Yayandikwaga na Matayo 28:1-20
28 Enyuma we Sabato emiseke-miseke olusiku lurhanzi lw’eboso, Mariya we Magdala n’owindi Mariya baja oku shinda ya Yesu.
2 Omusisi gunene gwabaga eyi gwagerere bulala malayika wa Yehova aliyandagere kurhenga embingu, ashegeza ebale lyalichingire eshinda, aliyikalako.
3 Aliri abonekana nka mubaraganyo n’emyambaro yage yaliri y’omweru nka lubula.
4 Nechi, eju y’okumuyubaha, abalanzi badirhimana bwenene baba nk’abafire.
5 Aliko oyola malayika abwira abola bakazi: “Murhayubahaga, bulala imbwazize ku mwayinjire kulola Yesu nji bamanikaga oku murhi.
6 Arhali hanola, bulala afukire nk’okwanaderhaga, muyinje muchilolere ahalilyamire.
7 Che chirhumire mugende juba-juba mubwire abanafunzi bage kw’afukire, abarhanga ne Galilaya, eyola munda yi mwamubugana. G’omwazi ogola mbabwirire.”
8 Bobola bava barhenga ahola oku shinda juba-juba eyi bayunvirhe obuba n’obusime bunene bagenda balibirha kuja kubwira abanafunzi bage.
9 Naho Yesu ababugana ababwira: “Mahyo!” Bamuyegera bamufarha amagulu n’oku muyunamira.
10 Yesu ababwira: “Murhayubahaga! Mugende mubwire bene-berhu baje e Galilaya, eyola munda yibambugana.”
11 Babere bagenda, baguma omu balanzi baja omu vile kubalira abakulu b’abadahwa ebintu byoshi byabere.
12 Enyuma waho abakulu b’abadahwa babuganana bapatana, baha abasoda furanga zinene
13 bababwira: “Muderhe, ‘Abanafunzi bage baliyinjire ebudufu eyi rhulyamire bamamuyiba.’
14 Bikahika emunda guvernere ali rhwenyine rhwamufasiriya, ntacho mushibage mwayubaha.”
15 Barhola ezola furanga bajira nk’oku banababwirire, n’eyola ngani yamenyikene bwenene omu Bayahudi kugera zene.
16 Abanafunzi bage 11 baja e Galilaya, oku musozi Yesu abaga apangire babugananako.
17 Babere bamubona bamuyunamira aliko baguma bagangana.
18 Yesu abayegera ababwira: “Nahabirwe oburhwali boshi omu mbingu n’oku gulu.
19 Che chirhumire, mugende, mujire abanafunzi kurhenga omu bantu b’amashanja moshi, mubabatize omu zino lya Darha, ely’Omugala, n’ely’eroho lichesibwa,
20 mubayigirize kukenga amarhegeko moshi nababwirire. Mulole! Indi haguma nenyu esiku zoshi kugera oku buzinda bw’egulu.”
