Yayandikwaga na Matayo 15:1-39
15 Naho abandisi n’Abafarisayo barhenga e Yerusalemu, bayinja kulola Yesu bamubaza ntya:
2 “Bulagurhe abanafunzi bawe barhakenga emigenzo y’abantu ba mira? Omufano, barhakalaba efune embere z’okulya.”
3 Omu kubashubiza ababwira ntya: “Bulagurhe munavuna amarhegeko ma Mungu eju y’emigenzo yenyu?
4 Omufano, Mungu aliderhere, ‘okenge yisho na nyoko.’ Ashuba kuderha, ‘buli yeshi wadukanga* eshe changwa nyina akwanene kuyirhwa.’
5 Aliko mwabo munaderha: “Buli yeshi wabwira eshe changwa nyina ntya: ‘Echintu choshi ngwerhe nakakurhaberemo, nalaganyize oku nachiha Mungu,’
6 birhachihemere kw’akenge eshe haba n’akatyu.” Nantyo eju y’emigenzo yenyu, mwarhumire byabonekana okw’echinwa cha Mungu ntacho chimalire.
7 Ego mwe ndyalya mwe, Isaya aliderhere okuli amango aleba ntya oku bibalolere:
8 ‘Abala bantu banankenga oku bunu konyine aliko emirhima yabo eli hale nani.
9 Obuharamye bali bagenderera kumpa buli bwa busha, bulala ebi banayigiriza eba migenzo y’abantu.’”
10 Naho ahamagala abantu kamama baliri ahola ababwira bamuyegere, aderha ntya: “Murhege amarhwiri munayunve bwinja bichi ebi nababwira biderhere:
11 Echajire omu bunu b’omuntu arhali che chinamuzingisa, s’echarhengeremo che chinamuzingisa.”
12 Naho abanafunzi bage bayinja bamubwira: “Omenyere okw’ebinwa Abafarisayo bayunvaga waderha byabagayisize?”
13 Omu kubashubiza aderha ntya: “Buli murhi Darha w’embingu arhapandaga gwashigulwa.
14 Mulekane nabo. Zili mpumi zili zayerekeza abantu. Nk’empumi eli yayerekeza eyindi, bombi barhogera omu chishimu.”
15 Petro amubwira: “Rhufasiriya bwinja ogula mufano.”
16 Yesu aderha: “Kugera bunola nenyu murhaza kuyunva bwinja eb’indi naderha?
17 Murhenji oku buli choshi chinaja omu bunu, chinagera omu nda na buzinda chanahuluka chanaja omu wese?
18 Aliko byoshi birhenga omu bunu binaba eyi bili byarhenga omu murhima, n’ebyola bye binazingisa omuntu.
19 Omufano, omu murhima munarhenga amawazo mabi, obunizi, obugonyi, obubaraga, obwizi, obuhamirizi b’obubeshi, n’ebinwa by’okudukanga* Mungu.
20 Ebyola byebinazingisa omuntu, s’aliko okulya buzira kukalaba efune* ntaye kwakazingisa.”
21 Yesu ava arhenga ahola aja omu teritware ye Tiro n’eye Sidoni.
22 Naho, mukazi muguma wo Mufoyinike wa mw’eyola teritware ayinja aderha ntya n’omulenge gw’enyanya: “Onyunvire obonjo Waliha Mugala wa Daudi. Mwali wani afarhirwe n’omuzimu, ali achiyunva kubi bwenene.”
23 Aliko Yesu arhamushagalaga. Abanafunzi bage barhondera kumubwira: “Bwira oyula mukazi agende bulala ali agenderera kujira olwamo enyuma zerhu.”
24 Yesu ashubiza: “Barhantumaga ku buli yeshi olekere oku ntama z’olubaga lwa Izraeli zaherere.”
25 Aliko oyola mukazi ayinja embere zage, amuyunamira, aderha: “Waliha, ontabale!”
26 Omu kumushubiza Yesu aderha: “Kurhali kwinja okurhola omugati gw’abana n’okugukabula ebibwana by’embwa.”
27 Oyo mukazi aderha: “Nechi Waliha, waderhere okuli. Aliko chiro n’ebibwana by’embwa binalya obuhungumukiza bwarhogere ahashi kurhenga oku meza ga banyinabyo.”
28 Yesu amushubiza: “Mukazi, ogwerhe obwemere bukomere; bibe nk’okolonzeze.” Eyo sa yen’eyola, mwali w’oyola mukazi ava afuma.
29 Yesu arhenga eyola munda ashuba kuja hofi w’enyanja ye Galilaya, ashonera oku musozi ayikala.
30 Naho abantu kamama bayinja emunda ali bamulerhera abantu bahunzize, ebilema, orhuduma, empumi, n’abandi banene balwere, babaheba embere zage anabafumya boshi.
31 Abola bantu kamama basomerwa okubona orhuduma yirhwaderha, abalihunzize bafumire, ebilema yi byalambagira, empumi yizabona, bava bakuza Mungu wa Izraeli.
32 Yesu ahamagala abanafunzi bage ababwira ntya: “Yinayunvira abala bantu obonjo bulala siku esharhu ezila eyi bali haguma nani na ntacho bagwerhe ch’okulya. Intalonzeze oku bagende nzara bulala hali oku bakaholera omu njira.”
33 Aliko abanafunzi bage bamubwira: “Ngahe rhwakula emigati y’okuyugusya abala bantu boshi n’enola munda hali hale n’abantu?”
34 Yesu ayunvirhe ntyo ababwira: “Mugwerhe migati minga?” Bamubwira: “Mushanvu na rhufi rhugeke.”
35 Naho Yesu amalire kubwira abantu bayikale ahashi,
36 arhola eyola migati mushanvu n’obola bufi, asalira abichagulanga, abiha abanafunzi bage, nabo babigabira abola bantu kamama.
37 Boshi balya bayugurha, barhalagula ebichira-chira basigazaga, bayunjuza rhurhanda mushanvu rhuzibuzibu.
38 Abalyaga baliri balume 4 000, buzira kuganja abakazi n’abana.
39 Amalire kusezera abola bantu kamama, agenda omu bwarho, aja omu teritware ye Magadani.
