Yayandikwaga na Matayo 5:1-48

  • AMAHUBIRI M’OKU MUSOZI (1-48)

    • Yesu amarhondera kuyigiriza oku musozi (1, 2)

    • Bintu mwenda byakalerha obusime (3-12)

    • Omunyu n’omwangaza (13-16)

    • Yesu ayinjaga kuyeneza e Sheriya (17-20)

    • Ehano oku bilolere obukali (21-26), obugonyi (27-30), okushanda obuhya (31, 32), okuhakana (33-37), okuchiholera (38-42), okuzigira abanzi (43-48)

5  Amango abona abantu kamama, ashonera oku musozi; abere amayikala abanafunzi bage bamushimba. 2  Naho arhondera kubayigiriza n’okuderha: 3  “Abagwerhe obusime bali balala barhegerere oku bakenere kuyerekezwa na Mungu, bulala Obwami bw’embingu buli bwabo. 4  “Abagwerhe obusime bali balala bali omu chiliyo bulala nji barhulirizwa. 5  “Abagwerhe obusime bali bantu berhonzi bulala nji bashokola egulu. 6  “Abagwerhe obusime bali balala banaba bali bachifija ehaki ebeho, bulala Mungu nji ayeneza enyorha yabo. 7  “Abagwerhe obusime bali balala bajira olukogo bulala nabo nji babayereka olukogo. 8  “Abagwerhe obusime bali balala barhabika ebintu bibi omu murhima* bulala nji babona Mungu. 9  “Abagwerhe obusime bali balala banajira omurhula bulala nji bayirikwa bagala ba Mungu. 10  “Abagwerhe obusime bali balala bali balibuzwa eju y’okunali, bulala Obwami bw’embingu buli bwabo. 11  “Abagwerhe obusime ali mwabo amango abantu bali babadukanga,* banabalibuza n’okubashwekera ku buli chintu chibi choshi eju yani. 12  Muchishinge munagwarhe obusime bunene bwenene, bulala oluhembo lwenyu luli lunene omu mbingu. Intyo k’onokola kubalilibwize n’abalebi baliriho embere zenyu. 13  “Muli munyu gw’egulu; aliko nk’omunyu gwamaheza obununu bwago, gurhe bwakashuba kugaluka? Intacho gwakachikoleswamo olekere okugukabula embuga y’abantu bagulabarhanga. 14  “Muli mwangaza gw’egulu. Evile eli oku musozi, erhakabishwa. 15  Ey’abantu bakoleza etara, barhalihira omu karhanda, si banalihira oku chinara ch’etara yi likolezeza abantu boshi bali omu nju. 16  Intyo k’on’okola, muleke omwangaza gwenyu gukoleze embere z’abantu, yi babona ebijiro byenyu binja n’okukuza Yisho w’omu mbingu. 17  “Murhawazaga oku nayinjaga kuvuna e Sheriya changwa Abalebi. Intayinjaga kubivuna si nayinjaga kubiyeneza. 18  Kweri mbabwirire, embingu n’egulu byakahera, aliko nta herufi n’enguma chiro yaba ngeke, changwa akatomo k’eherufi kakahera omu Sheriya n’ebintu byoshi biderherwemo birhaza kuyenera. 19  Che chirhumire, omuntu yeshi-yeshi wavuna chiro erhegeko ligeke bwenene mw’amala marhegeko n’okuyigiriza abandi bajire ntyo, aba ey’arhakwanene kuja omu Bwami bw’embingu.* Aliko olala wamakenga n’okumayigiriza abandi, aba ey’akwanene kuja omu Bwami bw’embingu.* 20  Bulala mbabwirire, akaba murhabere banyakunali kulusha Abandisi n’Abafarisayo, murhakaja omu Bwami bw’embingu haba n’akatyu. 21  “Mwayunvirhe ebi babwiraga abantu ba mira: ‘Orhakwanene kuyirha, aliko owayirha akwanene kuhekwa oku tribinale.’ 22  Aliko nyono mbabwirire, omuntu yeshi wagenderera kuyunvira mwene-wabo ebisirani, akwanene kuhekwa oku tribinale; n’omuntu wabwira mwene-wabo ebinwa by’okumusuzagura birhakwanene kuderhwa, akwanene kuhekwa oku tribinale nkulu; aliko omuntu wabwira owabo mpu ‘Oli chinganyi chirhaherhe kamaro,’ akwanene omuliro gwe Chihenama.* 23  “Bobuno nka wamalerha entulo yawe oku mazabahu, ok’onali ahola wanayibuka ok’ogwerhe echibazo na mwene-wenyu, 24  orhange oyileke embere w’amazabahu, ogende orhange ojire omurhula haguma na mwene-wenyu, naho wanagaluka ohane entulo yawe. 25  “Akaba ogwerhe echibazo n’omuntu, oyunvikane naye juba-juba muchili omu njira mwaja oku tribinale, y’arhakusidaka em’omuzuzi, omuzuzi naye akakuhira omu fune z’omulanzi w’etribinale, bakakukabula omu pirizo. 