Yayandikwaga na Matayo 11:1-30
11 Yesu amalire kuha banafunzi bage 12 obwerekezi, arhenga ahola aja kuyigiriza n’okuhubiri omu mavile mabo.
2 Aliko oku Yowane anali omu prizo ayunva ebi Yesu aliri ajira, arhuma abanafunzi bage
3 baje kumubaza ntya: “Woyo we walikwanene kuyinja, changwa rhulindire oku hali owindi wachiyinja si?”
4 Yesu abashubiza ntya: “Mugende mubalire Yowane ebi mwayunvirhe n’ebi mwabwene:
5 Empumi zikala zili zabona, ebilema yibyalambagira, abalwere ebibenzi bafumire, ebihuli yibyayunva, abafire yibafuka, n’emyazi minja eli yahubiribwa oku bakene.
6 Obusime buli b’olala orhambwene mw’empanvu yarhuma asirhala.”
7 Abanafunzi ba Yowane babere bagenda, Yesu arhondera kubwira abantu kamama baliri ahola eju ya Yowane: “Bichi mwajaga kulola omu rungu? Olusheke luli lwashaganywa n’omuyaga si?
8 Bichi mwajaga kulola kanuni? Muntu oyambere emyambaro ekwirire si? Bulala, abayambere emyambaro ekwirire baba omu nju z’abami.
9 Omu bukweri bichi byarhumaga mwajayo? Mwajaga kulola omulebi si? Nechi, imbabwirire okw’alushire chiro n’omulebi.
10 Yewe y’olala byaliyandikirwe ntya eju yage: ‘Tala! Narhuma omurhumwa embere zawe, oyola yi waba wakurheganyiza enjira!’
11 Kweri mbabwirire, omu bantu boshi baburhirwe n’abakazi, ntaye wabereho oli mukulu kulusha Yowane Mubatiza, aliko ow’eshishi bwenene omu Bwami bw’embingu ali mukulu kumulusha.
12 Kurhangirira omu siku za Yowane Mubatiza kugera zene, Obwami bw’embingu g’omuhigo abantu bali bachihangana kuhikira, na balala bali bachihangana bali babuhikira.
13 Bulala Abalebi n’Esheriya, balilebere kugera ku Yowane.
14 N’akaba muli tayari kubiyemera, yewe ye ‘Eliya okwanene kuyinja.’
15 Oherhe amarhwiri ayunve.
16 “Inde nakashushanya n’echila chizazi? Chili nka bana bayikere omu soko bali bahamagala bera-babo banasharha nabo,
17 omu kuderha ntya: ‘Rhwabazihire omulizi, aliko murhazinire, rhwalirire bwenene, aliko murhayerekene oku mwayunvirhe akahinda chiro.’
18 Intyo kon’oko, amango Yowane ayinja, arhaliri alya, arhanaliri anywa, aliko abantu baderha: ‘Ali m’omuzimu.’
19 Mwen’omuntu yewe ayinja ey’ali alya n’okunywa, aliko abantu yibaderha mpu ‘Mulole! Ali mudambi, muntu onanywa edivayi bwenene, mwira w’abanalipisa ekoli n’abanyabyaha.’ Aliko obwengehe bunabonekana kugerera ebijiro bili byajirwa.”
20 Nantyo arhondera kukalihira amavile akoleraga mu binene omu bisomerene byage bulala abantu balilamiremo barhaliyerekene oku bahungamire:
21 “Buli buhanya bwawe, Korazini! Buhanya bwawe Betsaida! Bulala nk’ebisomerene byakolerwe emwenyu byakolwaga omu Tiro n’omu Sidoni, abantu balilamiremo barhakalegamire chiro kuhungama, banayambala ebigunira n’okuyikala omu luvu.
22 Kweri imbabwirire, olusiku l’okucha olubanja, abantu b’omu Tiro n’ab’omu Sidoni nji bachibirwa echihano chiyorohere kulusha echenyu.
23 Nawe Kapernaumu, owazize ku byashobokana ozamulwe kugera embingu si? Nanga, wayandagazwa kugera omu Shinda, bulala nk’ebisomerene byakolerwe emwawe byakolwaga e Sodoma hinga echibaho kugera zene.
24 Aliko nkubwirire olusiku l’okucha olubanja, e Sodoma nji yachirwa echihano chiyorohere kulusha echawe.
25 Agola mango Yesu aderha ntya: “Darha, Waliha w’embingu n’egulu, namakukuza omu bantu, bulala wabishire ebila bintu oku bengehe n’abasomi aliko wabibishulira abana badorho.
26 Nechi, Darha we, bulala wabwene oku ntyo k’ojirage.
27 Darha ampere ebintu byoshi, nta muntu oyinji Omugala bwinja olekere Darha; na ntaye oyinji Darha bwinja olekere Omugala, n’olala Omugala alonzeze kumumenyesa.
28 Muyinje emunda ndi mweshi muluhire, muhekere n’emizigo elemerere, nabaluhusya.*
29 Mube banafunzi bani,* munandolereko bulala nyono imba mwirhonzi inamba mwirhohye, nantyo mwayunva mwamaluhuka.
30 Bulala birhakomere okuba mwanafunzi wani,* n’omuzigo gwani guyanguhire kuhekwa.”
