Yayandikwaga na Matayo 13:1-58
-
EMIFANO OKU BILOLERE OBWAMI (1-52)
-
Omuhinzi (1-9)
-
Echarhumaga Yesu akolesa emifano (10-17)
-
Yesu amafasiriya omufano g’omuhinzi (18-23)
-
Engano n’ebirhi bibi (24-30)
-
Akaburho k’eharadali n’elevire (31-33)
-
Okukolesa emifano kwamayeneza obulebi (34, 35)
-
Okufasiriya omufano gw’engano n’ebirhi bibi (36-43)
-
Obuhirhi bubishirwe n’egerha linja (44-46)
-
Omulaga gw’echikuruju (47-50)
-
Ebintu bihyahya n’ebikulukulu omu depo (51, 52)
-
-
Yesu amalahirwa omu teritware y’emwabo (53-58)
13 Olola lusiku lon’olola arhenga omu nju aja kuyikala eburhambi bw’enyanja.
2 Abantu kamama bamushimba ah’ali, ava aja omu bwarho ayikalamo n’abola bantu kamama bayorha emushengo.
3 Ababwira bintu binene kugerera emifano, aderha ntya: “Mulole! Muhinzi muguma alijire kubyala* emburho.
4 Okw’ali abyala,* mburho ziguma zayinja zarhogera oku njira; enyunyi zayinja zazilya.
5 Ezindi zarhogera oku buhinge b’oku bale aharhali budaka bunene, zamera juba-juba bulala obudaka burhalilugire.
6 Aliko ezuba lyabere lyakola, zasirera n’okuyuma juba-juba bulala zirhaliherhe emizi.
7 Ezindi zagwa omu mishaki, n’eyola mishaki yakula yazifundeza.
8 Aliko ezindi zarhogera omu budaka bwinja, zarhondera kuyana amatunda, ziguma zayera zachiyongera kali 100, kali 60, n’ezindi kali 30.
9 Ogwerhe amarhwiri ayunve.”
10 Abanafunzi bage bamuyegera bamubaza: “Bulagurhe oli waganira nabo omu kukolesa emifano?”
11 Abashubiza ntya: “Mwabo mwahabirwe obuhashe b’okuyunva esiri zichesibwa z’Obwami bw’embingu, aliko bowe barhabuhabwaga.
12 Bulala buli yeshi oherhe obumenyi ayongererwa obwindi, na buzinda anagwarha bumenyi bunene; aliko orhagwerhe bumenyi, na hityuli akaba aligwerhe ahiheza.
13 Che chirhuma inanganira nabo omu kukolesa emifano; bulala banalola aliko eyi ntacho babona, banayunviriza eyi ntacho bayunva, omu kuntu bamenye ebyaderherwe k’okuderha gurhe.
14 Obulebi bwa Isaya buli bwabayenererako. Buderhere ntya: ‘Kweri mwagenda mwayunviriza eyi ntacho mwayunva, mwanagenda mwalola eyi ntacho mwabona.
15 Abala bantu barhayunva. Banayunviriza aliko eyi barhajira ebi bayunvirhe; banafunga amarhwiri mabo n’okuzibya amasu mabo omu kuntu barhayunvaga barhanabonaga chintu. N’eju y’echola barhayunva bichi bakwanene kujira, nantyo barhahindamuka bakayinja emunda indi imbafumye.’
16 “Aliko obusime buli bwenyu bulala amasu genyu gali gabona n’amarhwiri genyu gali gayunva.
17 Bulala kweri imbabwirire, balebi banene n’abanyakunali banene baliri bachifija babone ebila bintu muli mwabona, aliko barhabibonaga; baliri bachifija bayunve ebintu muli mwayunva, aliko barhabiyunvaga.
18 “Mujage mwaleka imbabwire bichi omufano g’omuntu wajaga kubyala* guderhere.
19 Emburho zarhogeraga oku njira ali muntu onayunva omwazi g’Obwami aliko ey’arhayunva bichi guderhere, n’olala mubi anayinja anashigula ebyabaga byasimirwe omu murhima gwage.
20 Emburho zabyalwaga omu buhinge b’oku bale, ali muntu onayunva omwazi g’Obwami anaguyemera aho han’ahola n’obusime.
21 Aliko bulala omwazi g’Obwami gurhashingire emizi omu murhima gwage, anagenderera kasanzi kageke, n’ey’apata amalibuko n’obupinzani eju y’omwazi g’Obwami, anachika entege.
22 Zilala zabyalwaga omu mishaki ali muntu onayunva omwazi g’Obwami, aliko emilago y’elila gulu n’emisi y’obuchire enarhebekana byanafundeza omwazi g’Obwami omu murhima gwage, eyi gurhayana amatunda.
23 N’emburho zabyalwaga omu budaka bwinja, bali bantu banayunva omwazi g’Obwami banayunva bichi guderhere n’okuyana amatunda, muguma kukuba kali 100, owindi kali 60, n’owindi kali 30.”
24 Ashuba kubaha ogwindi mufano, aderha: “Obwami bw’embingu bwakashushanywa n’omuntu wabyalaga* emburho nyinja omu shwa lyage.
25 Abantu babere balyamire, omwanzi wage ayinja, abyala* ebirhi bibi omu ngano achigendera.
26 Engano zabere zamera n’okuyasa, ebirhi bibi nabyo byabonekana.
27 Abakozi ba nyina eshwa bamushimba bamubaza, ‘Nahamwerhu, orhalibyalire emburho nyinja omu shwa lyawe si? Gurhe lyajire lyamera mw’ebirhi bibi?’
