Ebijiro by’Entumwa 22:1-30
22 “Bene-berhu, nenyu badarha, mujage mwayunviriza okuntu nasamba embere zenyu.”
2 Bayunvirhe Paulo aganira nabo omu lulimi lwe Chiebraniya, baja basira loshi, aderha:
3 “Indi Muyahudi, muburhwa we Tarso ye Kilikiya, nasomeraga mw’enola vile na Gamaliyeli yenyine yi wanyigirizaga, nayigirizwa okuntu nakakulikiza bwinja-bwinja Amarhegeko ma bashokuliza, inangwerhe obushiru eju ya Mungu nk’obu nenyu mugwerhe zene.
4 Naliri natesa n’okuyirha abantu baliri bakulikira eyila Njira y’Okuli, naliri nafarha abalume n’abakazi nanabakabula omu prizo.
5 Chiro n’omudahwa mukulu n’abashamuka boshi bakabihamiriza. Bampa chiro n’amaruba m’okuhekera bene-berhu be Damasko, naliri omu njira eyi naja kufarha abali eyola munda n’okubalerha e Yerusalemu eyi bashwekerwe yi bahanwa.
6 “Aliko oku nandi nabalama eyi ndi hofi kuhika e Damasko, yaliri hofi midi y’ezuba, ahola han’aho omwangaza gunene gwarhengerera embingu, gwakoleza aha naliri hoshi,
7 nava nagwa ahashi, nayunva omulenge gwambwira ntya: ‘Sauli, Sauli, bulagurhe oli wandibuza?’
8 Namubaza: ‘Woyo nde si Waliha?’ Anshubiza: ‘Nyono Yesu we Nazareti oli watesa.’
9 Abalume baliri babalama nani babona ogola mwangaza aliko barhayunvaga omulenge g’owaliri aganira nani.
10 Eju y’echola namubaza: ‘Bichi inkwanene kujira si Waliha?” Anshubiza: ‘Yimanga oje e Damasko, n’eyola munda bakubwira byoshi byarheganyizwe okwanene kukola.’
11 Aliko bulala ntakachigalire kubona eju y’obukuuze b’ogola mwangaza, abanaliri nabo banfarha efune bampeka kuhika e Damasko.
12 “Naho mulume muguma onayirikwa Ananiya waliyubahire Mungu omu kukulikiza eby’Amarhegeko maderhere, aligwerhe n’erenge linja omu Bayahudi boshi balilamire eyola munda,
13 ayinja emunda naliri. Ayimanga aha burhambi bwani ambwira: ‘Sauli, mwene-werhu, oshube obone!’ Ahola han’aho nalola enyanya namubona.
14 Ambwira: ‘Mungu wa bashokuliza berhu akuchagwire y’ohikira kumenya obulonza bwage, obone omunyakunali, onayunve omulenge gwage,
15 bulala okwanene kuba muhamirizi wage oku bantu boshi eju y’ebi wabwene n’okuyunva.
16 Na bichi ochili walinga? Yimanga, obatizwe, onahamagale ezino lyage y’ocheswa kurhenga omu byaha byawe.’
17 “Aliko amango ngaluka e Yerusalemu, eyi ndi nasalira omu hekalu, naba nk’oli walorha
18 namubona ey’ali ambwira ntya: ‘Jira juba-juba orhenge e Yerusalemu, bulala barhayemera obuhamirizi wahaana oku bi ndolere.’
19 Nashubiza: ‘Waliha, bonyine bayinji bwinja oku naliri nagera sinagogi oku yindi eyi ndi naheba omu prizo n’okushurha abakugwerhe m’obwemere;
20 n’amango bashesha eshagama y’omuhamirizi wawe Stefano, naliri ahola, nani naliyemerere oku ayirhwe, nye naliri nalanga n’emyambaro y’abamuyirhaga.’
21 Chiro akaba ntyo, ambwira: ‘Genda, bulala nakurhuma oku bantu b’amashanja ba hale.’”
22 Baligenderere kumuyunviriza kugera ah’aderheraga ebyola binwa. Naho baderha ntya na mulenge gunene: “Oyula muntu ayirhwe, bulala arhakwanene kulama!”
23 Bulala baliri bajira lwamo lunene, banakabula emyambaro yabo y’enyanya n’okutumura oluchuchu omu chanya,
24 omukulu w’abasoda arhegeka oku bayingize Paulo omu nkambi y’abasoda anaderha oku bakwanene kumubaza ebizazo eyi bali bamushurha enkoni y’amenya empanvu yarhumaga abantu bajirira Paulo lwamo lungana ahola.
25 Aliko babere bamulambika yi bamushurha enkoni, Paulo abaza omukulu w’abapolisi waliyumangire ahola: “Amarhegeko mabayemerere okushurha Omuroma murhanaza kumusambisa si?”
26 Oyola mukulu w’abapolisi ayunvirhe ntyo, aja emunda omukulu w’abasoda ali amubalira ebyola, amubwira: “Bichi owazize wajira? Bulala oyula mulume ali Muroma!”
27 Omukulu w’abasoda ayegera Paulo amubaza: “Ombwire bwinja, mpu oli Muroma?” Ashubiza: “Nechi.”
28 Oyola mukulu w’abasoda aderha: “Nyono nalihanire furanga zinene yimpata ehaki y’okuba Muroma.” Paulo amushubiza: “Nyono ndi Muroma w’akaburhano.”
29 Ahola han’aho abantu baliri balonza kumubaziriza, bamuleka. Omukulu w’abasoda naye amenyere oku gasi Paulo ali Muroma, ayubaha bulala alimushwekere n’obulegule.
30 Olusiku lwakulikiragaho, bulala alilonzeze kumenya bwinja-bwinja bulagurhe Abayahudi basidakire Paulo, amushwekula n’okurhegeka abakulu b’abadahwa ne Sanendrini yoshi babuganane. Ayandagaza Paulo amuyumanza ahagarhi kabo.
