Yayandikwaga na Matayo 16:1-28
16 Eyola munda Abafarisayo n’Abasadukayo bamuyegera, yi bamurhega, bamuhema abayereke echimenyeso chirhengere embingu.
2 Omu kubashubiza Yesu ababwira ntya: “Eyi lyaba golo, mwanaderha, ‘omusezi nji bwacha bwinja, bulala omu chalege hadukwire;’
3 n’esezi munaderha, ‘zene hashiba echinumbi, n’envula yashibira, bulala omu chalege hadukwire n’ebichu bizidohere.’ Muyinji kufasiriya ehali y’ehewa omu kulola gurhe omu chalege hashushire, aliko ebili byaba mu ganola mango murhakayunva bichi biderhere.
4 Echizazi chibi chirhanagwerhe bwemere chili chagenderera kulonza echimenyeso, aliko nta chimenyeso bahabwa olekere echimenyeso cha Yona.” Naho agenda abaleka.
5 Abanafunzi bayambukira oku lwindi lunda lw’enyanja aliko bayibagira kuheka emigati.
6 Yesu ababwira: “Mufungule amasu, munachilange n’elevire* y’Abafarisayo n’Abasadukayo.”
7 Bava barhondera kuwaza n’okubwirana: “Rhurhalerhere emigati.”
8 Yesu abere arhegera ababwira: “Bulagurhe yimwabwirana mpu nta migati mwalerhere mwabo bantu b’obwemere bugeke?
9 Kugera hanola ntacho muza kuyunva, changwa murhachiyibukire elala migati erhano yalisaga balume 5 000 na rhurhanda rhunga mwarhalagulaga?
10 Changwa elala migati mushanvu yalisaga balume 4 000 na rhurhanda rhunga rhuzibuzibu mwarhalagulaga?
11 Gurhe murhajire mwarhegera oku ntali nababwira oku bilolere emigati? Indi nababwira oku muchilange n’elevire* y’Abafarisayo n’Abasadukayo.”
12 Baja barhegere okw’arhaliri ababwira oku bachilange n’elevire* enaja omu migati s’ahubwe ku bachilange n’enyigirizo z’Abafarisayo n’Abasadukayo.
13 Babere bahika omu teritware ye Kayisariya ke Filipi, Yesu abaza abanafunzi bage: “Abantu bali baderha oku Mwen’omuntu ali nde?”
14 Bashubiza: “Baguma bali baderha mpu Yowane Mubatiza, abandi mpu Eliya, n’abandi mpu Yeremiya changwa owindi mulebi.”
15 Ababwira: “Bobo si nenyu muli mwaderha oku ndi nde?”
16 Simoni Petro ashubiza: “Oli Kristu, Mugala wa Mungu olamire.”
17 Omu kushubiza Yesu amubwira: “Obusime buli bwawe Simoni mugala wa Yona, bulala arhali mubiri n’eshagama* bye bikubishulire ebila bintu si Darha oli omu mbingu.
18 Echindi nkubwirire, woyo oli Petro, na ku linola bale nayumbaka echibaga chani, n’emilyango y’eshinda* erhakagwarha obuhashe ku cho.
19 Nakuha efungulo z’Obwami bw’embingu, na buli choshi nji wafungira oku gulu nji chaba eyi chafungirwe embingu, na buli choshi nji wafungulira oku gulu nji chaba eyi chafungulirwe embingu.”
20 Naho akomereza* abanafunzi oku ntaye babwirage oku yewe ye Kristu.
21 Kurhangira agola mango na kugenderera, Yesu arhondera kufasiriya abanafunzi bage okw’akwanene kuja e Yerusalemu, abashamuka, abakulu b’abadahwa n’abandisi banamutesa bwenene na buzinda anayirhwa n’enyuma wa siku esharhu anafuka.
22 Petro ayunvirhe ntyo, amuheka eburhambi arhondera kumukalihira n’okuderha: “Ochilweko, Waliha, ebyola birhakuhikira haba n’akatyu.”
23 Yesu ahindamuka ayerekeza Petro omugongo n’okuderha: “J’enyuma zani Shetani! Oli chisirhazo embere zani, bulala amawazo mawe marhali mawazo ma Mungu si mawazo m’abantu.”
24 Naho Yesu abwira abanafunzi bage ntya: “Akaba omuntu yeshi-yeshi alonzeze kunkulikira, bihemere achilahire, aheke omurhi gwage gw’amateso n’okugenderera kunkulikira.
25 Bulala owalonza kufumya akalamo kage akaheza, aliko owaheza akalamo kage eju yani; nj’akapata.
26 Omu bukweri, bichi omuntu akaba ayungukire nk’apatire ebintu byoshi bili omu gulu aliko akaheza akalamo kage? Changwa bichi omuntu akahingana n’akalamo kage?
27 Bulala Mwen’omuntu nj’ayinja omu bukuze bw’Eshe haguma na bamalayika, nantyo anahemba ngasi muntu oku bijiro byage.
28 Imbabwirire obukweri, hali baguma omu bayumangire hanola barhakahonja olufu barhanaza kubona gurhe Mwen’omuntu ayinja omu Bwami bwage.”
