Yayandikwaga na Matayo 8:1-34
8 Abere arhenga oku musozi, abantu kamama bamukulikira.
2 Muntu muguma walilwere ebibenzi ayinja, amuyunamira n’okumubwira: “Waliha, akaba olonzeze wakanfumya.”
3 Naho Yesu alambula efune yage n’okumubwira: “Indonzeze! Fuma.” Aho han’ahola oyo muntu walilwere ebibenzi afuma.
4 Naho Yesu amubwira: “Ntaye obwirage, s’ahubwe oje kuchiyerekana em’omudahwa onahane entulo nk’oku Musa aderhaga, yi buba buhamirizi emunda bali.”
5 Agerere omu Kapernaumu, mukulu muguma w’abasoda ayinja amubembereza
6 n’okumubwira: “Waliha, omukozi wani alyamire omu nju, bulala alwere obulwala bwarhumire ahola ebirumbu, anali alumwa bwenene.”
7 Yesu amubwira: “Hanola ngera ey’ola munda namufumya.”
8 Oyola mukulu w’abasoda amushubiza: “Waliha, indi muntu orhakwanene; orhakaja omu mwani, aliko oderhe chinwa chiguma chonyine, n’omukozi wani afuma.
9 Bulala nani inankenga abanantegeka, inampa n’abasoda bani amarhegeko; nka namabwira muguma mpu ‘Genda’, anagenda; nka namabwira owindi mpu ‘Yinja,’ anayinja; na nka namabwira omukozi wani mpu ‘Jira ntya,’ anajirako.”
10 Yesu abere ayunva ntyo, asomerwa bwenene n’okubwira abantu baliri bamukulikira: “Kweri mbabwirire , omu Izraeli yoshi, intasaga kubona omuntu oherhe obwemere bunene buli nk’obu.
11 Aliko mbabwirire oku bantu banene nji barhengerera emashoshokero m’ezuba, n’emazikiro banayikala haguma na Abrahamu, na Isaka na Yakobo omu Bwami bw’embingu;
12 aliko abakashokwere Obwami banakabulwa embuga omu mwizimya, banalira n’okuhekenya amenyo.”
13 Naho Yesu abwira oyola mukulu w’abasoda: “Genda. Bulala wayerekene obwemere, leka ebintu bibe nk’oku wanahemere.” N’oyola mukozi ava afuma mw’akola kasanzi kan’akola.
14 Yesu agerere omu mwa Petro abugana nazala wa Petro alyamire ey’agwerhe ehoma linene.
15 Amuhuma oku fune, ehoma lyachika, ayumanga arhondera kubarheganyiza eby’okulya.
16 Egolo lyabere, bamulerhera bantu banene bafarhirwe n’abazimu, afukuza abola bazimu kugerera chinwa chiguma chonyine, afumya n’abantu boshi balilwere,
17 y’ayeneza ebila binwa omulebi Isaya aderhaga: “Yewe yenyine ahekere amalumwa merhu, afumize n’amalwala merhu.”
18 Yesu abwene abantu kamama babazungulukire, abwira abanafunzi bage bayambuke baje oku lwindi lunda lw’enyanja.
19 Mwandisi muguma ava ayinja abwira Yesu: “Mwalimu, nakukulikira buli hoshi wakaja.”
20 Yesu amubwira: “Banyambwe bajira olukunda, n’enyunyi z’omu chanya zijira enyogo, aliko Mwen’omuntu yewe arhajira chiro ahakalaza erhwe lyage.”
21 Owindi mwanafunzi amubwira: “Waliha ompe oruhusa intange nje kuhamba darha.”
22 Yesu amubwira: “Genderera kunkulikira, oleke emifu ehambe emifu yabo.”
23 Abere aja omu bwarho, abanafunzi bage bamukulikira.
24 Harhengerera echihusi chikalihire omu nyanja, omu kuntu ebivundu by’omulaba byaliri byachikabula omu bwarho; aliko Yesu abaga ey’ajir’ero.
25 Baja kumuchula n’okumubwira: “Mwalimu, kufa kuno! Orhurhabale.”
26 Aliko ababwira: “Bichi muli mwayubahira ntyo, mwe bantu muherhe bwemere bugeke?” Ava ayumanga akalihira echihusi n’enyanja, hava haba endera nene.
27 Abanafunzi basomerwa bwenene n’okuderha: “Oyula ali muntu nyabachi baza? Chiro n’echihusi, n’enyaja byoshi bili byamukenga.”
28 Abere agera oku lwindi lunda lw’enyanja omu teritware y’Abagadarene, balume babiri balifarhirwe n’abazimu barhengerera omu mashinda babuganana naye. Balikalihire bwenene omu kuntu nta muntu n’omuguma wagendaga wapata obushiru b’okugera mw’eyola njira.
29 Barhondera kuyama endulu bwenene eyi bali baderha: “Mugala wa Mungu, bichi oli warhulonzako? Wayinjire kurhutesa n’akasanzi kerhu karhaza kuhika si?”
30 Aliko hale n’ahola baliri, haliri ngulube zinene zaliri zalisa.
31 Abola bazimu barhondera kumulakirira n’okumubwira: “Akaba warhufukuza, orhurhume mu zilira ngulube.”
32 Yesu ababwira: “Mugende!” Abola bazimu barhenga mw’abola balume baja mw’ezola ngulube. Zagenda zalibirha zarhoga oku rukumba n’okugwa omu nyanja, zoshi zazika.
33 Abangeri b’ezola ngulube balibirhira omu vile barhondera kubala byoshi byabere, kuheba mu n’ebyahikire balala balume baliri mw’abazimu.
34 Abantu boshi ba mw’eyola vile baja emunda Yesu ali. Babere bamubona bamukomereza arhenge omu vile yabo.