28 Ababwira: ‘Mwanzi* oyola wajirire ntyo.’ Abakozi bage baderha: ‘Olonzeze rhuje kubishigula si?’
29 Ababwira: ‘Nanga murhajiraga ntyo yi murhashigula engano haguma n’ebirhi.
30 Muleke byoshi bikulire haguma kugera amango m’okushalula, n’agola mango nji nabwira abashaluzi: Murhange mulunde ebirhi bibi mubishweke emifungo-mifungo n’okubidwika; naho mulunde engano omu depo yani.’”
31 Abaha ogwindi mufano, aderha: “Obwami bw’embingu buli nka mburho y’eharadali omuntu arholaga ayibyala* omu shwa lyage.
32 Omu bukweri, hye hiba hiburho higekegeke omu mburho zoshi, aliko amango hyamakula hinarhenga m’omurhi guzibuzibu omu mirhi yoshi y’eshogo, n’enyunyi z’omu chanya zanayinja kuyalikira omu marhabi mago.”
33 Abaha ogwindi mufano, aderha: “Obwami bw’embingu buli nka levire* omukazi anarhola anachanga mu bipimo bisharhu by’esyano kugera ah’epate yoshi yarhundira.”
34 Yesu abwira abantu ebyola byoshi omu kukolesa emifano. Kweri, ntacho aliri ababwira buzira kukolesa emifano.
35 Ajiraga ntyo omu kuyeneza ebyaderhwaga kugerera omulebi: “Nji nafungula obunu bwani kugerera emifano; nji natangaza ebintu byalibishirwe kurhangirira oku murhondero.”
36 Amalire kusezera abantu, aja omu nju. Abanafunzi bage bamushimba baderha: “Orhufasiriye omufano gw’ebirhi bibi omu shwa.”
37 Omu kubashubiza, Yesu aderha: “Owabyalaga* emburho nyinja ali Mwen’omuntu;
38 eshwa lili gulu. N’emburho nyinja bali bana b’Obwami, aliko ebirhi bibi bali bana b’olala mubi,
39 N’omwanzi wabyalaga* ebirhi bibi ali Ibilisi. Okushalula buli buzinda bwa linola gulu, n’abashaluzi bali bamalayika.
40 Che chirhumire, nka kulala bagushaga ebirhi bibi n’okubidwika, intyo ku nji byanaba oku buzinda bwa linola gulu.
41 Mwen’omuntu nj’arhuma bamalayika bage, banagusha abantu boshi banarhuma abandi bagoma n’abantu banavuna amarhegeko, banabakula omu Bwami bwage;
42 banabakabula omu ndugurhira y’omuliro. Omola mu nji balirira n’okuhekenyera mw’amenyo.
43 Agola mango abanyakunali nji babaraganya nka zuba omu Bwami bw’Eshe. Ogwerhe amarhwiri ayunve.
44 “Obwami bw’embingu buli nka buhirhi bubishirwe omu shwa omuntu abonaga ashuba kububisha; n’eju y’obusime, agenda aguza buli chintu aliherhe y’agula elyola shwa.
45 “Kandi Obwami bw’embingu buli nka muchuruzi onabalama ey’ali alonza amagerha menja m’akachiro.
46 Abere abona gerha liguma ly’akachiro kanene, agenda ahola han’aho aguza buli chintu aligwerhe, aligula.
47 “Kandi Obwami bw’embingu buli nka mulaga gw’echikuruju bakabulaga omu nyanja, gwalerha efi za buli buko.
48 Gwabere gwayunjula bagukululira eshi, bayikala barhondera kurhungula, banarhola efi zikwirire banazibika n’ezirhakwanene banazikabula.
49 Intyo kon’okola ku nji byaba oku buzinda bwa linola gulu. Bamalayika nji bayinja banakula abantu babi omu banyakunali,
50 banakabula abantu babi omu ndugurhira y’omuliro. Omola mu nji balirira n’okuhekenyera mw’amenyo.
51 Yesu ababaza: “Mwayunvirhe bichi ebila bintu byoshi biderhere si?” Bamushubiza: “Nechi.”
52 Naho ababwira ntya: “Akaba ntyo ku bili, mumenye oku buli muntu yeshi onayigiriza embere z’abantu, ey’amala kupata enyigirizo oku bilolere Obwami bw’embingu, anaba nka nyin’enju oli wakula ebintu bihyahya n’ebikulukulu omu depo yage.”
53 Yesu amalire kubaha eyola mifano yoshi, ava arhenga ahola agenda.
54 Aja omu teritware y’emwabo, arhondera kuyigiriza abantu omu masinagogi mabo, naho basomerwa baderha ntya: “Ngahe oyula muntu akulaga obula bwengehe n’obuhashe b’okujira ebila bisomerene byoshi?
55 Oyula arhali mugala w’olala mulume onaranda empaho si? Mariya arhali ye nyina si? Yakobo, Yosefu, Simoni na Yuda barhali bene-babo si?
56 Na bali-babo, barhali haguma nerhu hanola si? Ngahe akaja aba ey’amakula ebila byoshi?”
57 Nantyo barhayemeraga bagwarha obwemere muye. Aliko Yesu ava ababwira ntya: “Omulebi anakengwa ezindi fasi zoshi olekere omu teritware y’emwabo n’omu mwabo.”
58 Na bulala barhaligwerhe bwemere, arhajiraga bisomerene binene eyola munda.
