Ebijiro by’Entumwa 28:1-31
28 Rhwagerere eshi eyi rhuli bagumaguma, rhwarhegera oku echizimba rhuliko banachihamagala Malta.
2 N’abantu b’ahola barhukolera oku bwinja bwenene. Bachana omuliro yi rhukaluka banarhukaribisa rhweshi bwinja bulala envula yaliri yarhoga haliri n’emboho.
3 Paulo arhola omufungo gw’eshali aguheba oku muliro, empiri yayunvirhe echuka yava yarhenga m’ogola muliro yachizingira oku kuboko kwage.
4 Abantu b’ahola babwene eyola njoka y’esumu enanabire oku kuboko kwa Paulo, babwirana ntya: “Kweri oyula muntu ali munizi. Chiro akaba oku afumire enyanja, e Haki* erhamuyemerere agenderere kulama.”
5 Aliko Paulo akungurhira eyola njoka omu muliro na ntako abere.
6 Baliwazize oku arhunda changwa ahena aho han’aho anafa. Babere bamalindira bisanzi binene n’okubona oku nta chintu chibi chamuhikire, bahindamula amawazo mabo barhondera kuderha oku ali mungu.
7 Hofi n’ahola haliri amashwa m’omukulu w’echola chizimba onayirikwa Publiyo, arhukaribisa omu mwage, rhwamala mu siku esharhu ey’ali arhuha byoshi rhukenere.
8 Eshe wa Publiyo alilyamire ey’agwerhe ehoma ey’analwere obulwala b’okuhara eshagama. Paulo aja omw’aliri, asalira, amuheba kw’efune amufumya.
9 Enyuma w’ebyola, abantu boshi baliri kw’echola chizimba balwere nabo barhondera kuyinja emunda Paulo ali anabafumya.
10 Balirhuhere na bintu binene binja, n’amango rhulonza kugenda, barhuha byoshi rhwalikenere.
11 Enyuma wa myezi esharhu, rhwabalama omu chombo chaligwerhe esanamu ya “Bagala ba Zeu” oku mulemu. Chaliri charhenga e Alegzandriya chagezezaga echihe ch’emboho kw’echola chizimba.
12 Rhwayimanga oku poro ye Sirakusa, rhwamala ha siku esharhu;
13 rhwarhenga ahola rhwahika e Regiyamu. Olusiku lwakulikiragaho harhengerera echihusi chahulukiraga engambo z’eside n’olusiku lwa kabiri rhwahika e Puteoli.
14 Rhwabugana bene-berhu eyola munda barhurhebereza rhuyorhe nabo siku mushanvu, naho rhwayerekeza e Roma.
15 Bene-berhu bayunvirhe oku rhuli rhwaja emunda bali, bayinja kurhulingira ahantu hayirikwa Soko Apiyo n’ahanayirikwa Nju Esharhu z’Abahisi. Paulo ababwene, abwira Mungu koko, naho achiyunva amagwarha emisi.
16 Buzinda rhwagerere e Roma, bayemerera Paulo abere yenyine omu yage nju aliko bamuha omusoda w’okumulanga.
17 Chiro akaba ntyo, ahamagala abalume bagwerhe ebyeo b’Abayahudi. Babere bamachigusha haguma, ababwira ntya: “Bane-berhu, chiro akaba oku nta chintu chibi najirire olubaga changwa okuvuna emigenzo ya bashokuliza berhu, nalifungirwe e Yerusalemu n’okuhebwa omu fune z’Abaroma.
18 N’enyuma y’okunsambisa, balilonzeze banshwekule bulala nta mpanvu n’enguma balibwene yakarhuma banyirha.
19 Aliko bulala Abayahudi balilahire, nabona oku mpeke olushinja lwani emwa Kayizari, arhali kuderha oku hali echintu ngwerhe nasidaka eshanja lyani.
20 Echola che chirhumire nalilonzeze imbabone inanganire nenyu bulala inshwekerwe mw’amala mapingu eju y’obulangalire bw’Abaizraeli.”
21 Bamubwira ntya: “Nta maruba rhwabwene marhengerere e Yudeya maderhere oku bikulolere na nta mwene-werhu wayinjire changwa warhengere eyola munda akayinja kurhubalira changwa akaderha echintu chibi oku bikulolere.
22 Aliko rhubwene oku kuli kwinja rhukuyunvirize yi rhumenya amawazo mawe, bulala kweri rhumenyere oku efasi zoshi bali baderha kubi elyola dini lihyahya.”
23 Bava bapanga olusiku babuganana naye, naho bayinja ah’alipangire eyi bali banene bwenene. Na kurhondera esezi kugera egolo, abafasiriya oku bilolere eyola myazi omu kuhaana obuhamirizi bwinja-bwinja eju y’Obwami bwa Mungu ey’ali abayigiriza oku bilolere Yesu omu kukolesa Amarhegeko ma Musa n’Abalebi.
24 Baguma barhondera kuyemera eby’aliri aderha; abandi barhabiyemeraga.
25 Bulala barhayunvikanaga, barhondera kugenda, Paulo aderha ntya:
“Eroho lichesibwa lyaligwerhe empanvu y’okubwira bashokuliza benyu ntya kugerera omulebi Isaya:
26 ‘Ogende emw’abala bantu obabwire: “Kweri nji mwayunviriza aliko eyi ntacho mwayunva, nji mwalola aliko eyi ntacho mwabona.
27 Abala bantu barhayunva. Banayunviriza aliko eyi barhajira ebi bayunvirhe; banafunga amarhwiri mabo n’okuzibya amasu mabo omu kuntu barhayunvaga barhanabonaga chintu. N’eju y’echola barhayunva bichi bakwanene kujira, nantyo barhahindamuka bakayinja emunda indi imbafumye.”’
28 Bobola mumenye ok’obula buchunguke burhengere emwa Mungu bwarhumirwe emw’abantu b’amashanja; kweri bowe babuyunviriza.”
29 ——
30 Amala myaka ebiri omu nju alipangiremo, aliri akaribisa oku bwinja boshi baliri bayinja emunda ali,
31 anabahubiri oku bilolere Obwami bwa Mungu n’okubayigiriza oku bilolere Waliha Yesu Kristu buzira buba na buzira kujira echamubuza.
Mahugulo m'efo
^ Chirhengere omu chinwa che Chigiriki Diʹke, chiyerekene nkabaga mungu w’omukazi w’okuchiholera changwa ehaki y’okufa chakuwaza.
