Ebijiro by’Entumwa 1:1-26
1 Teofile we, omu ngani y’oburhanzi, nalikuyandikire oku bilolere byoshi Yesu aliri ajira n’ebi ayigirizaga kurhangirira oku murhondero
2 kugera amango Mungu amuhekaga embingu, enyuma y’okumala kuha entumwa achishogaga obwerekezi kugerera eroho lichesibwa.
3 Enyuma y’okulibuka, alibarhengerere kanene, abaha ebyemezo biyerekene oku azene. Bamubona mu siku 40, analiri aderha oku bilolere Obwami bwa Mungu.
4 Amango abuganana nabo, abarhegeka ntya: “Murharhengaga omu Yerusalemu, si mugenderere kulindira echi Darha abalaganyaga, chilala mwayunvaga nababwira.
5 Bulala kweri, Yowane aliri abatiza omu menji, aliko mwabo enyuma wa siku zigeke mwabatizwa kugerera eroho lichesibwa.”
6 Babere bachigushire haguma babaza Yesu: “Waliha, bunola y’okala kuja wagalulira Izraeli obwami si?”
7 Ababwira: “Karhali kasi kenyu okumenya esiku changwa ebihe byaheberweho. Darha yenyine ye gwerhe obuhashe b’okubimenya.
8 Aliko mwahaabwa emisi amango eroho lichesibwa lyabayandagalirako, mwanaba bahamirizi bani omu Yerusalemu, omu Yudeya yoshi, omu Samariya, na kugera omu fasi za hale bwenene z’egulu.”
9 Amalire kuderha ebyola, ahekwa embingu eyi bali bamulola, n’echichu chamubisha, barhachimubonaga.
10 Oku banali balola omu mbingu gurhe ali agenda, ahola han’aho balume babiri bayambere emyambaro y’omweru bayumanga ahaburhambi bwabo
11 baderha: “Balume be Galilaya, bichi birhumire mwabera hanola eyi muli mwalola embingu? Oyula Yesu wamakulwa ahagarhi kenyu amahekwa embingu, nj’agaluka nk’okula mwanabwene agenda.”
12 Enyuma waho entumwa zagaluka e Yerusalemu, eyi zarhenga oku musozi gunayirikwa Musozi gw’Emizeyituni gwaliri ku hofi chilometre chiguma ne Yerusalemu.
13 Bahikireyo, bashonera omu chumba bagendaga baberamo chaliri oku etage. Haliri Petro, Yowane, Yakobo, Andreya, Filipo, Tomasi, Bartolomayo, Matayo, Yakobo mugala wa Alfayo, Simoni w’obushiru na Yuda mugala wa Yakobo.
14 Boshi omu muhigo muguma bagenderera kusalira, baliri na bakazi baguma, Mariya nyina wa Yesu na bene-babo Yesu.
15 Mw’ezola siku, Petro ayumanga ahagarhi ka bene-babo (baliri hofi bantu 120) aderha:
16 “Balume, bene-berhu, byalihemere olwandiko luyenere, lulala eroho lichesibwa lyaderhaga nka bulebi kugerera Daudi oku bilolere Yuda wayerekezaga abayinjaga kufarha Yesu.
17 Bulala Yuda aliri muguma werhu, analiri akola nerhu mw’akala kasi.
18 (Oyola muntu aligulire eshwa omu mushahara gurhali g’okunali, arhoga, arhanga erhwe ahashi, omubiri gwage gwabasha n’amala mage mashandala.
19 Abantu be Yerusalemu boshi bamenya eyola ngani, omu kuntu bayirika elyola shwa omu lulimi lwabo Akeldama, k’okuderha “Eshwa ly’Eshagama.”)
20 Bulala biyandikirwe ntya omu chitabu ch’Enyimpo, ‘Ah’alamire hahambe,’ na ‘Nta muntu okachihira akalamaho’ kandi, ‘Akasi kage k’obwimangizi owindi muntu akarhole.’
21 Che chirhumire bihemere rhuchishoge muntu muguma omu balume baliri barhuherekeza amango moshi Waliha Yesu aliri akola akasi haguma nerhu,
22 kurhangirira amango Yowane amubatizaga kugera amango ehekwaga embingu, omu kuntu ahaane obuhamirizi haguma nerhu oku bilolere obufuke bwa Yesu.”
23 Bava balerha balume babiri, Yosefu onayirikwa Barsaba, kandi baliri bamuyirika Yusto n’owindi mpu ye Matiyasi.
24 Bava basalira ntya: “Yehova we, weyinji omurhima gwa buli yeshi, oyerekane inde muguma wachishogere mw’abala balume bombi
25 arhole efasi mw’akala kasi n’okuba ntumwa ahali ha Yuda wayilekaga aja oku yage-yage fasi.”
26 Babayeshera esimbi, yarhogera ku Matiyasi, ava ayongeerwa ku zilala ntumwa 11.
