Yayandikwaga na Matayo 7:1-29
7 “Muleke kuchira abandi olubanja yi nenyu nji barhabachira olubanja;
2 bulala olubanja mwachira abandi lu nenyu nji babachira, n’omulengo mwalengera mw’abandi gu nenyu nji banabalengeramo.
3 Bulagurhe wakabona ehirhi hili omu lisho lya mwene-wenyu, aliko ey’orhabona echisinde chili omu lisho lyawe?
4 Changwa, gurhe wakabwira mwene-wenyu mpu ‘leka inkukule akarhi kali omu lisho lyawe,’ n’obola ogwerhe echisinde omu lyawe?
5 Ego we ndyalya we! Orhang’okule echisinde chili omu lisho lyawe, y’obona bwinja gurhe wakula akarhi kali omu lisho lya mwene-wenyu.
6 “Murhahaga embwa echintu chichesibwa murhanakabulaga amagerha menyu m’akachiro embere z’engulube, bulala zakamazinanga na buzinda zanahindamuka zanabasheshanyula.
7 “Mugenderere kuhema, babaha; mugenderere kulonza, mwapata; mugenderere kukongorha, babachingulira;
8 bulala buli yeshi onahema anahabwa, buli yeshi onalonza anapata, na buli yeshi onakongorha oku mulyango anachingulirwa.
9 Inde mu mwewe, omwana wage akahema omugati anamuha ebale?
10 Changwa nk’amuhemere efi, arhakamuha enjoka. Arhali ntyo?
11 Bobola, akaba mwabo, chiro akaba oku muli bantu babi, muyinji kuha abana benyu ebintu binja, sasa si Yisho w’embingu yi wakaja afunda kuhana ebintu binja oku bamuhemerebyo!
12 “Che chirhumire, ebintu byoshi mwakasima abantu babakolere, nenyu mukwanene kubakolera byo. Omu bukweri, ebyola bye biyigirizwe omu Sheriya n’Abalebi.
13 “Mugerere omu mulyango gugeke, bulala omulyango guzibu-zibu n’ebarabara ligalihire liganire ewa kuharibiswa, na bantu banene babali baligeramo;
14 aliko omulyango gugeke n’ebarabara liganire ewa kalamo ligehere, na bantu bageke babali balibona.
15 “Muchilange n’abalebi b’obubeshi banayinja emunda muli eyi bayambere oluhu lw’entama, aliko omu ndani eyi bali nka mbwa z’elubala zikalihire.
16 Mwabarhegera kugerera ebijiro byabo. Abantu barhakaja kushalula emizabibu oku murhi gw’enkeleri, changwa amatunda m’etini oku bishaki-shaki. Arhali ntyo si?
17 Intyo kon’okola, buli murhi gwinja gunayana amatunda menja, aliko buli murhi gubi gunayana amatunda mabihire.
18 Omurhi gwinja gurhakayana amatunda mabi, n’omurhi gubi gurhakayana amatunda menja.
19 Buli murhi gurhayana amatunda menja gunachibwa n’okukabulwa omu muliro.
20 Kweri, mwarhegera abola bantu kugerera ebijiro byabo.
21 “Arhali buli yeshi oli wambwira, ‘Waliha, Waliha,’ yi nji waja omu Bwami bw’embingu, s’olala oli wajira obulonza bwa Darha oli omu mbingu yi nji wajamo.
22 Agola mango bantu banene nji bambwira: ‘Waliha, Waliha, rhurhalebaga omu zino lyawe, rhwafukuza abazimu omu zino lyawe n’okuyeneza ebisomerene binene omu zino lyawe si?’
23 Naho nji nababwira: ‘Intachigeraga nabamenya haba n’akatyu! Murhenge embere zani, mwabo banyankola maligo!’
24 “Oli wayunviriza ebinwa byani n’okubikolesa, aba nka muntu wakolesaga obwenge ayumbaka enju yage oku bale.
25 Naho envula nene yarhoga, yalerha emisuka n’echiyaga chayinja chashurha eyola nju, aliko erhashandukaga bulala omusinji gwayo gwaliyumbakirwe oku bale.
26 Oku bwindi, buli muntu yeshi-yeshi wayunviriza ebinwa byani aliko akafunda kubikolesa, aba nka chihwinja chayumbakakaga enju yacho oku muchanga.
27 Naho envula nene yarhoga, yalerha emisuka n’echiyaga chayinja chashurha eyola nju, yagwa n’okushanduka yoshi-yoshi.”
28 Yesu amalire kuderha ebyola binwa, abantu kamama baliri bamuyunviriza basomerwa bwenene n’okuntu aliri ayigiriza,
29 bulala aliri abayigiriza nka muntu oherhe oburhwali, s’arhali kuguma n’abandisi babo.
