Yayandikwaga na Matayo 3:1-17
3 Mw’ezola siku Yowane mubatiza ayinja kuhubiri omu rungu lye Yudeya
2 ey’ali aderha ntya: “Muhungame bulala Obwami bw’embingu buli hofi.”
3 Kweri Yowane ye mulebi Isaya aliri aderhako amango aderha ebila binwa: “Hali omulenge gunene g’omuntu guli gwayunvikana omu rungu: ‘Murheganye enjira ya Yehova, mulambule amabarabara mage.’”
4 Yowane agendaga ayambala omushangi gw’amoya m’engamiya n’omukaba g’oluhu omu mankinya. Ebilyo byage galiri mahanzi n’obuki bw’elubala.
5 Naho abantu be Yerusalemu ne Yudeya yoshi n’ab’omu teritware zaliri hofi ne Yordani, baliri bayinja emunda ali,
6 banahungama ebyaha byabo embere z’abantu, naye anababatiza* omu lwinji Yordani.
7 Abwene Abafarisayo na Basadukayo banene yibayinja emunda ali y’ababatiza, ababwira ntya: “Ego bana b’empiri we, inde wabahere omukonge* ku mulibirhe oburhe bw’amango mayinjire?
8 Mukole ebijiro biyerekene ku mwahungamire.
9 Murhachirhebekaga omu kuchibwira, ‘rhuli bana ba Abrahamu,’ bulala kweri imbabwirire, Mungu akakulira Abrahamu abana mw’amala mabale.
10 Embasha ekala eli oku sina y’omurhi, buli murhi gurhayanire amatunda menja gwachibwa n’okukabulwa omu muliro.
11 Nyono yinababatiza kugerera amenji bulala mwahungamire, aliko owayinja enyuma zani akomere kundusha intanakwanene chiro kumukula ebirato. Yewe ababatiza kugerera eroho lichesibwa n’omuliro.
12 Agwerhe echikoleso ch’okuyera omu fune, achesa bwinja-bwinja echibuga chage ch’okuhulirako analunda engano omu depo, aliko ebisasara anabiyosa omu muliro gurhakazimwa.”
13 Enyuma waho Yesu arhenga e Galilaya ayinja oku Yordani omu kuntu Yowane amubatize.
14 Aliko Yowane alonza kumubuza, amubwira: “Nyono nyenkenere ombatize, wewamashuba kuyinja emunda ndi si?”
15 Yesu amushubiza: “Leka bibe ntyo mu binola bisanzi, bulala y’enjira nyinja rhwakayeneza mu byoshi bikwanene.” Nantyo arhachimubuzaga.
16 Amalire kubatizwa, Yesu ayubuluka aho han’aho omu menji. Embingu zafunguka, abona eroho lya Mungu yilyayandagala nka pijo* yamuyinjako.
17 Naho omulenge gwarhenga embingu gwaderha: “Oyula ali Mugala wani muzigirwa namuyemerere.”
