Yayandikwaga na Matayo 23:1-39
23 Kisha Yesu arhondera kubwira abanafunzi bage n’abantu kamama ntya:
2 “Abandisi n’Abafarisayo bachiyikeze oku chichumbi cha Musa.
3 Che chirhumire ebintu byoshi bababwira mubijire munabikenge, si murhakulikiraga ebijiro byabo bulala banaderha ebintu aliko eyi barhajira ebi baderhere.
4 Banashana emizigo elemerere banayiheba oku birhugo by’abantu aliko eyi bowe barhalonzeze kuyikoza chiro k’omudoki.
5 Amakasi moshi banakola, banamakola y’abantu bababona, bulala banagalihya orhulanga-magala* banayambala n’okulehya emikunjo y’emyambaro yabo.
6 Banasima efasi zikengerwe bwenene omu fete n’efasi z’embere-mbere omu masinagogi.
7 Basima abantu babalamusize omu masoko banabahamagale Mwalimu.*
8 Aliko mwabo murhayemeraga babahamagala Mwalimu* bulala Mwalimu wenyu ali muguma, na mweshi muli ba nda nguma.
9 Echindi, nta muntu muhamagalage Darha oku gulu bulala Yisho ali muguma, olala oli omu mbingu.
10 Murhanayirikwaga barongozi, bulala mugwerhe Murongozi muguma, yekala Kristu.
11 Aliko omukulu bwenene mu mwabo akwanene kuba mukozi wenyu.
12 Buli yeshi wachizamula ayandagazwa, na buli yeshi wachiyandagaza azamulwa.
13 “Buhanya bwenyu bandisi n’Abafarisayo. Ego mwe ndyalya mwe! Bulala munachingira abantu omulyango yi barhaja omu Bwami bw’embingu, oku mwabo murhajamo n’abalonzeze kujamo eyi murhabayemerera.
14 ——
15 “Buhanya bwenyu bandisi n’Abafarisayo. Ego mwe ndyalya mwe! Bulala munabalamira hale oku nyanja n’oku budaka eyi muli mwalonza muntu muguma mwahindamula obwemere, n’eyi mumala kumuhindamula mwanamujira akwanane Echihenama* kabiri kubalusha.
16 “Buhanya bwenyu mwabo barongozi bahumire. Munaderha mpu omuntu yeshi wahakana* omu zino ly’ehekalu nta chibazo, aliko omuntu wahakana omu zino lye oro eli omu hekalu akwanene kuyeneza ebyalaganyaga.
17 Ego bihwinja bihumire! Bichi by’akamaro bwenene eye oro, ey’ehekalu lirhumire eyola oro yaba nchesibwa?
18 Kandi munaderha: ‘Nk’omuntu ahakanire* omu zino ly’amazabahu nta chibazo, aliko nk’amahakana omu zino ly’entulo eli oku mazabahu akwanene kuyeneza ebyalaganyaga.’
19 Ego mpumi! Bichi bikulu ey’entulo, ey’amazabahu manarhuma entulo yaba nchesibwa?
20 Buli yeshi onahakana* omu zino ly’amazabahu, anaba ey’ahakanire omu zino ly’amazabahu na byoshi biliko.
21 Na buli yeshi wahakana* omu zino ly’ehekalu anaba ey’ahakanire omu zino ly’ehekalu n’olala olamiremo.
22 N’olala wahakana* omu zino ly’embingu anaba ey’ahakanire omu zino ly’echichumbi ch’Obwami cha Mungu n’omu zino ly’olala ochiyikereko.
23 “Buhanya bwenyu bandisi n’Abafarisayo. Ego mwe ndyalya mwe! Bulala munahana echakumi ch’ebirhi bigekegeke nk’emante, aneti n’ekumini* aliko mwanaleka ebintu by’akamaro bwenene omu Sheriya, k’okuderha, okunali, olukogo n’obwimana. Kuli kwinja okukola ebila munajira aliko eyi murhasuzagura ebila bindi.
