzara si?
4 Okuntu ajaga omu nju ya Mungu, balya emigati y’okuyerekanwa embere za Mungu, n’obola yewe n’abalume aliri nabo barhalikwanene kuyilya, s’abadahwa bonyine babalikwanene kuyilya?
5 Changwa murhasomaga omu Sheriya ok’olusiku lwe Sabato abadahwa bali omu hekalu banavuna e Sabato, banayorha na buzira chaha?
6 Aliko mbabwirire oku hanola hali echintu ch’akachiro bwenene kulusha ehekalu.
7 Nka mwalimenyere bichi ebila binwa biderhere: ‘Indonzeze olukogo s’arhali enterekero,’ murhakaderhere kubi abantu barhagwerhe chaha.
8 Bulala Mwen’omuntu ye Mukulu we Sabato.”
9 Amalire kurhenga aho, ava aja omu sinagogi yabo.
10 Ahola haliri omulume walihunzize efune! Yi babona echi bakamusidakako, babaza Yesu ntya: “Biyemererwe okufumya omuntu olusiku lwe Sabato si?”
11 Yesu abashubiza: “Inde mu mwewe wakaba agwerhe ntama nguma, ekarhogera omu chishimu olusiku lwe Sabato, akafunda kuja kuyikulamo?
12 Omuntu ali w’akamaro bwenene kulusha entama. Che chirhumire, biyemererwe okujira echintu chinja olusiku lwe Sabato.”
13 Naho Yesu abwira oyola mulume: “Lambula efune yawe.” Ayilambula, yafuma yaba kuguma n’eyindi.
14 Aliko Abafarisayo baja embuga barhondera kupanga okuntu bamuyirha.
15 Yesu abere arhegera emipango yabo, ava arhenga ahola n’abantu kamama bamukulikira, anabafumya boshi.
16 Aliko abakomereza oku ntaye babwirage yewe ali nde,
17 y’ayeneza ebila binwa byaderhwaga kugerera omulebi Isaya:
18 “Tala omukozi wani nachishogere, muzigirwa wani, namuyemerere, namuhira kw’eroho lyani, nj’arhabala n’amashanja mamenye ehaki bye bichi.
19 Nta muntu nj’ajira naye obuhaka, arhakanayamuza, na nta muntu nji wayunva omulenge gwage omu mabarabara mazibuzibu.
20 Arhakavuna olusheke lukoromekere, arhakanazimya olutambi luli lwakula omusi, kugera amango nj’agala kulerha ehaki.
21 Kweri amashanja nji magwarha obulangalire omu zino lyage.”
22 Naho bamulerhera omuntu orhaliri abona n’okuderha bulala aliri m’omuzimu, Yesu amufumya arhondera kuderha n’okubona.
23 Abantu kamama baliri ahola basomerwa, baderha: “Birhakashobokana ey’oyula ye mugala wa Daudi baza?”
24 Abafarisayo bayunvirhe ntyo baderha: “Oyula muntu ali afukuza abazimu kugerera emisi ya Belzebuli,* murhegesi w’abazimu.”
25 Abere amenya amawazo mabo, Yesu ababwira ntya: “Buli bwami buli m’okurhayunvikana* bunazinda eyi bwahenere na buli vile changwa buli nju eli m’okurhayunvikana erhagenderera kubera eyumangire.
26 Intyo kon’okola, nka Shetani ali afukuza abazimu, akaba ey’ali achilwisa yenyine. Gurhe obwami bwage bwakaja bwayorha buyumangire?
27 Echindi, akaba ndi nafukuza abazimu oku misi ya Belzebuli,* abanafunzi benyu bowe banabafukuza oku misi ya nde? Che chirhumire bonyine ba banaba bazuzi benyu.
28 Aliko akaba ndi nafukuza abazimu kugerera eroho lya Mungu, k’okuderha k’Obwami bwa Mungu bwabahikireko mira.
29 Changwa gurhe omuntu akagala kuja omu nju y’omulume ogwerhe emisi, anasahura ebintu byage buzira kurhanga kumushweka? Bihemere arhange amushweke embere asahure ebintu byage.
