Yayandikwaga na Matayo 24:1-51
24 Yesu abere arhenga omu hekalu, abanafunzi bage bamuyegera bamuyereka okuntu enju z’ehekalu ziyumbakirwe.
2 Yesu ababwira: “Mubwene ebila bintu byoshi? Kweri imbabwirire, inta bale lyayorha lifarhire oku lindi buzira kuhonongolwa.”
3 Yesu abere ayikere oku Musozi gwe Mizeyituni, abanafunzi bamuyegera bwihunze, baderha: “Orhubwire, mangochi ebila bintu byaba, na bichi nji byaba chimenyeso ch’okubaho kwawe, n’obuzinda bw’elila gulu?”
4 Yesu abashubiza ntya: “Muchilange, nta muntu obarhebekage,
5 bulala banene nji bayinja omu zino lyani, n’okuderha, ‘Nyono nye Kristu,’ nji bahabusa na bantu banene.
6 Nji mwayunva evita, n’emyazi y’evita yaderhwa; nji murhayubahaga bwenene, bulala ebyola bikwanene birhange bibe aliko eyi burhanaza kuba buzinda.
7 “Bulala eshanja nji lyayimanga lyanalwisa elindi shanja, n’obwami bwanalwisa obwindi bwami, nji haba nzara nene, n’emisisi hantu oku handi.
8 Ebyola byoshi nji gwaba murhondero gw’amalibuko makomere.
9 “Abantu nji babalibuza n’okubayirha, n’amashanja moshi nji mabashomba eju y’ezino lyani.
10 N’echindi, banene nji baleka obwemere, nji balenganyana n’okuyangana.
11 Nji harhengerera balebi banene b’obubeshi nji baheza na banene;
12 na bulala obubi nji bwagenderera kuluga, obuzigire bwa banene nji bwahola.
13 Aliko olala nji walembera kugera oku buzinda yi nji wachunguka.
14 N’eyila myazi minja y’Obwami nji yahubiribwa omu gulu lyoshi abantu balamireko, yi buba buhamirizi oku mashanja moshi, naho obuzinda bwanayinja.
15 “Hano nji mubona echintu chishologoseze ch’okuharabisa chiyimangire ahachesibwa nk’ok’omulebi Daniyeli aderhaga (oli wasoma achirhegereze),
16 agola mango aba nji baba omu Yudeya, nji barhondere kubungira oku misozi.
17 Omuntu nji waba ali elugulu w’enju* yage, nji arhayandagalaga mpu aja kurhola echintu omu nju,
18 N’ow’inji waba ali omu shwa nj’arhafulukaga mpu aja kurhola emyambaro yage.
19 Buli buhanya oku bakazi nji baba bali bukule n’abali bayonsya mw’agola mango!
20 Mugenderere kusalira omu kuntu amango nji mwabunga, nji chirhabaga chihe ch’emboho nene, changwa olusiku lwe Sabato;
21 Bulala agola mango nji haba amalibuko makulu marhasaga kubaho kurhenga egulu lilemwa, marhakanachibaho chiro.
22 Omu bukweri nka Mungu arhagehyaga kw’ezola siku ntaye n’omuguma wakachungukire. Aliko eju ya balala bachishogerwe, ezola siku nji zapunguzwako.
23 “Nka hali omuntu obabwirire mpu ‘Mulole! Kristu ali hanola,’ changwa ‘Ali halira,’ murhabiyemeraga.
24 Bulala nji hayinja bantu baguma bali bachiyirika mpu ‘Nyono nye Kristu’ n’abalebi banene b’obubeshi nji barhengerera, banajira ebisomerene na bintu binene bisomeze yi bahabusa abantu, nka bigalikene chiro na balala bachishogerwe.
25 Tala! Nabere nababwira embere.
26 Nk’abantu bababwirire mpu ‘Kristu ali omu rungu,’ nji murhayemeraga mwajayo, changwa mpu ‘Mulole! Ali omu nju,’ nji murhabiyemeraga.
