Yayandikwaga na Matayo 20:1-34
20 “Bulala Obwami bw’embingu buli nka nyin’eshwa muguma wagendaga esezi-sezi kulonza abakozi bakola omu shwa lyage ly’emizabibu.
2 Amalire kuyunvikana n’abola bakozi kw’abalipa dinari nguma oku lusiku, abarhuma omu shwa lyage ly’emizabibu.
3 Ashuba kugenda eyi zikala hofi isa esharhu ntya, abona abandi barhaherhe kasi bayumangire omu soko,
4 ababwira, ‘Nenyu mugende muje omu shwa lyani ly’emizabibu nabaha omushahara gukwanene.’
5 Nabo bagenda. Kandi ashuba kugenda hofi midi ntya na sa mwenda, ashuba kujira okola kon’oko.
6 Buzinda eyi zikala hofi isa kumi na nguma, ashuba kugenda abona abandi bayumangire ahola ababaza, ‘Gurhe mwakayorha muyumangire ahala ezuba lyoshi na ntacho muli mwakola?’
7 Bamushubiza, ‘Bulala nta muntu warhuhere akasi.’ Ababwira, ‘Nenyu mugende omu shwa lyani ly’emizabibu.’
8 “Esa y’okufuluka yabere yahika, nyin’eshwa ly’emizabibu abwira omwimangizi w’abakozi, ‘Hamagala abakozi obalipe omushahara gwabo, orhonderere oku w’obuzinda kugera oku w’oburhanzi.’
9 Abarhonderaga akasi isa kumi na nguma bayinjire, alipa buli muntu dinari nguma.
10 Abarhonderaga akasi embere bayinjire, bawaza oku bowe bapata zinene kulusha, aliko nabo babalipa dinari nguma.
11 Babere babaha eyola dinari nguma, barhondera kulundumira nyin’eshwa
12 n’okuderha mpu ‘Abala bantu bayinjaga buzinda bamakola isa nguma yonyine, aliko wamabalipa kuguma nerhu rhwe rhwakolere bwenene olusiku loshi oku zuba likalihire!’
13 Aliko nyin’eshwa ashubiza muguma mubo omu kuderha ntya, ‘muzawe inta kukolere kubi. Rhwapatanaga dinari nguma. Arhali ntyo?
14 Rhola omushahara gwawe ogende. Indonzeze kulipa owayinja w’obuzinda kuguma nawe.
15 Intaherhe ehaki y’okukolesa ebintu byani okundonzeze si? Changwa elisho lyawe lyayongerwe bulala nakolere amenja?’
16 Intyo kon’okola ow’obuzinda nj’aba w’oburhanzi n’ow’oburhanzi anaba w’obuzinda.”
17 Yesu abere yazamukira e Yerusalemu anyomboloka n’abanafunzi bage 12 bonyine ababwira ntya eyi bali omu njira:
18 “Mulole! Obola rhwazamukira e Yerusalemu, Mwen’omuntu ahirwa omu fune z’abakulu b’abadahwa n’abandisi. Banamuchira echihano ch’olufu
19 n’okumuheba omu fune z’abantu b’amashanja yi bamusuzagura, banamukubirha, banamumanika oku murhi anafa, n’olusiku lwa kasharhu anafuka.”
20 Naho nyina wa bagala ba Zebedayo ayinja n’abagala, ayegera Yesu amuyunamira y’amuhema chintu chilebe.
21 Yesu amubaza: “Bichi olonzeze?” Oyola mukazi amushubiza: “Ohane erhegeko, abala bagala bani bombi muguma nj’ayikale ekulyo kwawe owindi ekulembe omu Bwami bwawe.”
22 Yesu aderha: “Murhenji ebi muli mwahema. Mwakagala kunywa echikombe indi hofi kunywa si?” Bamushubiza: “Rhwakagala”
23 Ababwira: “Kweri, mwanywa echikombe chani, aliko arhali nye nkwanene kuchishoga inde wayikala ekulyo n’ekulembe kwani, s’ezola fasi zili za balala Darha azirheganyize.”
24 Amango bandi banafunzi ekumi bayunva ntyo, bayunvira abola babiri oburhe.
25 Aliko Yesu abahamagala ababwira ntya: “Mumenyere okw’abarhegesi b’egulu banarhegeka amashanja oku chingufu n’abarhambo banakolesa obukulu bwabo kubi oku bantu.
26 Aliko arhali ntyo kubikwanene kuba ahakagarhi kenyu. Owalonza kuba mukulu ahakagarhi kenyu akwanene kubakolera,
27 n’olonzeze kuba w’oburhanzi ahakagarhi kenyu akwanene kuba muja wenyu.
28 Nka kulala Mwen’omuntu ayinjaga arhali mpu bamukolere s’akolerane n’okuhana akalamo kage nka nchungu ahali ha bantu banene.”
29 Babere bali barhenga e Yeriko abantu kamama bamukulikira.
30 Na balume babiri b’empumi baliyikere aha burhambi bw’ebarabara, bayunvirhe oku Yesu yagera barhondera kuderha ntya n’omulenge gw’enyanya: “Waliha Mugala wa Daudi, orhuyunvire obonjo!”
31 Abola bantu kamama babakalihira n’okubabwira basire. Aliko baja bashonya omulenge bwenene n’okuderha ntya: “Waliha Mugala wa Daudi, orhuyunvire obonjo!”
32 Yesu ava ayumanga abahamagala ababaza: “Bichi mulonzeze imbajirirage?”
33 Bamushubiza: “Waliha, ofungule amasu merhu.”
34 Yesu abayunvira obonjo, ahuma oku masu mabo, ahola han’aho barhondera kubona, bava bamukulikira.
