Yayandikwaga na Matayo 18:1-35
18 Mw’akola kasanzi abanafunzi bayegera Yesu bamubaza ntya: “Omu bukweri, inde ye mukulu omu Bwami bw’embingu?”
2 Ava arhola omwana mudorho amuyumanza ahagarhi kabo.
3 Naho aderha: “Kweri imbabwirire, nka murhahindamukire mukaba nka bana badorho, murhakafa mwajire omu Bwami bw’embingu.
4 Bobola, omukulu omu Bwami bw’embingu ali olala wachirhohya n’okuba nk’oyula mwana mudorho;
5 na buli yeshi wakaribisa omwana mudorho oli nk’oyula eju y’okukenga ezino lyani, aba ey’ankaribisize nani.
6 Aliko buli yeshi warhuma muguma mw’abala badorho bagwerhe obwemere mu nyono arhenga omu bwemere, kwakaba kwinja bamushwekere omu gosi engashiri enazungulizwa n’epunda, naho banamukabula omu muhengeri gw’enyanja.
7 “Buhanya oku bantu banajira ebijiro binarhuma abandi barhenga omu bwemere. Omu bukweri, ebijiro bili nk’ebyola bikwanene kubaho, aliko buli buhanya ku balala banabijira.
8 Bobola, nk’efune changwa okugulu kwawe kuli kwarhuma wajira echaha; okuche okukabule hale nawe. Kwakaba kwinja opate akalamo k’esiku n’amango, ey’ogwerhe fune nguma changwa kugulu kuguma ahali h’okukabulwa omu muliro gw’esiku n’amango ey’ogwerhe efune zombi n’amagulu mombi.
9 Kandi nk’elisho lyawe lili lyarhuma wajira echaha, oliyomole olikabule hale nawe. Kwakaba kwinja opate akalamo k’esiku n’amango ey’ogwerhe lisho liguma ahali h’okukabulwa omu muliro gwe Chihenama* ey’ogwerhe mesho mabiri.
10 Muchilange murhasuzaguraga chiro muguma mw’abala badorho, bulala imbabwirire oku bamalayika babo bali omu mbingu esiku zoshi banabona amalanga ma Darha oli omu mbingu.
11 ——
12 “Gurhe muwazize? Nk’omuntu aherhe ntama 100, nguma ekahera, arhakaleka ezola 99 oku musozi, akaja kulonza eyola yaherere si?
13 Kweri mbabwirire, amango amayipata, ayisimira bwenene kulusha zila 99 zirhaliherere.
14 Intyo kon’oko, Darha w’omu mbingu arhakasima chiro haba n’omuguma mw’abala badorho akahera.
15 “Olekere nantyo, nka mwene-wenyu amajira echaha, ogende omuyereke egosa lyage* eyi muli mwembiye mwenyine. Akakuyunva eyi wamashuba kupata mwene-wenyu.
16 Akafunda kukuyunva, wanagenda na windi muntu muguma changwa babiri, omu kuntu ebintu biyemezwe bwinja na bahamirizi babiri changwa basharhu.
17 Akanafunda kubayunva, wanabwira echibaga. Akaba arhayunvirhe n’echibaga, omurhole nka muntu w’amashanja, na nka muntu onalipisa ekoli.
18 “Kweri imbabwirire, ebintu byoshi mwafunga oku gulu byaba eyi byafungirwe n’embingu, n’ebintu byoshi mwafungula oku gulu byaba eyi byafungwirwe n’embingu.
19 Kweri kandi imbabwirire, nka babiri mu mwabo bamayunvikana oku baheme omu sala chintu chilebe ch’akamaro, Darha oli omu mbingu abahacho.
20 Bulala nka babiri changwa basharhu bamachigusha haguma omu zino lyani, nani naba ahagarhi kabo.”
21 Naho Petro ayegera Yesu amubaza: “Waliha kanga nkwanene kubabalira mwene-werhu nk’amangoseza? Kugera ku kali mushavu si?”
22 Yesu amushubiza: “Kweri inkubwirire arhali kugera ku kali mushanvu konyine, si kugera ku kali 77.
23 “Che chirhumire imbabwirire, Obwami bw’embingu bwakashushanywa n’omwami walonzaga kujuhusa abakozi bage amadeni balirimo.
24 Amango arhondera kujira ntyo, bamulerhera omulume waliri omu deni lyage lya talanta* 10 000.
25 Bulala oyola muja arhaligwerhe obuhashe b’okujuha elyola deni, nahamwabo aderha oku bamuguze, baguze na mukage, abana, n’ebikulo byage byoshi y’alijuha.
26 Naho oyola muja afukama embere zage, amuyunamira n’okumubwira: “Ondembere wekalamawe, nakujuha ebintu byawe byoshi.”
27 Nahamwabo amuyunvira obonjo, amulikula ashanda n’edeni lyage lyoshi!
28 Aliko oyola muja arhengere ahola abuganana n’owabo muja waliri omu deni lyage lya dinari 100. Amufarha, arhondera kumuniguza n’okumubwira, ‘onjuhe ebyani byoshi ogwerhe.’
29 Oyola wabo muja afukama arhondera kumulakirira n’okuderha: “Ondembere wekalamawe, nakujuha edeni lyawe.”
30 Aliko arhayemeraga, aderha okw’akabulwe omu prizo kugera amango nj’amujuha.
31 Amango ababo baja babona ntyo bagaya bwenene, bagenda babalira nahamwabo byoshi byabere.
32 Nahamwabo amuhamagala n’okumubwira: ‘Ego muja mubi, nalishandire edeni lyawe lyoshi amango wampemaga obonjo.
33 Bulagurhe woyo orhakababalire owenyu muja nk’oku nani nakubabaliraga?’
34 Naho nahamwabo akaliha bwenene, amuhirisa omu prizo kugera ahajuhira edeni lyage lyoshi.
35 Intyo kon’okola ku Darha w’embingu nj’abajirira akaba buli muguma wenyu arhababalire mwene-wabo n’omurhima goshi.”
