Yayandikwaga na Matayo 14:1-36
14 Agola mango Herode waliri guvernere we Galilaya, ayunva emyazi oku bilolere Yesu.
2 Abwira abakozi bage: “Oyula ali Yowane mubatiza wafukire. Che chirhumire agwerhe obula buhashe boshi b’okukola ebila bisomerene.”
3 Herode abaga afarhire Yowane amushweka n’okumuheba omu prizo eju ya Herodiya muka Filipo mwene-wabo Herode.
4 Bulala Yowane aliri amubwira: “Orhakwanene kurhola oyula mukazi.”
5 Herode aliri alonza kuyirha Yowane, aliko ayubaha abantu bulala baliri babona Yowane nka mulebi.
6 Oku lusiku lukulu l’okuburhwa kwa Herode, mwali wa Herodiya azina embere z’abantu, asimisa Herode bwenene
7 omu kuntu ahakana* kw’amuha choshi akamuhema.
8 Omu kukulikiza amashumi ma nyina, aderha: “Ompe erhwe lya Yowane Mubatiza kw’enola sahani.”
9 Chiro akaba okw’ebyola byaligayisize mwami bwenene, okubona ahakanire embere z’abaliri balya haguma naye, Herode aderha mpu bamuhelyo.
10 Av’arhuma abantu omu prizo baje kucha Yowane erhwe.
11 Balerha erhwe lyage oku sahani, baliha oyola munyere naye alihekera nyina.
12 Buzinda abanafunzi ba Yowane bayinja barhola omubiri gwage baja kuguhamba, naho baja kubibwira Yesu.
13 Yesu ayunvirhe ntyo, aja omu bwarho arhenga ahola y’aja ahantu hali bwihunze omu kuntu abe yenyine. Aliko abantu bamenyere ntyo, barhenga omu mavile bamukulikira oku magulu.
14 Agerere eshi, abona abantu kamama, abayunvira obonjo afumya n’abaliriho balwere.
15 Lyabere golo abanafunzi bage bayinja ahaliri bamubwira: “Hanola rhuli hali hale n’abantu bwanayirire, obwire abala bantu boshi bagende omu mavilaje bachigulire ebilyo.”
16 Aliko Yesu ababwira: “Birhahemere oku bagende, mwabo mubahe ebi balya.”
17 Bamushubiza: “Ntacho rhuherhe hanola olekere migati erhano na fi ebiri.”
18 Abashubiza: “Mubinderhere hanola.”
19 Abwira abola bantu kamama bayikale omu bulambo. Arhola eyola migati n’ezola fi ebiri, alola embingu asalira, achagulanga eyola migati ayiha abanafunzi bage, nabo bayigabira abola bantu.
20 Nantyo boshi balya bayugurha, barhalagula n’ebichira-chira basigazaga bayunjuza rhurhanda 12.
21 Ababilyaga baliri hofi balume 5 000, buzira kuganja abakazi n’abana.
22 Buzira kulegama Yesu abwira abanafunzi bage baje omu bwarho, babe bamurhanga oku lwindi lunda lw’enyanja okw’asezera abola bantu kamama.
23 Amalire kusezera abola bantu, azamukira oku musozi ah’aba yenyine omu kuntu asalire. Bwayira ey’achiri yenyine eyola munda.
24 Mw’eyola sa obwarho bwali bwamagera oku magana me metre kurhenga eshi. Omulaba gwaliri gwabushurha bulala omuyaga gwaliri gwarhengerera embere zabo.
25 Bwabere hofi kucha Yesu ayinja emunda bali ey’ali alambagira oku nyanja.
26 Abanafunzi bamubwene yalambagira oku nyanja, bayubaha bwenene baderha ntya: “Rhwamayaganwa!” Babanda n’endulu eju y’obuba.
27 Ahola han’aho Yesu ababwira: “Mukomere! Nyono, murhayubahaga.”
28 Petro amushubiza ntya: “Waliha, akaba anali woyo, ombwire nani inyinje emunda oli ey’indi nalambagira oku menji.”
29 Aderha: “Yinja!” Naho Petro arhenga omu bwarho, arhondera kuja emunda Yesu ali ey’ali alambagira oku menji.
30 Aliko abwene omulaba guli mw’echihusi chinene bwenene, ayubaha. Abere amarhondera kuzika abanda endulu aderha: “Waliha, ontabale!”
31 Aho han’ahola Yesu alambula okuboko, amufarha amubwira ntya: “We muntu ogwerhe bwemere bugeke, charhumire wagwarha engangane?”
32 Bamalire kuja omu bwarho ntya, haba endera.
33 Naho balala boshi baliri omu bwarho bayunama embere zage, baderha ntya: “Kweri oli Mugala wa Mungu.”
34 Bava bayambuka baja omu chihugo che Genezareti.
35 Abantu b’eyola munda babere bamurhegera, bamenyesa abantu boshi baliri omu materitware mali hofi n’ahola, bava bamulerhera abantu boshi balilwere.
36 Bamulakirira oku chiro abayemerere bafe chakuhuma oku mukunjo g’omwambaro gwage gw’enyanya na boshi baguhumagako bafuma bwinja-bwinja.
Mahugulo m'efo
^ Ao “alapa.”
