Yayandikwaga na Matayo 26:1-75
-
Abadahwa bamapanga okuntu bayirha Yesu (1-5)
-
Okusheshera Yesu kw’amarashi (6-13)
-
Epasaka y’obuzinda n’okulenganywa (14-25)
-
Okurhonderesa Ebilyo by’Egolo bya Waliha (26-30)
-
Yesu amaba aderha okuntu Petro amuhakana (31-35)
-
Yesu ali asalira e Getsemane (36-46)
-
Okufarha Yesu (47-56)
-
Yesu ali asamba embere we Sanendrini (57-68)
-
Petro amahakana Yesu (69-75)
26 Yesu amalire kuderha ebyola byoshi, abwira abanafunzi bage ntya:
2 “Muyinji oku hayorha siku ebiri e Pasaka yanaba, na Mwen’omuntu ahaanwa banamumanika oku murhi gw’amateso.”
3 Abakulu b’abadahwa n’abashamuka bajira embuganano omu mbuga y’omudahwa mukulu waliyirikirwe Kayafa.
4 Bajiira Yesu enama y’okuntu bamufarha omu mayeri n’okumuyirha.
5 Aliko baliri baderha: “Rhurhajiraga ntyo amango m’olusiku lukulu, y’abantu barhakaliha.”*
6 Amango Yesu aliri e Betaniya omu nju ya Simoni walilwere ebibenzi,
7 mukazi muguma waliherhe esupa ly’alabasta lyaliri mw’amarashi ma beyi linene bwenene, orhondera kusheshera amola marashi oku rhwe lya Yesu, eyi Yesu y’alya.
8 Abanafunzi bage babwene ntyo, balunduma n’okuderha ntya: “Gurhe amala marashi makafiswa busha ntya?
9 Bulala makaguzizwe furanga zinene zanarhabala abakene.”
10 Yesu amenyere ebi bali baderha ababaza ntya: “Bichi yi mwahola oyula mukazi? Ankolere echintu chinja.
11 Bulala esiku zoshi mwaba n’abakene aliko nyono murhagenderera kuba nani.
12 Amango ashesheraga amarashi oku mubiri gwani, aliri arheganya okuhambwa kwani.
13 Kweri imbabwirire, buli hoshi emyazi minja ya hubiribwa, echijiro chinja oyula mukazi ajirire, nacho nji chaderhwa omu kumuyibuka.”
14 Muguma mu balala 12 waliyirikirwe Yuda Iskariyote, aja kulola abakulu b’abadahwa
15 ababwira: “Bichi mwampa y’imbageza kuye? Bayunvikana bicheri 30 bye arja.
16 Kurhonderera ahola, agenderera kulonza akasanzi kenja k’okumulenganya.
17 Oku lusiku lurhanzi lwe Migati Erhali mu Levire,* abanafunzi bage bayinja bamubaza: “Ngahe olonzeze rhujage kukurheganyiza ebilyo bye Pasaka?”
18 Abashubiza: “Mugende omu vile emwa lebe, mumubwire: ‘Akasanzi kani karheganyizwe kali hofi. Omu mwawe munajirira e Pasaka haguma n’abanafunzi bani.’”
19 Abanafunzi bajira nk’oku Yesu anababwiraga baja kurheganya e Pasaka.
20 Egolo lyabere, aj’oku meza haguma na balala abanafunzi 12.
21 Oku banali balya, Yesu aderha: “Kweri imbabwirire, muguma mu mwabo andenganya.”
22 Bayunvirhe ntyo, bagaya bwenene. Buli muguma arhondera kumubwira ntya: “Waliha, arhali nyono. Ingo?”
23 Omu kushubiza Yesu aderha: “Ohebere efune haguma nani omu bakuli yiwandeganya.
24 Kweri Mwen’omuntu akala kuchigendera, nka kulala biyandikirwe oku bimulolere, aliko buli buhanya k’olala wamulenganya. Kwakabere kwinja oyola muntu arhashibaga aburhwa.”
25 Yuda waliri hofi kumulenganya aderha: “Mwalimu,* nyono si?” Yesu amushubiza: “Woyo wenyine waderhereko.”
26 Oku banali bagenderera kulya Yesu arhola omugati, amalire kusalira omu kugugisha, aguchagulanga aguha abanafunzi bage aderha: “Murhole mulye. Ogula gushushanyize omubiri gwani.”
