Yayandikwaga na Matayo 6:1-34

  • AMAHUBIRI M’OKU MUSOZI (1-34)

    • Okurhajira ebintu binja omu kuchiyerekana (1-4)

    • Obulyo b’okusalira (5-15)

      • Esala ly’omufano (9-13)

    • Okuchishalisa (16-18)

    • Obuhirhi oku gulu n’omu mbingu (19-24)

    • Muleke okuyubahira akalamo (25-34)

      • Mugenderere kurhanga kulonza Obwami (33)

6  “Muchilange murhakola ebijiro binja embere z’abantu mpu yi mubonekana, bulala nka mujirire ntyo nta luhembo Yisho w’embingu akachibaha. 2  Che chirhumire nka wamaha omuntu oli omu bulagirire echintu, orhabandaga omu mpanda* nka kulala endyalya zinajira omu masinagogi n’omu mabarabara y’abantu babasingiza. Kweri inkubwirire banaba eyi bapatire olwabo luhembo luyenere. 3  Aliko mwabo amango mwamaha orhachigalire echintu, murhayemeraga efune yenyu y’ekulembe yamenya bichi efune yenyu y’ekulyo yajirire. 4  Ohane omu bwibisho na ntyo Yisho onabona eby’omu bwibisho nj’akujuha. 5  “Echindi nka mwasalira, murhabaga nka ndyalya bulala zisima kusalira eyi ziyumangire omu masinagogi n’omu mashanganjira y’abantu bababona. Kweri mbabwirire banaba eyi bapatire olwabo luhembo luyenere. 6  Aliko woyo nka wasalira, oje omu chumba chawe, ochinge omulyango naho wanasalira Yisho oli omu bwibisho. Na ntyo Yisho onabona eby’omu bwibisho akugisha. 7  Amango mwamasalira murhagendaga mwagalukira ebyola binwa byen’ebyo nk’okw’abantu b’amashanja banajira, bulala banawaza kubabayunviriza bulala baderhere binwa binene. 8  Che chirhumire murhabaga kuguma nabo bulala Yisho ab’amenyere bichi mukenere chiro n’embere mumuhemebyo. 9  “Che chirhumire mukwanene kusalira ntya: “‘Darha oli omu mbingu, ezino lyawe licheswe. 10  Obwami bwawe buyinje. Obulonza bwawe bujirike oku gulu kuguma n’omu mbingu. 11  Orhuhe ebilyo by’olusiku lwa zene, 12  orhubabalire ebyaha byerhu nk’oku nerhu rhunababalira abarhugoseze. 13  Orhayemeraga rhwarhogera omu chigeregezo, s’orhuyokole* k’olala mubi. 14  “Bulala mukababalira abantu amagosa mabo, Darha w’omu mbingu naye abababalira, 15  aliko nka murhababalire abantu amagosa mabo, Darha naye arhakafa ababalire amagosa menyu. 16  “Amango mwamachishalisa* muleke okugenda mwazinza kuguma n’endyalya, bulala zinazinza* yi zibonekana oku zili zachishalisa. Kweri mbabwirire banaba eyi bapatire olwabo luhembo luyenere. 17  Aliko woyo amango oli wachishalisa,* okalabe omu mesho ochishige n’amavurha omu rhwe, 18  yi birhaba nka bantu b’oli wayereka k’oli wachishalisa,* si Yisho onabona ey’ali omu bwibisho. Nantyo Yisho onabona ebili omu bwibisho, akugisha. 19  “Muleke okuchibikira enguli oku gulu, ahantu omushwa n’egutu byakaharabisa n’ah’abezi bakabomola banayiba. 20  S’ahubwe muchibikire obuhirhi omu mbingu ahantu omushwa n’egutu birhakagera n’ah’abezi barhakabomola n’okuyiba. 21  Bulala ah’obuhirhi bwawe buli ha n’omurhima gwawe gwaba guli. 22  “Etara ly’omubiri liba lisho. Nk’elisho lyawe lichisezeze ku chintu chiguma* omubiri gwawe goshi gwaba omu mwangaza. 23  Aliko nk’elisho lyawe lili ly’obongwa, omubiri gwawe goshi gwaba omu mwizimya. Nk’omwangaza gwalikulimo gwamahinduka mwizimya, ogola mwizimya gukwanene kuba gunene! 24  “Ntaye wakakolera bawaliha babiri, bulala ashomba muguma anasima owindi ao achishwekera ku muguma anasuzagura owindi. Murhakakolera Mungu mukakolera n’obuchire. 25  “Bobola mbabwirire: Muleke okuchilaza oku bilolere akalamo kenyu omu kuchibaza bichi mwalya, bichi mwanywa ao oku bilolere emibiri yenyu omu kuchibaza bichi mwayambala. Akalamo karhali k’akamaro bwenene kulusha ebilyo, n’omubiri gurhali gw’akamaro bwenene kulusha emyambaro si? 26  Mulolereze bwinja enyunyi z’omu chanya, zirhahinga zirhanashalula changwa mpu zibike omu nguli, aliko Yisho w’omu mbingu anazilisa. Murhaherhe akachiro kuzilusha si? 27  Inde mu mwewe wakayongera chiro hityu oku bule bw’akalamo kage omu kuchilaza bwenene? 28  Echindi, bulagurhe yi mwashiba mwachilaza oku bilolere emyambaro? Mulolereze bwinja bichi amauwa m’omu shwa makabayigiriza, okuntu manakula buzira kukola mpu maluhe, marhanaluka myambaro, 29  aliko mbabwirire; chiro na Sulemani omu bukuze bwage boshi, nta mango ayambere kuguma namo. 30  Sasa si akaba Mungu anayambisa ebirhi by’omu shwa byaba biliho zene aliko omusezi byanakabulwa omu chibeyi, k’arhabayambisa chiro na kulusha mwabo bantu baherhe bwemere bugeke? 31  Che chirhumire murhahira mukachilaza bwenene n’okuchibaza; mpu ‘bichi rhwalya? Bichi rhwanywa? Ao mpu bichi rhwayambala? 32  Bulala ebyola bintu byoshi by’abantu b’amashanja banakulikiranya bwenene. Yisho w’omu mbingu ayinji ku mubikenere. 33  “Bobola mugende mwarhanga kulonza Obwami bwa Mungu n’okukenga amarhegeko ahebereho, ahandi mwayongerwa ebyola bindi bintu byoshi. 34  Che chirhumire murhahira mukalaga oku by’omusezi, bulala ol’omusezi nji lwagwarha eyago milago. Buli lusiku luherhe ebyago bibazo bilutosheze.

Mahugulo m'efo

^ Ao “eholere, engunga.”
^ Ao “orhufunge.”
^ Ao “mwamajira amafungo, okurhalya n’okurhanywa.”
^ Ao “zinaluba, zinafunya amalanga.”
^ Ao “mwamajira amafungo, okurhalya n’okurhanywa.”
^ Ao “wajira amafungo, okurhalya n’okurhanywa.”
^ Ao “liri lyabona bwinja, liyorohere.”

Copyrights for this publication