Yayandikwaga na Matayo 19:1-30
19 Yesu abere amala kuderha ebila bintu byoshi, arhenga e Galilaya aja oku mirhamibira ye Yudeya oku lwindi lunda lwe Yordani.
2 Kandi abantu kamama bamukulikira, anabafumizya eyola munda.
3 Abafarisayo bayinja eyi balonzeze kumurhega, bamubaza: “Biyemererwe n’esheriya omulume ashande obuhya na mukage eju ya buli mpanvu si?”
4 Yesu abashubiza: “Murhasomaga ok’owabalemaga kurhangira oku murhondero alibajirire mulume n’omukazi
5 n’okuderha: ‘Che chirhumire omulume nj’aleka eshe na nyina anachishwekera ku mukage, bombi banaba mubiri muguma’?
6 Bobola barhachili babiri, si bakala bali mubiri muguma. Che chirhumire, aba Mungu ashwekere haguma, nta muntu obakulage haguma.”
7 Bamubwira: “Bobuno si, bichi byarhumaga Musa ahana erhegeko ok’omulume akwanene kuyandikira mukage echemezo ch’okumufukuza n’okushanda obuhya naye?”
8 Ababwira: “Musa abayemereraga mushande obuhya na bakenyu eju y’emirhima yenyu mizibu, aliko arhali ntyo kw’ebintu byaliri kurhangira oku murhondero.
9 Imbabwirire k’omuntu yeshi-yeshi washanda obuhya na mukage eju y’eyindi mpanvu yoshi-yoshi olekere obugonyi, akashaba owindi mukazi, ey’amajira obugonyi.”
10 Abanafunzi bamubwira: “Akaba ntyo k’omulume n’omukazi bakwanene kuba, kuli kwinja omuntu arhashibaga ashaba.”
11 Ababwira: “Arhali abantu boshi babanayemera ebyola muderhere, s’abaherhe eyola mpano bonyine.
12 Hali abantu banayorha balamba bulala baburhirwe n’echibazo ch’amagala, abandi barhakashaba bulala abantu babakonere,* hali n’abandi banachishoga kuyorha balamba eju y’Obwami bw’embingu. Bobuno, akaba omuntu akagala kuyorha mulamba, ayorhe ntyo.
13 Naho abantu balerhera Yesu abana y’abahira kw’efune n’okubasalirira, aliko abanafunzi bage babakalihira.
14 Yesu aderha: “Muleke abana badorho bayinje emunda ndi, murhanalonzaga kubabuza bulala Obwami bw’embingu buli bwa balala bali nka bo.”
15 Amalire kubahira kw’efune, arhenga ahola.
16 Naho, muntu muguma ayinja, aderha: “Mwalimu, bintu binja bihe nakajira y’impata akalamo k’esiku n’amango?”
17 Amubwira: “Bulagurhe obazize oku bilolere ebintu ebinja? Haba muntu muguma mwinja yenyine. Aliko, akaba olonzeze kupata akalamo, ogenderere kukenga amarhegeko.”
18 Oyola muntu amubaza: “Marhegeko mahe?” Yesu amushubiza: “Orhakwanene kuyirha, orhakwanene kujira obugonyi, orhakwanene kuyiba, orhakwanene kuhana obuhamirizi b’obubeshi,
19 okenge yisho na nyoko, onakwanene kuzigira omuturanyi wawe nk’ok’onachizigira.”
20 Oyola murhabana amubwira: “Inanjira ebyola byoshi; bichi bindi bimbulirwe?”
21 Yesu amubwira: “Akaba olonzeze kuba mushinganyanya,* genda oguze ebintu byawe byoshi ogabire abakene efuranga, wagwarha obuchire omu mbingu; naho oyinje obe mwanafunzi wani.”
22 Oyola murhabana ayunvirhe ntyo, agenda n’akahinda bulala aligwerhe birugu binene.
23 Naho Yesu abwira abanafunzi bage ntya: “Kweri imbabwirire, nji byakomerera omuchire okuja omu Bwami bw’embingu.
24 Kandi mbabwirire, biyorohere engamiya egere omu chirhule ch’esindani kulusha omuchire okuja omu Bwami bwa Mungu.”
25 Abanafunzi bayunvurhe ntyo, basomerwa bwenene baderha: “Inde wakachunguka si berhu?”
26 Yesu abalolereza bwinja, naho ababwira: “Oku bantu ebyo birhakashobokana, aliko emwa Mungu ebintu byoshi byakashobokana.”
27 Omu kushubiza Petro amubwira: “Tala! Rhwalekere ebintu byoshi rhwakukulikira; bobuno si, bichi rhwabo nji rhwapata?”
28 Yesu ababwira: “Kweri imbabwirire, amango ebintu byoshi nji byajirwa bihyahya, Mwen’omuntu nj’ayikala omu chichumbi chage ch’Obwami ch’obukuze, nenyu mwe mwankulikire mwanayikala mu bichumbi 12 by’Obwami, mwanachira olubanja moko 12 me Izraeli.
29 Na buli yeshi walekere enju, bene-babo, bali babo, eshe, nyina, abana changwa amashwa eju y’ezino lyani; nj’apata kukuba kali egana, nj’ashokola n’akalamo k’esiku n’amango.
30 “Aliko banene bali b’oburhanzi nji baba b’obuzinda, n’ab’obuzinda banaba b’oburhanzi.