27 Kandi arhola n’echikombe asalira n’okubahacho aderha: “Mweshi munywe oku divayi elimo,
28 bulala eshushanyize ‘eshagama yani y’endagano’ yasheshwa eju y’abantu banene yi bababalirwa ebyaha.
29 Aliko mbabwirire, intakachinywa haba n’akatyu kw’eyila divayi y’omuzabibu kugera amango nayinywa haguma nenyu ey’ekala mpyahya omu Bwami bwa Darha.”
30 Buzinda bamalire kuyimpa enyimpo z’okusingiza Mungu, barhenga ahola baja oku Musozi gwe Mizeyituni.
31 Naho Yesu ababwira: “Mweshi mwagoma eju y’ebyampikira mu bunola budufu, bulala biyandikirwe: ‘Nji nashurha omungeri n’entama z’echishumba zanashandala eyi n’eyi.’
32 Aliko hanola nji nfuka nji nabarhanga e Galilaya.”
33 Omu kumushubiza Petro aderha: “Chiro abandi boshi bagoma eju y’ebyakuhikira, nyono ntagoma haba n’akatyu!”
34 Yesu aderha: “Kweri inkubwirire, omu budufu bwa zene embere oluhazi lubike, wampakana turu esharhu.”
35 Petro aderha: “Chiro byahema oku nfe haguma nawe, intakuhakana haba n’akatyu.” Abandi banafunzi boshi baderha ntyo kon’okola.
36 Yesu ava agenda nabo efasi yaliyirikirwe Getsemane, abwira abanafunzi ntya: “Muyikale ahala, oku naja halira mbere kusalira.”
37 Arhola Petro na bagala babiri ba Zebedayo agenda nabo, arhondera kuchiyunva kubi bwenene n’okuyunva mugayo gunene bwenene.
38 Ababwira: “Inchiyunvirhe kubi bwenene kugera chiro aha nakafira. Muyikale ahala, munagenderere kutarama haguma nani.”
39 Ashegera embere bugeke, ayunama kugeza amalanga ahashi, asalira: “Darha, akaba byakashobokana, oleke echila chikombe chije hale nani, aliko arhali obulonza bwani s’obulonza bwawe bobubage.”
40 Agaluka emunda abanafunzi bali abugana bajire ero, abwira Petro: “Murhagalire kugenderera kutarama nani chiro sa nguma yonyine?
41 Mugenderere kutarama munasalire buzira kuleka yi murharhogera omu chigeregezo. Kweri omurhima gulonzeze aliko omubiri guzambire.”
42 Ashuba kugenda obwa kabiri asalira ntya: “Darha, akaba birhashobokana echila chikombe chigere intanachinywere, leka obulonza bwawe bujirike.”
43 Agalukire ashuba kubugana balyamire bulala babaga bayunvirhe ero linene.
44 Abaleka agenda eturu ya kasharhu n’okusalira aderha bila binwa byenabila.
45 Naho agaluka emunda abanafunzi bali ababwira: “Baza we! Omu kasanzi kali nk’akala mwabo yi mwalyama n’okuhumuka? Akasanzi Mwen’omuntu alenganywa omu fune z’abanyabyaha kali hofi.
46 Muyumange rhugende. Mulole! Omulenganyi wani ayinjire.”
47 Okw’anachili aderha Yuda muguma mu balala 12 ayinja n’abantu kamama bagwerhe engorho n’ebibando, eyi barhumirwe n’abakulu b’abadahwa n’abashamuka.
