Yayandikwaga na Matayo 22:1-46
22 Amandi mango Yesu aganira n’abantu omu kukolesa emifano, aderha:
2 “Obwami bw’embingu bwakashushanywa n’omwami wajiraga efete y’obuhya b’omugala.
3 Arhuma abakozi bage baje kuhamagala abalihamagerwe oku fete y’obuhya, aliko barhayemeraga bayinja.
4 Arhuma abandi bakozi aderha, ‘Mubwire abalihamagerwe: “Mulole! Narheganyize ebilyo, nabagire enka n’ebindi birhungano bishishire, ebintu byoshi bili tayari. Muyinje oku fete y’obuhya.”’
5 Aliko barhashibaga balaga chiro bachigendera, baguma bachijira omu mashwa mabo, abandi omu buchuruzi bwabo;
6 aliko abandi bafarha abola bakozi babakolera kubi bwenene n’okubayirha.
7 “Mwami akaliha bwenene arhuma abasoda bage, bayirha abola bantu bayirhaga abakozi bage badwika n’evile yabo.
8 Ava abwira abakozi bage, ‘Efete y’obuhya eli tayari, aliko abalihamagerwe babonekene oku barhakwanene.
9 Che chirhumire, mugende omu mabarabara marhengerere omu vile, muhamagale abantu boshi mwakabona bayinje oku fete y’obuhya.’
10 Abola bakozi bage bagenda, bahamagala boshi babwene omu mabarabara, abenja n’ababi. Echumbi ly’efete lyayunjula mw’abantu baliri balya.
11 “Mwami abere ayinja kulola abageni, abona omuntu orhayambere omwambaro g’obuhya.
12 Amubwira, ‘Muzawe, gurhe wajaga munola orhanayambere omwambaro g’obuhya?’ Oyola muntu arhabonaga ech’akaderha.
13 Mwami abwira abakozi bage, ‘Mumushweke amaboko n’amagulu mumukabule embuga omu mwizimya. Eyola munda y’alirira* n’okuhekenyera y’amenyo.’
14 “Bulala abahamagerwe bali banene si bageke babachishogerwe.”
15 Kisha Abafarisayo baja kupatana gurhe bakafarhisa Yesu omu binwa byage.
16 Bobola, barhuma abanafunzi babo haguma n’abantu b’omu chama cha Herode emunda Yesu ali, baderha: “Mwalimu, rhuyinji ok’onaderha obukweri n’eby’onayigiriza oku bilolere Mungu biba by’obukweri, orhanajira ebintu mpu y’abantu bakuyemera, bulala orhalola eshusho ly’abantu.
17 Orhubwirage lero, gurhe owazize? Kuli kwinja okulipa ekoli lya Kayizari changwa nanga?”
18 Aliko omu kuba amenyere obubi bwabo, Yesu aderha: “Ego mwe ndyalya mwe, bulagurhe mulonzeze kuntega?
19 Munyereke echicheri ch’okulipa ekoli.” Bamulerhera edinari.
20 Ababaza: “Enola foto na gunola mwandiko bili bya nde?”
21 Baderha: “Bya Kayizari.” Naye abashubiza: “Che chirhumire, ebintu bya Kayizari mubihe Kayizari, aliko ebya Mungu mubihe Mungu.”
22 Bayunvirhe ntyo basomerwa, bamuleka bagenda.
23 Olola lusiku, Abasadukayo baliri baderha ok’obufuke burhakabaho, bayinja babaza Yesu:
24 “Mwalimu, Musa aliderhere ntya: ‘Nk’omulume amafa buzira kuburha omwana, mwene-wabo akwanene kushaba mukage y’amuburha kw’abana baba luburho lwa mukulu wage.’
25 Sasa haliri balume mushanvu ba nda nguma. Ow’oburhanzi arhola omukazi, afa ey’arhaburhire omwana, mudorho wage arhola oyo mukazi.
26 Byaba intyo kon’okola oku wa kabiri, oku wa kasharhu, kugera n’oku wa mushanvu.
27 Buzinda oyola mukazi naye afa.
28 Bobuno, amango m’obufuke nj’aba wa nde mw’abola mushanvu? Bulala boshi balimurholere.”
29 Yesu abashubiza: “Mwachirhebekere, bulala murhenji Amandiko murhenji n’emisi ya Mungu;
30 bulala amango m’obufuke abalume barhakashaba n’abakazi barhakashabwa, si nji baba nka bamalayika b’omu mbingu.
31 Oku bilolere obufuke bw’abafire, murhasaga kusoma ebi Mungu ababwiraga amango aderha ntya:
32 ‘Indi Mungu wa Abrahamu, Mungu wa Isaka, Mungu wa Yakobo’? Arhaba Mungu w’abafire si w’abazene.”
33 Omu kuyunva ntyo, abantu kamama basomerwa bwenene n’okuntu aliri ayigiriza.
34 Abafarisayo babere bayunva oku Yesu asizize chiro n’Abasadukayo, bachiheba haguma bayinja kumulola.
35 Muguma mubo waliyinji e Sheriya bwenene amurhega omu kumubaza ntya:
36 “Mwalimu, erhegeko likulu omu Sheriya lili lihe?”
37 Amubwira: “‘Okwanene kuzigira Yehova Mungu wawe n’omurhima gwawe goshi, n’obugumaguma bwawe boshi, n’obwenge bwawe boshi.’
38 Elyola ly’erhegeko likulu kulusha moshi lye na ly’oburhanzi.
39 Elya kabiri linali nk’elyola lye linola: ‘Okwanene kuzigira omuturanyi wawe nk’ok’ochizigira.’
40 E Sheriya yoshi n’Abalebi biyumangire kw’amola marhegeko mabiri.”
41 Bulala Abafarisayo balibuganene haguma Yesu ababaza:
42 “Gurhe muwazize oku bilolere Kristu? Ali mugala wa nde?” Bamubwira: “Mugala wa Daudi.”
43 Ababaza: “Bulagurhe si Daudi omu kufuherwa n’eroho ajaga amuyirika Waliha, amango aderha,
44 ‘Yehova abwira Waliha wani: “Yikala ewa kuboko kwani k’okulyo kugera amango nahira abanzi bawe eshishi w’ebishando byawe”’?
45 Obola Daudi alimuyirikire Waliha, gurhe akaja aba mugala?”
46 Inta muntu n’omuguma wabwene echinwa akamushubiza chiro. Kurhangira agola mango na kugenderera ntaye wachipimire kumubaza echibazo.
Mahugulo m'efo
^ Ao “y’alakira.”