26  Kweri inkubwirire, orhakarhengamo orhanaza kulipa edeni lyoshi kugera oku chicheri chizinda ch’akachiro kageke. 27  “Mwayunvirhe oku byaliderherwe: ‘Orhakwanene kujira obugonyi.’ 28  Aliko nyono mbabwirire, omuntu walolereza omukazi kugera ahachifijiraye, aba eyi mira akolaga obugonyi haguma naye omu murhima gwage. 29  Bobuno nk’elisho lyawe ly’ekulyo lili lyarhuma wagoma, oliyomole olikabule hale nawe. Bulala kuli kwinja oheze chiguma omu birumbu byawe ahali omubiri gwawe goshi gukabulwe omu Chihenama.* 30  Kandi, nk’efune yawe y’ekulyo eli yarhuma wagoma, oyiche oyikabule hale nawe. Bulala kuli kwinja oheze chiguma omu birumbu byawe ahali omubiri gwawe goshi gukabulwe omu Chihenama.* 31  “Olekere nantyo, byaliderherwe ntya: ‘Buli yeshi washanda obuhya na mukage, amuyandikire echemezo ch’okushanda.’ 32  Aliko nyono mbabwirire, omuntu washanda obuhya na mukage eju y’empanvu yoshi-yoshi olekere obugonyi, aba ey’amamuhira omu murhego g’okujira obugonyi. N’omulume washaba omukazi oli nk’oyola aba ey’amajira obugonyi. 33  “Kandi mwayunvirhe oku balibwirire abantu ba Mira: ‘Orhakwanene kuhakana,* na buzinda okafunda kuyeneza ebi waderhere; s’okwanene kuyeneza ebi walaganyize Yehova.’ 34  Aliko nyono mbabwirire: Murhahakanaga* chiro habe kugerera embingu, bulala embingu chili chichumbi ch’obwami cha Mungu; 35  habe kugerera egulu bulala egulu eli fasi y’okuhira amagulu mage; chiro habe kugerera e Yerusalemu, bulala eli vile y’Omwami mukulu. 36  Orhahakanaga kugerera erhwe lyawe, bulala orhakagala kuhindamula chiro luviri lwawe luguma mpu lube l’omweru changwa l’omukara. 37  Muleke ‘Nechi’ wenyu anabage nechi, ‘Nanga’ wenyu anabage nanga, bulala echirhalukire ebyola chirhengerere k’olala mubi. 38  “Mwayunvirhe oku byaliderherwe ntya: ‘Elisho oku lisho n’elinyo oku linyo.’ 39  Aliko nyono mbabwirire, murhalwisaga omuntu mubi, s’omuntu akakushurha echigalo oku rhama ly’ekulyo, wanamuhindamulira n’elindi. 40  Kandi nk’omuntu alonzeze kukuheka oku tribinale y’arhola akanzu kawe, omulekere chiro n’egoti. 41  Kandi nk’omuntu oherhe echeo amakuseza omuhekere omuzigo ku chilometre chiguma, ogende naye ku bilometre bibiri. 42  Omuntu wakuhemere, omuhe. Orhanalahiraga kuhoza omuntu oli walonza k’omuhoze. 43  “Mwayunvirhe oku byaliderherwe ntya: ‘Okwanene kuzigira omuturanyi wawe n’okushomba omwanzi wawe.’ 44  Aliko nyono mbabwirire, mugenderere kuzigira abanzi benyu n’okusalirira abali babalibuza; 45  yi muyerekana oku muli bagala ba Yisho w’omu mbingu bulala yewe anakolezeza ezuba lyage ababi n’abenja, anarhozeza n’envula abanyakunali n’abarhali banyakunali. 46  Bulala mukazigira abanabazigira, luhembo luhe mwakaba mukwanene? Abanalipisa ekoli, arhali ntyo k’on’okola ku banajira si? 47  Na nka mugendere mwalamusa bene-benyu bonyine, eyi chintu chihe chirharhula chijirwa mwajirire? Arhali ntyo ku n’abantu b’amashanja banajira si? 48  Che chirhumire mukwanene kuba bashinganyanya* bulala Yisho w’omu mbingu ali mushinganyanya.

Mahugulo m'efo

^ Ao “baherhe omurhima guchere.”
^ Ao “babajachira.”
^ Ao “ayirikwa mugeke bwenene oku bilolere Obwami bw’embingu.”
^ Ao “ayirikwa mukulu oku bilolere Obwami bw’embingu.”
^ E Chihenama yaliri fasi bagendaga badwikira m’obuchafu embuga w’evile ye Yerusalemu.
^ E Chihenama yaliri fasi bagendaga badwikira m’obuchafu embuga w’evile ye Yerusalemu.
^ E Chihenama yaliri fasi bagendaga badwikira m’obuchafu embuga w’evile ye Yerusalemu.
^ Ao “kulapa.”
^ Ao “Murhalapaga.”
^ Ao “bantu bayenere.”

Copyrights for this publication