Yayandikwaga na Matayo 10:1-42
10 Yesu ahamagala abanafunzi bage 12 abaha obuhashe b’okufukuza abazimu, b’okufumya buli bulwala na buli bulema.
2 Amala m’amazino m’entumwa 12: Simoni, oyirikwa Petro na Andreya mwene-wabo; Yakobo mugala wa Zebedayo na Yowane mwene-wabo;
3 Filipo na Bartolomayo; Tomasi na Matayo wagendaga alipisa ekoli; Yakobo mugala wa Alfayo na Tadayo;
4 Simoni Munyakananayo* na Yuda Iskariote wayinjaga kulenganya Yesu.
5 Yesu arhuma abola 12 abaha obula bwerekezi: “Murhageraga omu barabara ly’amashanja, na nta vile y’Abasamariya mujagemo;
6 s’ahubwe mugende mulonze abantu b’eshanja lya Izraeli bali nka ntama zaherere.
7 Mugende eyi muli mwahubiri n’okuderha: ‘Obwami bw’embingu buli hofi.’
8 Mufumye abalwala, mufule abafu, mufumye abalwere ebibenzi, mufukuze abazimu. Mwahabirwe ku busha, nenyu muhane oku busha.
9 Murhahekaga ebicheri bye oro, ebye arja changwa ebye kwivre omu mufuko gwenyu g’okuheka efuranga,
10 murhachiyikiraga eby’okulya, murhahekaga myambaro ebiri, changwa ebirato, ao enkoni y’okulambagirirako, bulala omukozi akwanene kuhabwa eby’okulya.
11 “Evile changwa evilaje yoshi-yoshi mwajamo, mulonze inde okwanene munabere omu mwage kugera amango mwagaluka.
12 Amango mwamaja omu nju, mulegereze banyinamo.
13 Akaba eyola nju ekwanene, egwarhe omurhula muyilonzeze; aliko akaba erhakwanene, omurhula gwenyu gubagalukire.
14 Ahantu hoshi barhabakaribisize changwa barhabayunvirize, amango mwamarhenga mw’eyola nju changwa mw’eyola vile, mukungurhe oluchuchu luli oku magulu menyu.
15 Kweri imbabwirire, oku lusiku l’okucha olubanja, e Sodoma ne Gomora nji yachirwa olubanja luyorohere kulusha evile eli nk’eyola.
16 “Tala! Namabarhuma nka ntama omu mbwa z’elubala; bobola mube bekenzi nka njoka na mwerukweru nka pijo.*
17 Muchilange abantu, bulala nji babaheka oku barhambo n’okubashurha enkoni omu masinagogi mabo.
18 Nji babaheka n’embere za baguvernere n’abami eju yani yi buba buhamirizi kubo n’oku mashanja.
19 Aliko, amango nji baba bali babasambisa, murhayubahaga omu kushiba mwachibaza bichi mwaderha changwa gurhe mwabiderha, bulala nji mwahabwa ebi mwaderha ahola han’aho;
20 bulala arhali mwenji mwaba muli mwaderha, s’eroho lya Yisho linji lyaba eyi lili lyabaderheramo.
21 Echindi, omuntu nj’ahana mwene-wabo ayirhwe, omulume nj’ahana omwana wage, n’omwana nj’apinga abazere bage n’okubayirhisa.
22 Kandi abantu boshi nji babashomba eju y’ezino lyani, aliko olala nji walembera kugera oku buzinda yi nji wachunguka.
23 Amango bamabatesa mu vile nguma, mulibirhire omu yindi; bulala kweri imbabwirire, nji murhamala kuzunguluka amavile moshi m’omu Izraeli na Mwen’omuntu arhanayinja.
24 “Omwanafunzi arhalushire mwalimu wage, n’omukozi arhalushire nahamwabo.
25 Omwanafunzi akaba nka mwalimu wage, n’omukozi akaba nka nahamwabo. Akaba abantu bayirikire nyin’enju Belzebuli* kangana gurhe barhayirika n’ab’omu mwage ntyo?
26 Bobola murhabayubahaga, bulala ntacho n’echiguma chabishirwe chirhakabishulwa, na nta siri n’enguma erhakamenyikana.
27 Ebi ndi nababwira omu mwizimya, mubiderhe omu mwangaza, n’ebi mwayunvirhe omu mulenge gw’eshishi, mubihubiri eyi muyimangire oku nju elugulu.
28 Kandi murhayubahaga abantu bakayirha omubiri aliko barhakagala kuyirha obugumaguma; si muyubahe owakayirha omubiri n’obugumaguma na byoshi anabikabula omu Chihenama.*
29 Nyunyi ebiri z’ebishwa* zinaguzwa chicheri chiguma ch’akachiro kageke bwenene. Arhali ntyo? Aliko ntayo n’enguma mu zo yakarhogera ahashi Yisho akafunda kumenya.
30 Chiro nenyu, aba ayinji nviri zinga mujira oku rhwe.
31 Che chirhumire murhayubahaga; muli b’akamaro bwenene kulusha bishwa* binene.
32 “Buli yeshi wayemera okw’ali mwanafunzi wani embere z’abantu, nani nji nayemera okw’ali mwanafunzi wani embere za Darha oli omu mbingu.
33 Aliko owandahira embere z’abantu, nani nji namulahira embere za Darha oli omu mbingu.
34 Murhawazaga oku nayinjaga kulerha omurhula oku gulu; nayinjaga kulerha engorho s’arhali omurhula.
35 Bulala nayinjaga kulerha okurhayunvikana ahakagarhi k’omurhabana n’eshe, ahakagarhi k’omunyere na nyina n’ahakagarhi k’omukazi n’omwazana.
36 Kweri, abanzi b’omuntu nji baba b’omu mulala gwage.
37 Owazigira eshe changwa nyina bwenene kundusha arhankwanene; n’owazigira omugala changwa omwali bwenene kundusha arhankwanene.
38 Na buli yeshi orhayemera kuheka omurhi gwage gw’amateso n’okunkulikira arhankwanene.
39 Omuntu yeshi-yeshi walonza kufumya akalamo kage akaheza, aliko owakaheza eju yani nj’akapata.
40 “Owabakaribisa ey’ankaribisize, n’owankaribisize ey’akaribisize owantumaga.
41 Owakaribisa omulebi bulala ali mulebi apata oluhembo l’omulebi, n’owakaribisa omunyakunali bulala ali munyakunali apata oluhembo l’omunyakunali.
42 Omuntu nji waha muguma mw’abala badorho egopo ly’amenji maganyire m’okunywa lyonyine bulala ali mwanafunzi wani, kweri imbabwirire arhakaheza oluhembo lwage.”
