Yayandikwaga na Matayo 21:1-46
21 Babere bagera oku Musozi gwe Mizeyituni e Betfaje hofi ne Yerusalemu, Yesu arhuma banafunzi bage babiri.
2 Ababwira: “Mugende mw’elira vilaje muli mwalangira, mwabona ahabashwekere epunda n’omwana gwayo, muzishwekule muzinderhere.
3 Hakajira owababaza echintu, mumushubize mpu ‘Waliha azikenere.’ Ahola han’aho abahazo.”
4 Ebyola byabaga yi biyeneza ebinwa by’omulebi waderhaga ntya:
5 “Obwire omunyere we Sayuni: ‘Tala! Omwami wawe ayinjire emunda oli, ali mwirhonzi, ayikere oku punda, nechi, oku mwana gw’epunda, omwana gw’enyama y’okuheka emizigo.’”
6 Nantyo abanafunzi bagenda bajira nk’oku Yesu anababwiraga.
7 Balerha eyola punda n’omwana gwayo, basasa kw’emyambaro yabo, na Yesu ayiyikalako.
8 Banene omu baliri ahola basasa emyambaro yabo omu barabara, n’abandi baliri bacha amarhabi m’emirhi banamasasa omu barabara.
9 Echindi, abantu baliri embere n’abaliri enyuma zage baliri baderha ntya n’omulenge gunene: “Mungu, rhukuhemere ochungule Mugala wa Daudi! Ogishirwe ali olola oyinjire omu zino lya Yehova! Rhukuhemere woyo oli enyanya bwenene, omuchungule!”
10 Amango ahika omu Yerusalemu, evile yoshi yaba m’olwamo, n’abantu baliri babaza: “Oyula ali nde baza?”
11 Abantu kamama bayinjaga na Yesu balema baderha: “Oyula ali mulebi Yesu, warhenga e Nazareti ye Galilaya!”
12 Yesu abere aja omu hekalu afukuza abantu boshi baliri baguza n’okugulira omu hekalu, akumbagaza ameza m’abaliri bakaba* efuranga, n’ebichumbi by’abaliri baguza epijo.*
13 Ababwira: “Biyandikirwe, ‘enju yani yayirikwa nju y’esala,’ aliko mwabo mwayijirire lukunda lw’abezi.”
14 Kandi empumi n’abahunzize, bamushimba omu hekalu abafumya.
15 Amango abakulu b’abadahwa, n’abandisi babona ebyola bintu bisomeze ajiraga, n’abana baliri baderha ntya n’omulenge gw’enyanya omu hekalu: “Rhukuhemere, ochungule Mugala wa Daudi!” Bagaya bwenene
16 babwira Yesu ntya: “Oli wayunva ebi bali baderha?” Yesu abashubiza mpu “Nechi. Murhachigeraga mwasoma ebinwa biderhere ntya, ‘wajirire erenge lirhenge omu bunu bw’abana badorho n’abachili bayonka.’”
17 Ava abaleka ahola, arhenga omu vile, aja e Betaniya alalayo.
18 Esezi-sezi okw’ali agaluka omu vile ava ayunva enzara.
19 Alangira omurhi ahaburhambi bw’ebarabara gw’amatunda mayirikwa tini, aguyegera aliko nta tunda n’eliguma abweneko olekere ebibabi byonyine. Ava agubwira ntya: “Orhahira okachiyana amatunda haba n’eliguma.” Ahola han’aho ogola murhi gwayuma.
20 Abanafunzi bage babwene ntyo basomerwa bwenene, baderha: “Gurhe ogula murhi gw’etini gwakayuma ntya aha han’aha baza?”
21 Omu kubashubiza Yesu ababwira: “Kweri imbabwirire, nka muherhe obwemere bwa buzira ngangane, murhajira ebinajirire ogula murhi byonyine, s’ahubwe mwabwira chiro n’ogula musozi; ‘kunduka, ochikabule omu nyanja,’ byanaba.
22 Na byoshi mwakahema omu sala nka muherhe obwemere mwabihabwa.”
23 Yesu ajire omu hekalu, abakulu b’abadahwa, n’abashamuka bayinja ahali ayigiriza bamubaza: “Oku ruhusa luhe oli wakola ebila byoshi? Inde okuhere oruhusa?”
