Ebijiro by’Entumwa 8:1-40
8 Sauli naye aliyemerere Stefano ayirhwe.
Mw’ezola siku echibaga che Yerusalemu charhondera kulibuzwa bwenene; abanafunzi boshi olekere entumwa balibirha, bashandala eyi n’eyi omu materitware me Yudeya ne Samariya.
2 Aliko abalume baliyubahire Mungu baheka omubiri gwa Stefano baja kuguhamba, bajira n’echiliyo chinene eju yage.
3 Aliko Sauli arhondera kurhera echibaga. Aliri aja mu buli nju, anagenda akulula abalume n’abakazi anabakabula omu prizo.
4 Chiro akaba ntyo, balala balibirhaga baliri bagera omu chihugo eyi bali batangaza emyazi minja y’echinwa cha Mungu.
5 Filipo ava ayandagalira omu vile ye Samariya, arhondera kubahubiri oku bilolere Kristu.
6 Abantu kamama boshi haguma baliri baseza obwenge oku binwa Filipo aliri aderha, oku bali bamuyunviriza eyi banali balola ebisomerene aliri akola.
7 Bulala bantu banene baliri mw’abazimu, n’abola bazimu baliri bayama bwenene n’okubarhengamo. Afumya na bantu banene balihunzize, n’ebilema.
8 Hava haba obusime bunene bwenene mw’eyola vile.
9 Mw’eyola vile mwaliri omulume mpu ye Simoni, wagendaga akola eby’obushake n’okusomeza abantu be Samariya, ey’ali achihala mpu ali muntu okomere.
10 Boshi kurhenga oku mudorho kugera oku mukulu, baliri bamuyunviriza bwinja n’okuderha: “Emisi minene ya Mungu enakola m’oyula muntu.”
11 Baliri bamuyunviriza bulala hali hamagera siku zinene ey’anabasomeza kugerera obushake bwage.
12 Aliko amango baliri bachizera Filipo waliri ahubiri emyazi minja y’Obwami bwa Mungu n’ezino lya Yesu Kristu, abalume n’abakazi baliri babatizwa.
13 Simoni yewe yenyine aba mwemezi, n’enyuma y’okubatizwa agenderera kukulikira Filipo; aliri asomerwa okubona ebisomerene n’ebijiro by’emisi byaliri byakolwa.
14 Amango entumwa zaliri e Yerusalemu ziyunva oku abantu be Samariya bayemerere echinwa cha Mungu, barhuma yi Petro na Yowane.
15 Bayandagalirayo, babasalirira yi bapata eroho lichesibwa.
16 Bulala ntaye n’omuguma lyali lyayinjireko mubo, si bali babatizwe omu zino lya Waliha Yesu konyine.
17 Nantyo Petro na Yowane babahira kw’efune, bava barhondera kupata eroho lichesibwa.
18 Simoni abwene oku abantu bali bapata eroho lichesibwa amango entumwa zamabahira kw’efune, abaha efuranga,
19 aderha: “Nani mumpage obola buhashe, omu kuntu omuntu yeshi-yeshi nahira kw’efune apate eroho lichesibwa.”
20 Aliko Petro amubwira: “Efuranga zawe zihere haguma nawe, bulala oli wawaza mp’oluhembo Mungu anahaana oku busha woyo walugula kugerera efuranga.
21 Orhagwerhe echigabi haba n’ehityu mw’akala kasi, bulala omurhima gwawe gurhali oku mustari embere za Mungu.
22 Che chirhumire ohungame obubi bwawe, onalakirire Yehova omu kuntu akaba byakashobokana omuhigo gubi g’omurhima gwawe gubabalirwe;
23 bulala nabwene ok’oli sumu lilulire bwenene onali muja w’ebintu birhakwanene.”
24 Simoni abashubiza: “Mulakirire Yehova mumumpemere nta chintu n’echiguma omu bimwaderhere chimpikirage.”
25 Bamalire kuhaana obuhamirizi bwinja-bwinja n’okuderha echinwa cha Yehova, bagaluka e Yerusalemu bagenda batangaza emyazi minja omu mavilaje manene m’Abasamariya.
26 Aliko malayika wa Yehova aderhesa Filipo, amubwira: “Genda, ogane eside omu barabara lirhengerere e Yerusalemu liyandagalire e Gaza.” (Elila liba barabara ly’omu rungu.)
27 Agenda, abona Omunyaetiyopiya waliri mukozi w’oku bwami waliri akolera Kandake mwamikazi w’Abaetiyopiya, ye wanaliyimangire ebikulo byage byoshi. Abaga eyi alijire e Yerusalemu kuharamya.
28 Abere ali agaluka ey’ayikere omu mutugari gwage, agenda asoma n’omulenge omulebi Isaya.
29 Eroho lyabwira Filipo ntya: “Genda ohike ku gulira mutugari oyorhe hofi nago.”
30 Filipo agenda alibirha eburhambi b’omutugari, ayunva y’asoma omulebi Isaya n’omulenge, amubaza: “Onali wayunva eby’oli wasoma si?”
31 Amushubiza: “Aliko si, gurhe nakabiyunva na nta muntu wanyerekeze?” Ava ahema Filipo ayikale haguma naye omu mutugari.
32 Echigabi ch’olwandiko aliri asoma che chinola: “Ahekerwe oku bago nka ntama, na nka kulala omwana gw’entama guba gusirire embere y’oli wagucha amoya naye arhabumbwire obunu bwage.
33 Amango baliri bamukoza eshoni, bamulya ehaki yage. Inde nji wabala bwinja-bwinja emyazi yoshi y’echizazi chage? Bulala akalamo kage kakulirwe oku gulu.”
34 Oyola mukozi w’oku bwami abwira Filipo: “Inkuhemere wekalamawe, ombwire, omulebi y’aderha ebila oku bilolere nde? Oku bilolere yewe yenyine changwa oku bilolere owindi muntu?”
35 Filipo arhola omwazi, arhonderera k’olola lwandiko lon’olo, amutangaziza emyazi minja oku bilolere Yesu.
36 Oku banali bagenderera, bahika ahali amenji. Oyola mukozi w’oku bwami aderha: “Tala amenji, bichi bimbuzize kubatizwa?”
37 ——
38 Ava aderha oku bayumanze omutugari, Filipo n’oyola mukozi w’oku bwami bayandagalira omu menji, Filipo amubatiza.
39 Babere bazamuka barhenga omu menji, ahola han’aho eroho lya Yehova lyaheka Filipo, oyola mukozi w’oku bwami arhachimubonaga aliko agenda ey’aherhe obusime.
40 Filipo achibugana eyi akola ali e Ashidodi, agera mw’eyola teritware ey’ali agenda atangaza emyazi minja omu ma vile moshi kugera e Kayizariya.
