Yayandikwaga na Matayo 17:1-27
17 Enyuma wa siku ndarhu, Yesu arhola Petro, Yakobo na Yowane mwene wabo bonyine abaheka oku musozi gulehukire.
2 Ahindamulwa eshusho embere zabo, amalanga mage marhondera kubaraganya nka zuba n’emyambaro yage yayangara* nka mwangaza.
3 Ahola han’aho, Musa na Eliya barhengerera barhondera kuganira naye.
4 Petro abwira Yesu ntya: “Waliha, kuli kwinja okuba hanola. Akaba olonzeze nayumbaka mahema masharhu hanola, elyawe, elya Musa n’elya Eliya.
5 Okw’achili aderha, echichu chiyangere chabashukulira, n’omulenge gwarhengerera mw’echola chichu gwaderha: “Oyula ali Mugala wani, muzigirwa wani, namuyemerere. Mumuyunvirize.”
6 Abanafunzi bayunvirhe ntyo bayubaha bwenene, bafukama bahira amalanga ahashi.
7 Naho Yesu abayegera abahumako ababwira: “Muyumange. Murhayubahaga.”
8 Babere bayinamuka, nta muntu bachibwene olekere Yesu.
9 Oku banali bayandagala barhenga oku musozi, Yesu abakomereza* ntya: “Nta muntu n’omuguma mubwirage oku bilolere echila chibonekezi, kugera amango Mwen’omuntu afuka.”
10 Aliko abanafunzi bamubaza: “Bichi binarhuma abandisi baderha oku bihemere Eliya arhange ayinje?
11 Omu kubashubiza ababwira ntya: “Kweri Eliya ayinja, anakwiza n’ebintu byoshi.
12 Aliko mbabwire oku Eliya ayinjaga mira si barhamurhegeraga banamukolera nk’okubanalonzeze. Intyo kon’oko kubalibuza na Mwen’omuntu.”
13 Naho abanafunzi barhegera okw’ali ababwira oku bilolere Yowane Mubatiza.
14 Babere bagera ah’abantu kamama bali, muntu muguma ayegera Yesu amufukamira, aderha ntya:
15 “Waliha, oyunvire mugala wani obonjo, analwala echichuli* anali achiyunva kubi bwenene. Chinazigana mubanda omu muliro n’omu menji.
16 Nalimulerhere emunda abanafunzi bawe bali aliko barhagalire kumufumya.”
17 Omu kushubiza Yesu aderha ntya: “Ego chizazi chibi chirhanagwerhe bwemere, nagenderera kuba nenyu kugera mangochi? Nagenderera kubalembera kugera mangochi? Mumunderhere.”
18 Yesu akalihira oyola muzimu, arhenga m’oyola musole, ahola han’aho oyo musole afuma.
19 Naho abanafunzi bashimba Yesu ahali bwihunze bamubaza ntya: “Bichi byarhumaga rhurhagala fukuza oyola muzimu?”
20 Ababwira: “Bulala mugwerhe obwemere bugeke. Kweri mbabwirire, nka muherhe obwemere bungana chiro akaburho k’eharadali, mwabwira ogula musozi, ‘Rhenga ahala oje halira,’ gwanagenda, na nta chintu n’echiguma chabagamba.”
21 ——
22 Amango baliri haguma e Galilaya, gamango Yesu abwiraga abanafunzi bage ntya: “Mwen’omuntu alenganywa anahirwa omu fune z’abantu,
23 banamuyirha n’olusiku lwakarharhu anafuka. Abanafunzi bava bagaya bwenene.
24 Bahikire e Kapernaumu, abantu banalipisa ekoli lya drakma ebiri bayegera Petro bamubaza: “Mwalimu wenyu yewe arhalipa ekoli lya drakma ebiri si?”
25 Abashubiza ntya: “Nechi, analilipa.” Aliko Petro abere aja omu nju, Yesu arhanga ganira naye amubaza: “Gurhe owazize Simoni? Bande abami b’egulu banalipisa ekoli n’ebitansi? Ku bagala babo changwa oku benjiira?”
26 Abere aderha: “Oku benjiira,” Yesu amubwira: “B’obukweri obola, bagala babo barhakwanene kulipa ekoli.
27 Aliko yi rhurhabakwaza, ogende oku mashinji okabule esibwe orhole efi y’oburhanzi wafarha, oyibumbule obunu, wabona mw’echicheri che arja* ochirhole oje kundipira nawe ochilipire.”
