Ebijiro by’Entumwa 5:1-42
5 Mulume muguma onayirikwa Ananiya na mukage Safira, baguza eshwa lyabo.
2 Aliko abisha oku furanga bamuhaga eyi mukage anamenyere, ezasigalaga azihekera entumwa.
3 Petro amubaza: “Ananiya, bulagurhe wakayemera Shetani akushumika orhebeke eroho lichesibwa buzira shoni, onabishe echigabi ch’efuranga oku ziwaguzaga eshwa?
4 Embere oliguze, lirhaliri lyawe si? N’amango wamalaga kuliguza, ezola furanga zirhaliri omu fune zawe si? Bichi byarhumaga wagwarha amawazo mali ntyo omu murhima? Arhali bantu ba warhebekere si warhebekere Mungu.”
5 Ananiya abere ayunva ebyola binwa, ava agwa ahashi, afa. Na boshi bayunvaga eyola ngani bayubaha bwenene.
6 Emisole yayumanga, yamurhuba omu biraka, bamuheka embuga, baja kumuhamba.
7 Enyuma wa sa esharhu ntya, mukage ayinja ey’arhamenyere ebyabere.
8 Petro amubaza: “Ombwire bwinja, zinola z’enafuranga zoshi mwaguzaga eshwa?” Ashubiza: “Nechi, zoshi ezola.”
9 Petro ava amubwira: “Bulagurhe mwembi mwakayunvikana oku mugeregeze eroho lya Yehova? Tala okw’amagulu m’abarhenga kuhamba balo mali oku mulyango, nawe bakuheka.”
10 Ahola han’aho agwa ahashi embere z’amagulu ma Petro, afa. Balala basole bayinjire, babugana afire bamuheka embuga, bamuhamba ahaburhambi bw’eba.
11 Eju y’echola, echibaga choshi na boshi bayunvaga eyola myazi, bayubaha bwenene.
12 Echindi, kugerera efune z’entumwa, ebisomerene n’ebimenyeso binene byagenderera kukolwa omu bantu; na boshi baliri babuganana omu Veranda ya Sulemani.
13 Kweri, hali abandi barhagwarhaga obushiru b’okuchiheba haguma n’abanafunzi; aliko abantu baliri babasingiza bwenene.
14 Olekere nantyo, oluganjo lw’abalume n’abakazi bayemeraga Waliha, lwagenderera kuluga bwenene.
15 Baliri balerha chiro n’abalwala oku mabarabara, banabalyamikiza oku bipoyi n’oku bishanja, omu kuntu Petro akayinja kugera ahola, chiro echichuchu chage chigere ku baguma mubo.
16 Na bantu banene barhengerere omu mavile mazungulikire e Yerusalemu baliri bayinja eyi bahekere abalwala n’abantu abazimu yibalibuza, na boshi baliri bafuma.
17 Aliko eju y’obongwa, omudahwa mukulu na boshi baliri haguma naye b’omu chigusho ch’Abasadukayo, bayumanga.
18 Bava bafarha entumwa babahira omu prizo y’abantu boshi.
19 Aliko omu budufu, malayika wa Yehova achingula emilyango y’eprizo, abahulusa, ababwira ntya:
20 “Mugende muyumange omu hekalu munagenderere kubwira abantu boshi oku bilolere akala kalamo.”
21 Babere bayunva ebyola binwa, balamukira omu hekalu barhondera kuyigiriza.
Omudahwa mukulu na boshi baliri naye bayinja, bahamagala e Sanendrini yoshi n’abashamuka b’omu Izraeli, barhuma abantu ewa prizo baje kulerha entumwa.
22 Aliko abapolisi bahikire omu prizo barhababuganagamo. Baja kuhaana e raporo,
23 baderha: “Rhwabuganire eprizo echingirwe bwinja-bwinja n’abalanzi bayumangire oku mulyango, aliko rhwabere rhwachingula nta muntu rhwabuganiremo.”
24 Omukulu w’abapolisi b’ehekalu n’abakulu b’abadahwa bayunvirhe eyola myazi, bahwerwa bulala baliri bachibaza bichi byaja byakulikiraho.
25 Aliko muntu muguma ava ayinja, ababwira: “Mumenyere si, balala bantu nji mwahiraga omu prizo bayumangire omu hekalu, bali bayigiriza abantu.”
26 Omukulu w’abapolisi agenda n’abapolisi bage balerha entumwa, aliko buzira kubalibuza, bulala baliyubahire oku abantu bakabashurha amabale.
27 Babayumanza embere we Sanendrini. Naho omudahwa mukulu ababaza
28 aderha: “Rhwalibakomereze oku murhagendereraga kuyigiriza mw’elyola zino. Aliko mulole, mwayunjwize enyigirizo zenyu omu Yerusalemu, munahigirire kujira eshagama y’oyula muntu ebe oku rhwe lyerhu!”
29 Omu kushubiza, Petro n’ezindi ntumwa baderha: “Rhukwanene kukenga Mungu yewe nka murhegesi ahali h’okukenga abantu.
30 Mungu wa bashokuliza berhu afulire Yesu mwayirhaga omu kumumanika oku murhi.
31 Mungu amuzamwire amuhira ekulyo kwage, amujira Murongozi Mukulu na Muchunguzi, yi Izraeli ahungama n’okubabalirwa ebyaha byage.
32 Rhunali bahamirizi by’ebyola byoshi, rhwabo n’eroho lichesibwa Mungu ahere balala banamukenga yewe nka murhegesi.”
33 Bayunvirhe ntyo, bakaliha bwenene banalonza kubayirha.
34 Aliko Mufarisayo muguma onayirikwa Gamaliyeli ayumanga omola Sanendrini, aliri mwalimu w’Amarhegeko okengerwe n’abantu boshi, arhegeka barhange bahuluse abola bantu bugeke.
35 Naho ababwira: “Ego balume be Izraeli, muchilange n’ebi muli mwalonza kukolera abala bantu.
36 Omufano, harhaza kulegama muntu muguma mpu ye Teuda arhengerere, aliri aderha oku ali muntu w’akamaro, na hofi bantu 400 baja omu chigusho chage. Aliko ayirhwa, n’abantu boshi baliri bamukulikira bashandala eyi n’eyi, byahwera ahola.
37 Enyuma zage, omu siku z’erisansema hayinja Yuda we Galilaya, ajira echage chigusho ch’abantu. Oyola mulume naye ayirhwa n’abantu boshi baliri bamukulikira bashandala eyi n’eyi.
38 Che chirhumire imbabwirire, mw’eyila hali murhachihiraga omu by’abala bantu si mubaleke. Bulala akaba ogula mupango changwa akala kasi karhengerere emwa’abantu, karhagenderera;
39 aliko akaba karhengerere emwa Mungu murhagala kukayimanza. Oku bwindi, muchilange murhachibugana eyi Mungu yi muli mwalwisa.”
40 Bava bayunva elyola hano, bahamagala entumwa, bazishurha enkoni n’okubakomereza oku baleke kuderha omu zino lya Yesu, naho babalikula.
41 Entumwa zarhenga oku Sanendrini eyi zigwerhe obusime, bulala babonekene oku bakwanene kusuzagurwa eju y’ezino lya Yesu.
42 Na buli lusiku, bagenderera kuyigiriza n’okutangaza omu hekalu na nju oku nju emyazi minja oku bilolere Kristu Yesu buzira kuleka.
