Yayandikwaga na Matayo 27:1-66
27 Lyabere sezi, abakulu b’abadahwa boshi n’abashamuka babubaganana yi barhola omupango gurhe bayirha Yesu.
2 Bamalire kumushweka, bamuheka n’okumuhira omu fune za guvernere Pilato.
3 Yuda wamulenganyaga abwene oku bachirire Yesu echihano, agaya bwenene agalulira abakulu b’abadahwa n’abashamuka bila bicheri 30 bye arja,
4 aderha: “Najirire echaha okulenganya eshagama y’omuntu orhaherhe gosa.” Bamubwira: “Chibazo cherhu echola si? Ebyo bikulolere!”
5 Ava akabula ebyola bicheri omu hekalu agenda, aja kuchimanika.
6 Aliko abakulu b’abadahwa barhola ezola furanga baderha: “Zirhakwenene kuja omu shaho nchesibwa bulala eli ngulo y’eshagama.”
7 Bamalire kuyunvikana, bazigula eshwa lya mubumbi muguma ebe fasi y’okuhamba abenjiira.
8 Che chirhuma eyola fasi enayirikwa kugera zene Ishwa ly’Eshagama.
9 Nantyo ebila binwa by’omulebi Yeremiya byayenera: “Barholere bicheri 30 bye arja, ebeyi ly’okugula omuntu, olala baguma omu bagala ba Izraeli bachiraga ebeyi,
10 bamabigula eshwa ly’omubumbi nk’oku Yehova anambwiraga.”
11 Yesu ayimanga embere za guvernere Pilato, naho guvernere amubaza: “Woyo we Mwami w’Abayahudi si?” Yesu amushubiza: “Wenyine waderhereko.”
12 Amango abakulu b’abadahwa n’abashamuka barhondera kumusidaka, Yesu achisirira.
13 Pilato amubwira: “Orhali wayunva ebila byoshi abantu bali bakusidaka?”
14 Aliko arhamushubizaga haba n’echinwa n’echiguma omu kuntu guvernere asomerwa bwenene.
15 Ku buli lusiku lukulu, guvernere agendaga ashwekula mushwekwa muguma abantu bachishogere.
16 Agola mango haliri omushwekwa omenyikene bwenene waliyirikirwe Baraba.
17 Abantu kamama babere bachigushire haguma, Pilato ababaza: “Inde mulonzeze inshwekule, Baraba changwa Yesu banayirika mpu ye Kristu?”
18 Bulala Pilato alimenyere oku bongwa bu bwarhumire balerha Yesu emunda ali.
19 Okw’anayikere oku chichumbi chage ch’okuchira kw’emanja, mukage arhuma bamubwire ntya: “Ntako ojirage oyola muntu orhaherhe chibazo, bulala nalilibukire bwenene omu bilorho obudufu bwa zene, eju yage.”
20 Aliko abakulu b’abadahwa n’abashamuka bashumika abantu baheme oku Baraba alikulwe aliko Yesu ayirhwe.
21 Guvernere abaza: “Mw’abala babiri, inde mulonzeze inshwekulage?” Bashubiza mpu “Baraba.”
22 Pilato ababaza: “Gurhe njage najira oyula Yesu yewe onayirikwa mpu ye Kristu?” Boshi baderha: “Omumanike oku murhi!”
23 Ababwira: “Bulagurhe, gosa lihe ajirire?” Aliko bagenderera kuyamuza bwenene: “Omumanike oku murhi!”
24 Pilato abwenene k’okujira ntyo ntacho kwamalire s’ahubwe abantu yibagenderera kukaliha bwenene, arhola amenji akalaba efune zage embere zabo, aderha: “Eshagama y’oyula muntu erhandi oku rhwe. Ebyola bibalolere mwabo mwenyine.”
25 Abantu baderha ntya omu kumushubiza: “Leka eshagama yage egende oku rhwe lyerhu n’ely’abana berhu.”
26 Ava ashwekula Baraba, ahana oruhusa bakubirhe Yesu banamumanike oku murhi.
27 Naho abasoda ba guvernere baheka Yesu omu mwa guvernere bahamagala abasoda boshi bamuzunguluka.
28 Bamuhogola emyambaro yage, bamuyambisa omwambaro g’omuduku.
29 Baluka echishema ch’emishaki bamuyambisacho omu rhwe, barhola olusheke bamuhalo omu fune y’ekulyo. Bafukama embere zage barhondera kumushinyagulira omu kuderha: “Rhwalamusize Mwami w’Abayahudi!”
30 Bamuchirako barhola n’olola lusheke barhondera kumushurhalo omu rhwe.
31 Bamalire kumushinyagulira, bamuhogola ogola mwambaro bamuyambisa emyambaro yage bamuheka embuga yi baja kumumanika oku murhi.
32 Oku banali bagenda, babuganana n’omulume we Kirene waliyirikirwe Simoni. Bamuseza aheke omurhi gw’amateso gwa Yesu.
33 Bahikire efasi eyirikwa Golgota, k’okuderha, Fasi y’Echihangasi,
34 bamuha edivayi echangirwe mw’amenji malulire bwenene; ayimimireko alahira kuyinywa.
