Yayandikwaga na Matayo 2:1-23
2 Yesu amalire kuburhwa e Betlehemu ye Yudeya omu siku z’omwami Herode, abantu banalagula kugerera enyenyezi* barhengerera engambo z’emashoshokero m’ezuba bayinja e Yerusalemu,
2 baderha ntya: “Ngahe omwami w’Abayahudi waburhirwe ali? Bulala rhwalibwene enyenyezi yage eyi rhuli engambo z’emashoshokero m’ezuba, bobuno rhwayinjire kumuha olukengo.”*
3 Abere ayunva ntyo, mwami Herode n’abantu be Yerusalemu boshi bagera m’omusisi.
4 Ahamagala abakulu b’abadahwa boshi n’abandisi b’abantu, ababaza ngahe Kristu alikwanene kuburhwa.
5 Bamushubiza ntya: “E Betlehemu ye Yudeya, bulala omulebi aliyandikire ntya:
6 ‘Nawe Betlehemu y’omu chihugo che Yuda, orhali vile erhaherhe ech’emalire omu masu ma ba guvernere be Yuda, bulala omurhegesi nji waba mungeri w’abantu bani Izraeli nj’arhenga emwawe.’”
7 Naho oku bwibisho, Herode ahamagala abola bantu banalagula kugerera enyenyezi n’okubabaza mangochi kanuni babonaga eyola nyenyezi yarhengerera.
8 Abarhuma e Betlehemu n’okubabwira: “Mugende mulonze bwinja-bwinja oyola mwana, hano mumubona, mugaluke mumbwire ngahe ali omu kuntu nani inje kumuha olukengo.”
9 Bamalire kuyunva ebi mwami ababwirire, bagenda! Naho elala nyenyezi babonaga eyi bali engambo z’emashoshokero m’ezuba yagenda embere zabo yaja kuyimangira omu chanya ah’oyola mwana aliri.
10 Babere babona eyola nyenyezi, basima bwenene.
11 Baja omu nju, babona oyola mwana haguma na nyina Mariya, bafukama n’okumuyunamira. Bashanula ebintu byabo by’akachiro, bahemba oyola mwana e oro, obubani,* n’amanemane.*
12 Aliko, bulala Mungu alibabwirire kugerera ebilorho oku barhapimaga bagaluka emunda Herode ali, barhola eyindi njira bagaluka omu chihugo chabo.
13 Bamalire kugenda, malayika wa Yehova ava arhengerera Yusufu omu bilorho n’okumubwira ntya: “Yimanga, orhole omwana na nyina mulibirhire e Misri, mubereyo kugera amango nji nababwira mugaluke, bulala Herode ali hofi kulonza oyula mwana y’amuyirha.”
14 Han’aho, Yusufu ava azuka m’obola budufu arhola omwana na nyina balibirhira e Misri.
15 Babera eyola munda kugera amango Herode afaga. Echola chayeneza ebi Yehova aderhaga kugerera omulebi wage waderhaga: “Nahamagere mugala wani arhenge e Misri.”
16 Herode abere abona okw’abola bantu banalagula kugerera enyenyezi bamurhebekere, ayunva oburhe bunene, arhuma abantu baje e Betlehemu n’omu vilaje zili hofi nayo, bayirhe abana boshi b’oburhabana ba myaka ebiri kuja eshishi. Aderhaga ntyo omu kukulikiza akasanzi abola balaguzi bamubwiraga.
17 Naho ebi omulebi Yeremiya aderhaga byayenera:
18 “Omulenge g’okulira n’okubanda endulu nene gwaliyunvikene omu Rama. Raheli oyola waliri alakira abana bage, arhanalilonzeze asiririzwe bulala barhachiliho.”
19 Herode abere afa, malayika wa Yehova arhengerera Yusufu omu bilorho ey’ali e Misri
20 amubwira: “Yimanga, orhole omwana na nyina mugaluke omu chihugo che Izraeli, bulala abaliri balonza kuyirha oyola mwana bafire.”
21 Ava azuka arhola oyola mwana na nyina bagaluka omu chihugo che Izraeli.
22 Aliko, abere ayunva oku Arkelao y’eli warhegeka e Yudeya ahali h’eshe Herode, ayubaha kujayo. N’echindi, bulala Mungu abaga amuhere obwerekezi bw’eby’ajira omu bilorho, aja omu teritware ye Galilaya.
23 Agenda n’okuja kulama omu vile yaliyirikirwe Nazareti, y’eby’aderhwaga n’abalebi biyenera: “Nj’ayirikwa Munyanazareti.”