24 Yesu aderha mpu “nani ingwerhe echibazo nababaza, mukanshubiza nababwira indi najira ebila byoshi ku ruhusa luhe:
25 Obubatizo bwa Yowane, ngahe bwarhengaga? Bwarhengaga embingu, changwa oku bantu?” Barhondera kubwirana: “Rhukaderha oku bwarhengaga embingu, arhubaza ‘bichi byajaga byarhuma murhamuyemera?’
26 Aliko rhukamubwira mpu ‘bwarhengaga oku bantu,’ rhukwanene kuchilanga abantu, bulala boshi bagendaga babona Yowane okwaliri mulebi.”
27 Bava bashubiza Yesu: “Rhurhenji.” Yesu naye ababwira: “Nani nta babwira indi najira ebila bintu oku ruhusa lwa nde.
28 “Gurhe muwazize? Mulume muguma aligwerhe bana babiri. Abwira efula: ‘Mwana-wani, zene oje kukola omu shwa ly’emizabibu.’
29 Ashubiza eshe: ‘Ntalonza’ aliko buzinda achigalukako, agenda.
30 Ashimba owa kabiri amubwira ntyo k’on’okola. Naye amushubiza: ‘Papa najayo,’ aliko arhajagayo.
31 Inde mw’abola bana bombi walijirire obulonza bw’eshe?” Bamushubiza: ‘Ow’oburhanzi.’ Yesu ababwira: “Kweri mbabwirire, embaraga n’abanalipisa ekoli nji babarhanga omu Bwami bwa Mungu.
32 Bulala amango Yowane ayinja, ayerekana okw’ali munyakunali aliko murhamuyemeraga. Embaraga n’abanalipisa ekoli bowe bamuyemera. Aliko mwabwene ntyo murhanachigalukagako mukamuyemera.
33 Muyunve ogwindi mufano: “Haliri mulume muguma waligwerhe eshwa alihinga mw’emizabibu, alizungulusya olugurhu, achimbula mw’efasi y’okukandira mw’emizabibu, ayumbaka mu n’omunara;* alilekera abahinzi* abalamira omu chihugo cha hale.
34 Echihe ch’okushalula chagerereho, arhuma abakozi bage baje kulola abola bahinzi, omu kuntu bamuhe amage matunda.
35 Aliko abola bahinzi bafarha abola bakozi, muguma bamukubirha, owindi bamuniga, owindi bamuyirhisa amabale.
36 Arhuma abandi bakozi lero banene kulusha abarhumaga burhanzi, nabo babajira okola kon’oko.
37 Buzinda ava arhuma omugala ey’ali aderha mpu ‘Mugala wani yewe bamukenga.’
38 Babwene omugala, abahinzi babwirana ntya: “Okwanene kuyima y’olira wayinjire. Muyinje rhumuyirhe, rhushokole elila shwa!’
39 Bava bamufarha, bamukabula eburhambi bw’eshwa ly’emizabibu, bamuyirha.
40 Bobuno si, hano nyin’eshwa nj’ayinja, gurhe nj’ajira abola bahinzi?”
41 Bamushubiza: “Bulala bali bantu babi, nj’abasisibuliza n’okuha abandi bahinzi elyola shwa, abamuha amatunda omu kasanzi kakwanene.”
42 Yesu ababwira: “Murhachigeraga mwasoma omu mandiko oku ‘ebale abanayumbaka bakabulaga, lye lyabere bale lizibuzibu ly’omu pembe. Bale lirhengere emwa Yehova, linali ly’okusomeza omu masu merhu’?
43 Che chirhumire imbabwirire, Mungu abanyega Obwami bwage, anabuha abantu bali bajira eby’alonzeze bajire.
44 Echindi, owinji wachikuba kw’elyola bale, nj’avunika. N’omuntu nji lyarhogerako nji lyamuhombola.”
45 Amango abakulu b’abadahwa n’Abafarisayo bayunva eyola mifano, barhegera oku bowe b’ali aderha.
46 Chiro akaba oku balilonzeze bamufarhe, bayubaha abantu kamama bulala baliri babona Yesu nka mulebi.