27 Bulala okubaho kwa Mwen’omuntu nji kwaba nka kulala omubaraganyo gunarhenga emashoshokero m’ezuba kugera emazikiro.
28 Buli hoshi omufu nji gwaba gulyamire, ha barubaka nji bachigusha.
29 “Ahola han’aho, enyuma w’amalibuko m’ezola siku, ezuba nji lyaba mwizimya, omwezi nji gurhakoleza, n’enyenyezi nji zarhoga kurhenga embingu. Ebintu by’embingu nji byashaganywa.
30 Echimenyeso cha Mwen’omuntu nji chabonekana omu mbingu, n’abantu ba buli buko oku gulu nji bagwarha kahinda kanene, nji babona na Mwen’omuntu ayinjire omu bichu* ey’agwerhe emisi na bukuze bunene.
31 Kandi nj’arhuma bamalayika bage n’omulenge gunene gw’empanda, nji banagusha abachishogerwe kurhenga ku nyunda ene z’egulu, na kurhenga oku murhambira gw’embingu kugera oku gwindi.
32 “Muchiyigirize kugerera omurhi gw’etini: Amango amarhabi mago mamashisha n’okurhondera kushoga, aho han’ahola munamenya kw’echanda chili hofi.
33 Intyo k’on’okola amango nji mwabona ebila bintu byoshi, mwanamenya kw’ali hofi; nechi, akala ayumangire oku mulyango.
34 Kweri mbabwirire echila chizazi chirhakahwa n’ebila bintu byoshi birhaza kurhengerera.
35 Embingu n’egulu byahirigirha aliko ebinwa byani birhakafa byahirigirhire haba n’akatyu.
36 “Oku bilolere olola lusiku n’esa, eyi bamalayika b’omu mbingu ey’Omugala, ntaye obimenyere olekere Darha yenyine.
37 Okubaho kwa Mwen’omuntu nji kwaba nk’oku byaliri omu siku za Nowa.
38 Bulala nk’oku byaliri embere we Chihonzi, abantu baliri balya n’okunywa, abalume baliri bashaba n’abakazi banashabwa, kugera amango Nowa ajaga omu Safina
39 ntacho byanababwirire; nantyo Echihonzi chayinja chabahyagira boshi. Intyo kon’okola ku n’okubaho kwa Mwen’omuntu nji kwaba.
40 Balume babiri nji baba bali omu shwa, muguma anahekwa owindi analekwa.
41 Bakazi babiri nji baba bali basyera ku lusyo luguma; muguma anahekwa owindi analekwa.
42 Mugenderere kuba masu bulala murhamenyere olusiku Nahamwenyu ayinja.
43 “Nka nyin’enju amenyere omwizi ayinja sa zinga z’ebudufu, akayorha azene ey’arhayemera enju yage yarhulwa.
44 Che chirhumire nenyu mube tayari, bulala Mwen’omuntu nj’ayinja oku sa murhaliwazize chiro.
45 “Omu bukweri inde ye muja mwimana onakengukire* nahamwabo ashingize abakozi b’omu mwage, abahe ebiryo byabo oku kasanzi kakwanene?
46 Obusime buli b’oyola muja akaba amango nahamwabo ayinja, amubugana ali ajira ntyo!
47 Kweri mbabwirire nj’amushingiza ebikulo byage byoshi.
48 Aliko nk’oyola muja abere mubi akachibwira omu murhima, ‘Nahamwerhu alegamire,’
49 Akarhondera kushurha ababo baja, n’okulya n’okunywa haguma n’abarhamizi,*
50 Nahamwabo nj’ayinja omu lusiku arhaliwazize n’omu sa arhamenyere,
51 anamuhana bwenene n’okumuhira haguma n’endyalya. Eyola munda yi nj’alirira n’okuhekenyera y’amenyo.