30 Buli muntu orhali oku lunda lwani ali mupinzani wani, na buli muntu orhali wangwasa kugusha, ali ashandaza.
31 Che chirhumire imbabwirire okw’abantu nji bababalirwa buli buko bw’ebyaha n’ebidusi by’okudukanga* Mungu, aliko owadukanga eroho lichesibwa lya Mungu arhakababalirwa.
32 Omufano, owaderha Mwen’omuntu kubi, nj’ababalirwa, aliko owaderha eroho lichesibwa kubi arhakababalirwa, habe mu linola gulu chiro n’omu ly’amango mayinjire.
33 “Akaba muli murhi gwinja, mwayana amatunda menja, n’akaba muli murhi gubolere mwayana amatunda mabolere, bulala omurhi gunamenyikana kugerera amatunda mago.
34 Ego bana b’empiri we, mwakagala kuderha ebintu binja, munali bantu babi si? Bulala obunu bunaderha ebiyunjwire omu murhima.
35 Omuntu mwinja anakula ebintu binja omu depo nyinja y’omurhima gwage, aliko omuntu mubi anakula ebintu bibi omu depo mbi y’omurhima gwage.
36 Mbabwirire k’oku lusiku l’okucha olubanja abantu nji basamba ku buli bintu bya busha-busha baderhere;
37 bulala kugerera ebinwa byawe nji watangazwa munyakunali, changwa wanahanwa.”
38 Baguma omu bandisi n’Abafarisayo bamushubiza omu kuderha ntya: “Mwalimu, rhulonzeze orhuyereke echimenyiso.”
39 Yesu abashubiza: “Echizazi chibi chirhanaherhe bwemere chili chagenderera kulonza echimenyeso, aliko nta chimenyeso bahabwa olekere echimenyeso ch’omulebi Yona.
40 Bulala kuguma n’oku Yona amalaga siku esharhu ezuba n’obudufu omu nda y’efi nzibuzibu, Mwen’omuntu nj’amala siku esharhu ezuba n’obudufu omu shinda.
41 Amango m’olusiku l’okucha olubanja, abantu be Ninawi nji bafuka banayimanga haguma n’echila chizazi, banayerekana oku chikwanene kuhanwa, bulala amango bayunvaga oburhumwa bwa Yona, bahungama. Aliko, hanola hali olushire Yona.
42 Oku lusiku l’okucha olubanja, mwamikazi we Sheba* nj’ayimanga haguma n’echila chizazi, anayerekana oku chikwanene kuhanwa bulala alirhengere oku buzinda bw’egulu y’ayinja kuyunviriza obwengehe bwa Sulemani. Aliko, hanola hali olushire Sulemani.
43 “Amango omuzimu amarhenga omu muntu, anaja kulonza ahantu ahumukira omu fasi zirhaba mu menji, aliko anahabula.
44 Ey’oyola muzimu abona ntyo anaderha: ‘Nashuba kugaluka omu nju yani narhengagamo.’ Ey’ageramo anabugana nta muntu olimo, aliko bayicheseze banayipambire.
45 Oyola muzimu anagenda analerha bandi bazimu mushanvu bakalihire kumulusha, banaja mw’eyola nju n’okuberamo. Buzinda ehali y’oyola muntu yanaja yabiha bwenene kulusha oku yaliri burhanzi. Intyo kon’okola ku byabera echila chizazi.”
46 Okw’anali aganira n’abantu, bene-babo na nyina baliyumangire ahambuga eyi bali balonza baganire naye.
47 Muntu muguma ayinja amubwira: “Tala! Nyoko na bene-benyu bayumangire ahambuga, bali balonza baganire nawe.”
48 Omu kushubiza oyola muntu Yesu aderha: “Nyama ye nde? Na bene-berhu ba bande?”
49 Ayerekeza efune yage emunda abanafunzi bage bali, aderha: “Tala nyama na bene-berhu!
50 Bulala buli yeshi oli wajira obulonza bwa Darha oli omu mbingu, oyola ye mwene-werhu, ye mwali-werhu, ye na nyama.”
