Yayandikwaga na Matayo 4:1-25
4 Naho eroho lyayerekeza Yesu omu rungu y’ageregezwa na Ibilisi
2 Enyuma w’okuchishalisa* siku 40 ezuba n’obudufu, ayunva enzara.
3 Naho Shetani ayinja n’okumubwira mpu: “Akaba onali mugala wa Mungu, bwira amala mabale mahinduke migati.”
4 Aliko Yesu amushubiza: “Amandiko maderhere, ‘omuntu arhakwanene kulama oku mugati gonyine si na ku buli chinwa chirhengere omu bunu bwa Yehova.’”
5 Naho Ibilisi amuheka omu vile nchesibwa, amuyimanza oku kasongero k’ehekalu,
6 amubwira: “Akaba onali mugala wa Mungu ochikabule ahashi, bulala amandiko maderhere: ‘Aha bamalayika bage erhegeko oku bikulolere, banakuheka omu fune zabo y’orhabanda okugulu oku bale.’”
7 Yesu amubwira: “Kandi amandiko maderhere: ‘Orhakwanene kugeregeza Yehova Mungu wawe.’”
8 Kandi Ibilisi amuheka oku musozi gulehere bwenene, amuyereka amami moshi m’egulu n’obukuze bwamo.
9 Amubwira: “Naguha ebila bintu byoshi okafukama n’okujira echijiro ch’okumparamya.”
10 Yesu amubwira: “Rhenga embere zani Shetani! Bulala amandiko maderhere: ‘Yehova Mungu wawe yenyine y’okwanene kuharamya, na yenyine y’okwanene kukolera akasi kachesibwa.’”
11 Naho Ibilisi amuleka, na bamalayika bayinja barhondera kumukolera eby’akenere.
12 Yesu abere ayunva oku bafarhire Yowane, ava aja e Galilaya.
13 Enyuma waho arhenga e Nazareti, aja kubera e Kapernaumu oku chinyantambi ch’enyanja omu teritware ya Zabuloni na Naftali,
14 y’ayeneza ebinwa by’omulebi Isaya waderhaga ntya:
15 “Ego bantu b’omu chihugo cha Zabuloni n’echa Naftali, mulamire oku chinyantambi ch’enyanja oku lwindi lunda l’olwinji Yordani, Galilaya y’amashanja!
16 Abantu balamire omu mwizimya babwene omwangaza gunene, n’abantu balamire omu nchuchu nene y’okulerha olufu, omwangaza gwabahikireko.”
17 Kurhangira agola mango, Yesu arhondera kuhubiri n’okuderha ntya: “Muhungame, bulala Obwami bw’embingu buli hofi.”
18 Okw’anali alambagira oku chinyantambi che Galilaya abona balume babiri ba nda nguma, Simoni oyirikwa Petro, na Andereya mwene-wabo eyi bali bakabula omulaga omu nyanja bulala baliri bahyana.
19 Ava ababwira: “Munkulikire, nabajira bahyana b’abantu.”
20 Aho han’ahola baleka emilaga yabo bamukulikira.
21 Abere agera embere abona Yowane na Yakobo mwene-wabo, bagala ba Zebedayo. Baliri omu bwarho n’eshe eyi bali bahangula emilaga yabo, abahamagala.
22 Aho han’ahola, baleka obwarho baleka n’eshe bamukulikira.
23 Naho azunguluka omu Galilaya yoshi ey’ali ayigiriza omu masinagogi n’okuhubiri emyazi minja y’Obwami n’okufumya buli mbero z’amalwala na buli bulema boshi.
24 Engani yage yayenera omu Siriya yoshi, bamulerhera abantu boshi balishengukire n’amalwala, n’amalumwa ma buli lubero, abafarhirwe n’abazimu, abalwere echichuli,* n’abahunzize; boshi abafumya.
25 Nantyo abantu kamama barhengerera e Galilaya, e Dekapoli,* e Yerusalemu, e Yudeya, n’oku lwindi lunda l’olwinji Yordani; bamukulikira.