35 Bamalire kumushurha mw’emisumari oku murhi, bagabana emyambaro yage omu kuyisharhira esimbi.
36 Bayikala ahola bayorha bamulanga.
37 Bayandika enyanya w’erhwe lyage ebinwa balimusidakire biderhere ntya: “Oyula ali Yesu Mwami w’Abayahudi.”
38 Naho bamanika bishambo bibiri eburhambi bwage, chiguma ekulyo echindi ekulembe.
39 Abaliri bagera omu njira baliri bamushinyagulira n’okuzunguza amarhwe mabo
40 banaderha: “Si wewalonza kushanduza ehekalu n’okuliyumbaka mu siku esharhu; jaga wachichungula lero! Akaba onali mugala wa Mungu, chishonola k’ogola murhi gw’amateso!”
41 Intyo kon’okola abakulu b’abadahwa n’abandisi barhondera kumushinyagulira, banadeha:
42 “Aliri achungula abandi; aliko arhakagala kuchichungula! Mpu ali Mwami w’Abaizraeli; ajage achishonola k’ogula murhi gw’amateso, nerhu rhwamuyemera.
43 Alihirire obulangalire bwage mu Mungu; oyola Mungu ajage amuchungula akaba anasimisizwe naye bulala aliri aderha, ‘Nyono indi Mugala wa Mungu.’”
44 Intyo kon’okola chiro n’ebishambo byalimanikirwe haguma naye byaliri byamudukanga.*
45 Kurhangirira hofi midi kugera hofi sa mwenda, omwizimya gwaba omu chihugo choshi.
46 Hofi sa mwenda ntya, Yesu ahamagala n’omulenge gw’enyanya aderha: “Eli, Eli, lama sabaktani?” k’okuderha, “Mungu wani, Mungu wani bulagurhe wakandeka?”
47 Omu kuyunva ebyola, abaliri ahola barhondera kuderha: “Ali ahamagala Eliya.”
48 Ahola han’aho muntu muguma omu baliri ahola alibirha arhola eshifo ayihira omu divayi ekalirire, ayihira oku lusheke amuhayo okw’ayinywe.
49 Aliko abandi baderha: “Mumuleke! Muleke rhulole akaba Eliya ayinja amuyokole.”
50 Yesu ashuba kuhamagala n’omulenge gw’enyanya, naho ava afa.
51 Erido ly’ahachesibwa lyasharhuka kabiri kurhangirira enyanya kugera eshishi, egulu lyagera m’omusisi, n’amabale mabereka.
52 Eshinda zachinguka, n’emibiri minene y’abachesibwa bafire yarhenga mw’ezola shinda
53 n’abantu kamama bayibona. (Yesu amalire kufuka, abantu* kamama barhengereraga engabo z’ewa mashinda baja omu vile nchesibwa.)
54 Amango omukulu w’abasoda n’abaliri bachunga Yesu bayunva omusisi na byoshi byabere, bayubaha bwenene, baderha: “Kweri oyula aliri Mugala wa Mungu.”
55 Bakazi banene babaga bakulikire Yesu kurhenga e Galilaya yi bamukolera eby’akenere baliri bahenguza eyi banali hale.
56 Mw’abola bakazi haliri Mariya we Magdala, Mariya nyina wa Yakobo na Yose, na nyina wa bagala ba Zebedayo.
57 Egolo lyabere, hayinja omulume w’omuchire we Arimateya waliyirikirwe Yosefu waliri naye mwanafunzi wa Yesu.
58 Oyola mulume ashimba Pilato amuhema omubiri gwa Yesu. Pilato aderha bamuhego.
59 Yosefu arhola ogola mubiri aguzingira omu chiraka chikwirire chinachere,
60 agulyamikiza omu shinda yage mpyahya abaga achimbwire omu bale. Amalire, ayichinga n’olubale luzibuzibu naho agenda.
61 Aliko Mariya we Magdala n’owindi Mariya bagenderera kubera ahola, eyi bayikere embere w’eshinda.
62 Olusiku lwakulikiragaho, k’okuderha enyuma w’amarheganyo me Sabato, abakulu b’abadahwa n’Abafarisayo babuganana emwa Pilato,
63 bamubwira: “Waliha, rhwayibukire kw’amango ola mubeshi arhaliza kufa, aliri adeha, ‘Nafuka enyuma wa siku esharhu.’
64 Che chirhumire, orhegeke baje kulanga eshinda yage, y’abanafunzi bage barhayinja bakayiba omubiri gwage n’okubwira abantu mpu afukire! N’obola bubeshi bukaja bwaba bubi bwenene kulusha n’ob’oburhanzi.”
65 Pilato ababwira: “Nenyu mugwerhe abalanzi. Mugende muyilange nk’oku mugalire koshi.”
66 Bava bagenda baseza elyola bale bwenene bahira ha n’abalanzi.