24 Barongozi bahumire! Munashongoola eby’okunywa mwanakula m’omugu aliko mwanamira engamiya.
25 “Buhanya bwenyu bandisi n’Abafarisayo. Ego mwe ndyalya mwe! Bulala muli nka gopo n’esahani bishukirwe embuga aliko ey’omu ndani bizingire. Nenyu omu mirhima yenyu hayunjwire obuhugu n’obongwa burhakagalulwa.
26 Ego Mufarisayo ohumire, rhanga oshuke omu ndani w’egopo n’esahani yi n’emugongo hacha.
27 “Buhanya bwenyu bandisi n’Abafarisayo. Ego mwe ndyalya mwe! Bulala muli nka shinda zishigirwe kw’erangi ly’omweru, zanabonekana embuga nka zikwirire bwenene aliko ey’omu ndani hayunjwire amagufa m’abantu bafire na buli buko b’obuchafu.
28 Intyo kon’okola, oku masu m’abantu munabonekana nka muli banyakunali, aliko ey’omu mirhima yenyu muyunjwire obulyalya n’okuvuna amarhegeko.
29 “Buhanya bwenyu bandisi n’Abafarisayo. Ego mwe ndyalya mwe! Bulala munayumbaka eshinda z’abalebi n’okupamba eshinda z’abanyakunali,
30 mwanaderha mpu ‘Nka rhwalamaga omu siku za bashokuliza, rhurhakachihebere haguma nabo omu kushesha eshagama y’abalebi.’
31 Nantyo mwenyine muli mwayerekana bwinja-bwinja oku muli bana ba balala bayirhaga abalebi.
32 Bobola mujage mwamaliriza akasi bashokuliza benyu barhonderaga.
33 “Ego njoka, bana b’empiri, gurhe mwakaja mwafuma echihano che Chihenama?*
34 Che chirhumire nabarhumira abalebi, abengehe n’abalimu. Baguma mwabayirha abandi mwanababamba oku murhi n’abandi mwanabakubirhira omu masinagogi menyu n’okubalibuza vile oku yindi,
35 omu kuntu eshagama yoshi y’abanyakunali yashesherwe oku gulu ebe oku rhwe lwenyu, kurhengerera oku shagama y’omunyakunali Abeli kugera oku shagama ya Zakariya mugala wa Barakiya, eyi mwayirhiraga ahagarhi k’ehekalu n’amazabahu.
36 Kweri imbabwirire, echila chizazi chahanwa eju y’ebila bintu byoshi.
37 “Yerusalemu, Yerusalemu, munizi w’abalebi onayirha abarhumirwe emwage omu kubashurha amabale. Turu zinga nalonzeze ingushe abana bawe nka kulala engoko enagusha oburhulage bwayo omu byubi aliko orhayemeraga?
38 Tala! Mungu alekere enju yawe.
39 Bulala inkubwirire, kurhengerera zene orhakachimbona kugera amango waderha, ‘Ogishirwe ali olala wayinja omu zino lya Yehova!’”
Mahugulo m'efo
^ Rhwaliri rhubwati Abafarisayo bagendaga bayambala omu malanga rhuli ku mandiko maguma-maguma. Bagendaga bakolesa orhola rhubwati omu kuchilanga.
^ Ao “Rabbi.”
^ Ao “Rabbi.”
^ Echihenama yaliri fasi bagendaga badwikira m’obuchafu embuga w’evile ye Yerusalemu.
^ Ao “walapa.”
^ Ao “alapire.”
^ Ao “onalapa.”
^ Ao “walapa.”
^ Ao “walapa.”
^ Emante, eneti n’ekumini, biba birhi bigekegeke abantu banakolesa omu kulunga ebilyo.
^ Echihenama yaliri fasi bagendaga badwikira m’obuchafu embuga w’evile ye Yerusalemu.
