Ebijiro by’Entumwa 15:1-41
-
Obuhaka bwamarhengerera omu Antiyokiya oku bilolere okukatwa (1, 2)
-
Echibazo chamahekwa e Yerusalemu (3-5)
-
Abashamuka n’entumwa bamajira embuganano (6-21)
-
Amaruba marhengere oku baraza lirhambwire (22-29)
-
Okuchiyasa eshagama (28, 29)
-
-
Amaruba mamaheba echibaga omurhima (30-35)
-
Paulo na Barnaba bamakorogana (36-41)
15 Bantu baguma bayandagala kurhenga e Yudeya barhondera kuyigiriza bene-berhu ntya: “Nka murhakatirwe* omu kukulikiza emigenzo ya Musa, murhakachunguka.”
2 Aliko babere bajira obuhaka bunene n’okurhonganya Paulo na Barnaba, babona oku Paulo, Barnaba n’abandi balume bazamukire e Yerusalemu emunda entumwa n’abashamuka bali omu kuntu bababwire kw’echola chibazo.
3 Echibaga chamalire kubaherekeza bugeke, abola balume bagenderera n’olugenzi bagerera omu Foinike n’omu Samariya eyi bali babala bwinja-bwinja okuntu abantu b’amashanja bahindamwire olungezi lwabo, n’ebyola byalerhera bene-berhu boshi busime bunene.
4 Bahikire e Yerusalemu, echibaga, entumwa n’abashamuka babakaribisa bwinja. Nabo bababalira bintu binene Mungu akolere kubagererako.
5 Aliko baguma omu Bafarisayo bahindukaga bemezi, bayimanga ahabaliyikere baderha ntya: “Bihemere bakatwe, rhunababwire bakenge Amarhegeko ma Musa.”
6 Bobola entumwa n’abashamuka babuganana omu kuntu baganire kw’echola chibazo.
7 Enyuma z’okujira buhaka bunene, Petro ayimanga n’okubabwira: “Bene-berhu, mumenyere bwinja oku kurhenga mira Mungu alinchagwire ahagarhi kenyu omu kuntu kugerera obunu bwani, abantu bamashanja bayunve emyazi minja banagwarhe obwemere.
8 Na Mungu oyinji emirhima, aliyerekene oku abayemerere omu kuhabo eroho lichesibwa kuguma n’oku nerhu arhuhagalyo.
9 Na nta tofauti aliyerekene ahagarhi kerhu nabo, aliko achesa emirhima yabo kugerera obwemere.
10 Bobola si, bulagurhe muli mwaja mwalonza kugeregeza Mungu omu kuseza abanafunzi baheke omuzigo, ogu bashokuliza berhu na rhwewe rhwenyine rhurhagalaga kuheka?
11 Oku bwindi, rhuherhe obwemere oku rhwachungulwa kugerera olukogo rhurhakwanene lwa Waliha Yesu, kuguma nabo.”
12 Abantu boshi bava basira, barhondera kuyunviriza Barnaba na Paulo eyi bali babala ebimenyeso n’ebisomerene binene Mungu alijirire omu mashanja omu kubakolesa.
13 Bamalire kuderha, Yakobo arhola omwazi aderha: “Bene-berhu, munyunvirize.
14 Simioni* arhubalire bwinja-bwinja gurhe Mungu awazaga oku mashanja ob’oburhanzi, y’achishoga mw’abantu baheka ezino lyage.
15 N’ebinwa by’abalebi biyemezeze echola bwinja, nk’oku byanabaga byayandikirwe:
16 ‘Enyuma w’ebyola bintu, nji nagaluka nanayimanza ehema lya Daudi lyagwire; nji nayumbaka buhyahya ebiguka byalyo n’okushuba kulikwiza,
17 omu kuntu abantu bayorhere n’abantu b’amashanja moshi; abantu banayirikwa oku zino lyani, balonze Yehova n’omurhima goshi. Intyo ku Yehova aderhere, oli wajira ebila bintu
18 bimenyikene kurhenga mira.’
