Yayandikwaga na Matayo 25:1-46
25 “Obwami bw’embingu bwakashushanywa na babikira ekumi barholaga amatara mabo baja kubuganana n’omuhya-mulume.
2 Barhano mubo baliri bihwinja na bandi barhano baliri bengehe.
3 Abola b’ebihwinja baheka amatara mabo si barhachiyikiraga amavurha m’okuyinja yongeramo.
4 Aliko balala baliyengehere baheka amatara n’amasupa mali mw’amavurha.
5 Bulala omuhya-mulume abaga alegamire, barhondera kuhunira balyama.
6 Yabere midi y’ebudufu bayunva omulenge gwaderha: ‘Omuhya-mulume oyu wayinjire! Mugende mubuganane naye.’
7 Bala babikira boshi bava bazuka barhondera kurheganya amatara mabo.
8 Ab’ebihwinja babwira abaliyengehere, ‘Murhuhe oku mavurha menyu, bulala amatara merhu mali hofi kuzima.’
9 Abaliyengehere bababwira: ‘Nkabaga amarhuherhe marharhuyenera rhweshi. Mugende emunda banaguza amavurha mugule amenyu.’
10 Babere bamagenda kugula amavurha, omuhya-mulume ayinja. Ababikira baliri tayari baja omu fete y’obuhya haguma naye n’omulyango gwachingwa.
11 Buzinda abola bandi babikira bayinja, barhondera kuderha, ‘Waliha, Waliha, orhuchingulire!’
12 Abashubiza, ‘Imbabwirire obukweri, intabayinji chiro.’
13 “Che chirhumire mugenderere kuba masu bulala murhenji olusiku n’esa.
14 “Bulala Obwami bw’embingu buli nka muntu muguma walonzaga kubalamira omu chindi chihugo, ahamagala abakozi bage abalekera ebirugu byage.
15 Aha muguma talanta* erhano, owindi ebiri n’owindi nguma omu kukulikiza obuhashe bwa buli muguma, agenda omu chindi chihugo.
16 Aho han’aho eyi bahaga erhano agenda azichuruza ayunguka zindi erhano.
17 Eyi bahaga ebiri ajira okola kon’oko, naye ayunguka zindi ebiri.
18 Aliko omukozi bahaga talanta nguma yonyine, agenda aja kuchimbula abisha efuranga za nahamwabo omu budaka.
19 “Enyuma wa siku zinene, nahamwabo agaluka, ababaza gurhe bakoleseze efuranga abalekeraga.
20 Eyi bahaga talanta erhano ashegera embere ey’aherhe na zindi talanta erhano, aderha, ‘Waliha walimpere talanta erhano; lolaga, nayungukire zindi erhano.’
21 Nahamwabo amubwira: ‘Wakolere bwinja, mukozi mwinja onali mwimana! Wabere mwimana mu bintu bigeke. Nakushingiza bintu binene. Yinja osime haguma na nahamwenyu.’
22 Owahabwaga talanta ebiri naye ashegera embere aderha, ‘Waliha, walindekere talanta ebiri; lolaga, nayungukire zindi ebiri.’
23 Nahamwabo amubwira: ‘Wakolere bwinja, mukozi mwinja onali mwimana! Wabere mwimana mu bintu bigeke. Nakushingiza bintu binene. Yinja osime haguma na nahamwenyu.’
24 “Buzinda, omukozi wahabwaga talanta nguma naye ashegera embere aderha: ‘Waliha, nyinji ok’oba muntu mudarhi, onashalula ah’arhahingaga n’okurhalagula emburho ah’arhayereraga.
25 Eju y’echola nayubaha naja kubisha etalanta yawe omu budaka. Bobola etalanta yawe y’enola.’
26 Nahamwabo amushubiza: ‘Mukozi mubi w’omolokazi, mpu waliyinji oku nanshalula ahantahingaga n’okurhalagula emburho ahantayereraga?
27 Akaba ntyo, wakabikire efuranga zani oku banki, omu kuntu hanola ngaluka inzirhole eyi zajire mw’enyungu.
28 “‘Mumunyege eyo talanta muyihe oherhe talanta ekumi.
29 Bulala oherhe echintu ayongerwa ebindi, anagwarha bintu binene. Aliko orhaherhe chintu na hityuli akaba aligwerhe bamunyegahyo.
30 Mukabule oyola muja orhaherhe ech’amalire embuga omu mwizimya. Eyo munda y’alirira n’okuhekenyera y’amenyo.’
31 “Amango Mwen’omuntu nj’ayinja omu bukuze bwage na bamalayika boshi, nj’ayikala oku chichumbi chage ch’obwami chiherhe obukuze.
32 Amashanja moshi nji mahirwa haguma embere zage, anaberula abantu omu bandi kulala omungeri anaberula entama omu mpene.
33 Nj’ahira entama ekulyo, aliko empene anazihira ekulembe.
34 “Nantyo Mwami nj’abwira abali ekulyo kwage: ‘Muyinje, mwabo mwagishirwe na Darha, mushokole Obwami bwarheganywaga eju yenyu kurhenga egulu lilemwa.
35 Bulala naliri nzara mwampa ebilyo; naliri nyorha mwampa ech’okunywa. Naliri mwinjiira mwankaribisa bwinja;
36 nalibulire emyambaro mwanyambisa; nalilwere mwayinja kundola; naliri omu prizo mwayinja kuntangula.’
37 Naho abanyakunali nji bamushubiza, banaderha: ‘Waliha, mangochi rhwakubonaga oli nzara rhwakuha ebilyo, changwa oli nyorha rhwakuha ech’okunywa?
38 Mangochi rhwakubonaga oli mwinjiira rhwakukaribisa bwinja, changwa obulire emyambaro rhwakuyambisa?
39 Mangochi rhwakubonaga olwere changwa oli omu prizo rhwayinja kukurhangula?’
40 Mwami nj’abashubiza ntya: ‘Kweri imbabwirire, amango moshi mwaliri mwajirira ntyo muguma omu badorho bwenene mw’abala bene-berhu, nyono nyi mwaliri mwajirira ntyo.’
41 “Naho nj’abwira abali ekulembe kwage: ‘Murhenge mbere zani, mwabo mwavumirwe, muje omu muliro gw’esiku n’amango gwarheganywaga eju ya Ibilisi na bamalayika bage.
42 Bulala naliri nzara, murhampaga echi nakalya; naliri nyorha murhampaga echi nakanywa.
43 Naliri mwinjiira, aliko murhankaribisaga bwinja; nalibulire emyambaro, aliko murhanyambisaga; nalilwere, naja n’omu prizo, aliko murhayinjaga kuntangula.’
44 Nabo nji bashubiza ntya: ‘Waliha, mangochi rhwakubonaga oli nzara, oli nyorha, oli mwinjiira, obulire emyambaro, olwere, changwa oli omu prizo, aliko rhurhakukolera chintu?’
45 Naye nj’abashubiza anaderha: ‘Kweri imbabwirire, amango moshi murhajiriraga muguma mw’abala badorho ntyo, nani murhanjiriraga ntyo.’
46 Abala nji baharabiswa loshi, aliko abanyakunali nji bahabwa akalamo k’esiku n’amango.”
Mahugulo m'efo
^ Etalanta nguma y’Abagiriki yaliherhe bilo 20,4.