48 Omulenganyi wage abaga abanyoshere echimenyeso akolesa, ababwira: “Eyi ndeke naha ebize, eyi y’oyola; mumufarhe.”
49 Agenda bwinja-bwinja agera aha Yesu ali aderha: “Mahyo Mwalimu!”* Amuha ebize n’obwironzi boshi.
50 Aliko Yesu amubwira: “Muza we, bichi oyinjire kujira hanola?” Bava bamufarha n’okumushweka.
51 Muguma mu balala baliri na Yesu achomola engorho yage ayishurha omukozi w’omudahwa mukulu, amucha okurhwiri.
52 Yesu ava amubwira: “Galula engorho yawe oku fasi yayo. Bulala boshi banayirha n’engorho nabo nji bayirhwa n’engorho.
53 Changwa si, owazize ku nkala nalonza, intakahema Darha antumire bonabuno-bonabuno lejiyoni 12 za bamalayika?
54 Aliko nkanjirire ntyo gurhe amandiko maderhere okw’ebila bintu bikwanene kurhengerera makaja mayenera?”
55 Ahola han’aho Yesu abwira abola bantu kamama bayinjaga kumufarha: “Muyinjire kunfarha n’engorho n’ebibando wamenya nka ndi chishambo? Esiku zoshi naliri naba nyikere omu hekalu ey’indi nayigiriza, aliko murhanfarhaga n’okunshweka.
56 Aliko ebila byoshi byamaba y’amandiko m’abalebi mayenera.” Abanafunzi boshi bava balibirha bamuleka.
57 Abayinjaga kufarha Yesu, bamuheka em’omudahwa mukulu Kayafa emunda abandisi n’abashamuka babaga babuganene.
58 Aliko Petro agenderera kumukulikira ey’anali hale, kugera omu mbuga y’omudahwa mukulu. Amalire kujamo ayikala haguma n’abakozi y’abona gurhe ebintu byaba.
59 Abakulu b’abadahwa n’abashamuka b’omu Sanendrini* boshi, baliri balonza obuhamirizi b’obubeshi bakashwekera ku Yesu yi bamuyirha.
60 Aliko ntabo n’obuguma babwene chiro akaba oku haliri bantu banene baliri bahamiriza obubeshi. Buzinda hayinja bahamirizi babiri
61 baderha: “Oyula muntu aliderhere ntya: ‘Nakashanda ehekalu lya Mungu na musiku esharhu nanaliyumbaka.’”
62 Omudahwa mukulu ayunvirhe ntyo, ayumanga abaza Yesu ntya: “Oku wasirire! Ntacho waderha kw’ebila abala balume bakusidakire?”
63 Aliko Yesu ayorha asirire. Omudahwa mukulu ava amubwira: “Ohakane embere za Mungu olamire orhubwire akaba woyo we Kristu Mugala wa Mungu!”
64 Yesu amushubiza: “Woyo wenyine waderhereko. Aliko imbabwirire, kurhengerera zene nji mwabona Mwen’omuntu ayikere ewa kuboko k’okulyo k’olala ogwerhe obuhashe, nji mwanamubona ayinja omu bichu by’embingu.”
65 Omudahwa mukulu asheshanyula omwambaro gwage aderha ntya: “Adukangire* Mungu! Hali abandi bahamirizi rhuchikenere si? Berhu we! Mwachiyunvirhire mwenyine gurhe adukanga Mungu.
66 Gurhe mubwene?” Bashubiza: “Akwanene afe.”
67 Bava bamuchira omu masu bamushurha n’engumi. Abandi bamushurha ebigalo omu masu
68 n’okuderha: “Mpu we Kristu; lebaga orhubwire inde okushurhire?”
69 Bulala Petro aliyikere omu mbuga, mujakazi muguma ayinja embere zage amubwira: “Nawe waliri haguma na Yesu we Galilaya!”
70 Aliko Petro ahakana embere z’abantu boshi, aderha: “Intenji chiro bichi olonzeze kuderha.”
71 Abere yaja ewa mulyango g’olupango, owindi mujakazi amulangira abwira abaliri ahola: “Oyula mulume aliri na Yesu we Nazareti.”
72 Kandi alahira n’okuhakana: “Intenji oyola muntu!”
73 Enyuma wa kasanzi kageke, abaliyumangire aha burhambi babwira Petro ntya: “Buli bukweri nawe oli mwanafunzi wa Yesu, n’okuntu oli waderha konyine kuyerekene ok’oli Munyagalilaya.”
74 Arhonderha kulahira n’okuhakana: “Intenji oyola mulume!” Ahola han’aho oluhazi lwabika.
75 Petro ayibuka ebi Yesu abaga aderhere: “Embere oluhazi lubike, wandahira kasharhu.” Ava ahuluka, aj’embuga w’olupango arhondera kulira na kahinda kanene.