19 Bobola, nyono mbwene oku rhurhakomezezaga abantu b’amashanja bajire oku lunda lwa Mungu ebintu,
20 si rhubayandikire oku bachiyase n’ebintu byahaanirwe nterekero oku sanamu,* obubaraga, enyamafu n’eshagama.
21 Bulala kurhenga mira, hali abantu banahubiri omu mavile moshi ebi Musa ayandikaga, na buli lusiku lwe sabato binasomwa n’omulenge gunene omu masinagogi.”
22 Buzinda entumwa n’abashamuka babona oku bachishoge abalume barhuma e Antiyokiya, n’echibaga choshi chayemera. Bava barhuma Yuda onayirikwa Barsaba na Sila, bombi baligwerhe engabane omu chibaga, bagenda haguma na Paulo na Barnaba.
23 Binola bye byaliyandikirwe omu maruba bahekaga:
“Rhwabo bene-benyu ntumwa n’abashamuka, rhubayandikire mwabo bene-berhu be Antiyokiya, e Siriya ne Kilikiya mwarhengaga omu mashanja. Mahyo!
24 Rhwayunvirhe oku hali abarhurhengeremo bayinja kubalerha mw’akalaba kugerera ebinwa byabo, balonza babakoroge, n’obola chiro nta bwerekezi boshi-boshi rhwalibahere.
25 Bobola rhweshi rhwayunvikene oku rhuchishoge abalume bayinje haguma n’abazigirwa berhu Barnaba na Paulo emunda muli,
26 balume bahaanire akalamo kabo eju y’ezino lya Waliha Yesu Kristu.
27 Che chirhumire rhwarhuma Yuda na Sila, omu kuntu nabo bababwire ebyola binwa bunu oku bwindi.
28 Bulala eroho lichesibwa na rhwewe rhwenyine rhwabwene oku rhurhabayongereraga eyindi mizigo olekere ebila bintu by’engenzi:
29 mugenderere kuchiyasa ebintu byahaanirwe nterekero oku sanamu, eshagama, enyamafu n’obubaraga. Mukachiyasa loshi-loshi ebyola byoshi, ebintu byabagendera bwinja. Mugwarhe omurhula!”
30 Abola balume bava bagenda bayandagalira e Antiyokiya. Bahikireyo, bagusha abantu boshi babaha amola maruba.
31 Bamalire kumasoma, basima bwenene bulala ebinwa byalirimo byalibahebere omurhima.
32 Bulala Yuda na Sila nabo baliri balebi, baheba bene-berhu omurhima n’okubakomeza kugerera majambo manene.
33 Babere bamala yi chihe chilebe, bene-berhu babaleka bagaluke emunda ababarhumaga bali. Bababwira bagende n’omurhula.
34 ——
35 Aliko Paulo na Barnaba bayorha e Antiyokiya, bowe haguma n’abandi bantu banene eyi bali bayigiriza n’okutangaza emyazi minja y’echinwa cha Yehova.
36 Enyuma wa siku zilebe, Paulo abwira Barnaba ntya: “Rhuje rhwagaluka rhulambagirire bene-berhu ba mu buli vile emunda rhwatangazaga echinwa cha Yehova, rhulole gurhe bali.”
37 Barnaba alilonzeze bagende na Yowane onayirikwa Marko.
38 Aliko Paulo abona oku kurhali kwinja bagende naye bulala alibalekere e Pamfiliya, arhanagendaga nabo omu kasi k’okuhubiri.
39 Echola charhuma barhongana bwenene, bava balekana. Barnaba arhola Marko baja omu chombo babalamira e Kipro.
40 Paulo naye achishoga Sila bagenda naye, eyi bene-berhu bamamala kuhemera Paulo olukogo lwa Yehova rhurhakwanene omu sala.
41 Agerera e Siriya ne Kilikiya, eyi ali akomeza ebibaga.
