Ebijiro by’Entumwa 9:1-43
9 Aliko bulala Sauli aliri agenderera kuyubahisa n’okulonza kuyirha abanafunzi ba Waliha, ava aja em’omudahwa mukulu
2 amuhema amaruba omu kuntu amaheke omu masinagogi me Damasko, y’afarha abantu boshi abona bali bakulikira Enjira y’Okuli, abaheke e Yerusalemu eyi bashwekerwe, babe balume changwa bakazi.
3 Okw’anachili omu njira ali hofi kuhika e Damasko, omwangaza gwava gwarhengerera embingu ahola han’aho gwakoleza ahaliri hoshi,
4 ava agwa ahashi, ayunva omulenge gwamubwira ntya: “Sauli, Sauli, bulagurhe oli wandibuza?”
5 Sauli abaza: “Woyo nde si Waliha?” Ashubiza: “Nyono Yesu, oli walibuza.
6 Aliko oyimange oje omu vile, bakubwira ech’okwanene kujira.”
7 Abalume baliri babalama naye bayimanga eyi bahwererwe omu kuntu ntacho bagalire kuderha bulala baliyunvirhe omulenge si nta muntu balibwene.
8 Sauli ayimanga, aliko chiro akaba okw’amasu mage malizibwire nta chintu aliri abona. Bamufarha efune bamuheka kuhika e Damasko.
9 Amala siku esharhu eyi nta chintu ali abona na buzira kulya n’okunywa.
10 Omu Damasko mwaliri mwanafunzi muguma mpu ye Ananiya, Waliha amubwira ntya omu bibonekezi: “Ananiya!” Ashubiza: “Nyono hanola Waliha.”
11 Waliha amubwira: “Ogende omu njira enayirikwa Enyorokere, olonze omulume mpu ye Sauli we Tarso oli omu mwa Yuda. Bulala ali asalira,
12 anabwene omu bibonekezi omulume oyirikwa Ananiya ayinja amamuheba kw’efune y’ashuba kubona.”
13 Aliko Ananiya amushubiza: “Waliha, nayunvirhe bantu banene baderha oku bilolere oyola muntu n’oku bilolere ebintu bibi akolere abachesibwa bawe e Yerusalemu.
14 N’abadahwa bakulu bamuhere oruhusa l’okufarha abantu boshi bali bahamagalira ezino lyawe enola munda.”
15 Aliko Waliha amubwira: “Genda, bulala oyola mulume ali chikoleso nachishogere y’aheka ezino lyani oku bantu b’amashanja, oku bami n’oku Baizraeli.
16 Namuyereka bwinja-bwinja amalibuko akwanene kugeramo eju y’ezino lyani.”
17 Ananiya ava agenda, aja mw’eyola nju, amuhira kw’efune aderha: “Sauli mwene-werhu, Waliha Yesu nji wakurhengereraga amango nji waliri omu barabara ey’oli wayinja, antumire y’oshuba kubona, opate n’eroho lichesibwa.”
18 Ahola han’aho ebintu bili nka magamba byarhenga omu masu ma Sauli byarhoga, ashuba kubona. Ava ayumanga abatizwa,
19 aj’alya ebilyo naho agwarha emisi.
Abera n’abanafunzi omu Damasko siku zigeke,
20 n’ahola han’aho arhondera kuhubiri omu masinagogi oku bilolere Yesu, oku oyola ye Mugala wa Mungu.
21 Aliko boshi baliri bamuyunva basomerwa bwenene barhondera kuderha: “Arhali oyula muntu ye waliri alibuza abantu baliri baderha kw’elila zino omu Yerusalemu? Arhayinjaga hanola y’agwerhe omuhigo g’okubafarha n’oku baheka emwa abadahwa bakulu?”
22 Aliko Sauli agenderera kugwarha misi minene bwenene analiri asomeza Abayahudi balilamire omu Damasko, bulala aliri ayemeza bwinja-bwinja oku Yesu ye Kristu.
23 Hagerere siku zinene, Abayahudi bajiira Sauli enama y’okumuyirha.
24 Aliko Sauli amenya oku bamujiirire enama. Ezuba n’ebudufu, Abayahudi baliri balanga bwinja-bwinja emilyango mizibuzibu y’evile yi bamuyirha.
25 Aliko ebudufu, abanafunzi bage bamurhola bamuyandagaza omu karhanda kugerera echirhule chaliri omu chibambazi.
26 Ahikire e Yerusalemu, alonza achihire haguma n’abandi banafunzi, aliko boshi baliri bamuyubaha bulala barhaliyemerere oku naye abere mwanafunzi.
27 Barnaba av’ayinja kumurhabala amuheka emunda entumwa zili ababalira bwinja-bwinja okuntu Sauli abonaga Waliha omu barabara na Waliha aganira naye, n’okuntu aliri aderha buzira buba omu zino lya Yesu e Damasko.
28 Sauli ayorha haguma nabo. Aliri alambagira omu Yerusalemu nk’okw’alonzeze, analiri aderha buzira buba omu zino lya Waliha.
29 Aliri aganira n’okujira obuhaka n’Abayahudi baliri baganira Echigiriki, aliko bowe baliri balonza bamuyirhe.
30 Bene-berhu bamenyere ntyo, bamuheka e Kayizariya bamurhuma e Tarso.
31 Naho ebibaga byoshi by’omu Yudeya, eby’omu Galilaya n’eby’omu Samariya byalama omu murhula byanakomera; na bulala byaliri byalambagira omu kuyubaha Yehova n’omu chirhulirizo ch’eroho lichesibwa, oluganjo lw’abanafunzi lwagenderera kuluga.
32 Amango Petro aliri abalama mw’eyola teritware yoshi, ayandagalira n’emw’abachesibwa balilamire omu Lida.
33 Abugana yi mulume muguma mpu ye Ayineya, wabaga amamala myaka munane ey’alyamire omu buliri bulala alihunzize.
34 Petro amubwira ntya: “Ayineya, Yesu Kristu amakufumya. Yimanga osase* obuliri bwawe.” Ahola han’aho ayimanga.
35 Abantu boshi balilamire omu Lida n’omu lubanda lwe Sharoni babere bamubona, baja oku lunda lwa Waliha.
36 Omu Yopa mwaliri mukazi muguma waliri mwanafunzi mpu ye Tabita, amango lyamatafsiribwa, k’okuderha, “Dorkasi.” Aliri akola bijiro binene binja analiri arhabala bwenene abakene.
37 Aliko mw’ezola siku alwala ava afa. Bashuka omubiri gwage bagulyamikiza omu chumba chaliri oku etaje.
38 Bulala e Lida yaliri hofi ne Yopa, abanafunzi bayunvirhe oku Petro ali mw’eyola vile; barhuma yi balume babiri bamubwire ntya: “Wekalamawe oyinje emwerhu buzira kulegama.”
39 Petro ava ayimanga agenda nabo. Ahikire, bamuheka mw’echola chumba chaliri oku etaje, n’abashumbakazi boshi bayinja emunda ali eyi bali balaka n’okumuyereka myambaro minene n’amakanzu Dorkasi abasoneraga amango alichili haguma nabo.
40 Petro ava abahulusa boshi, afukama asalira naho ayerekeza emunda ogola mubiri guli aderha: “Tabita, yimanga!” Ava azibula, abere abona Petro ayikala.
41 Petro alambula okuboko amuyimanza, ahamagala abachesibwa n’abashumbakazi abayerekaye ey’akala azene.
42 Ogola mwazi gwamenyikana omu Yopa yoshi na bantu banene bagwarha obwemere mu Waliha.
43 Petro ayorha e Yopa siku zigeke emwa mulume muguma onakwiza empu oyirikwa Simoni.
Mahugulo m'efo
^ Ao “orhinde.”
