Ebijiro by’Entumwa 24:1-27
24 Enyuma wa siku erhano, omudahwa mukulu Ananiya ayandagala na bashamuka baguma n’omuntu w’okubasambira mpu ye Tertulo, basidaka Paulo embere za guvernere.
2 Bahamagere Tertulo, arhondera kusidaka Paulo omu kuderha ntya:
“Bulala rhuli rhwasiimira murhula gunene eju yawe, na bulala onapanga ebintu embere w’akasanzi, ebintu bili byaba bwinja mu linola shanja,
3 esiku zoshi na buli hoshi rhuli rhwachibonera ebyola, bobola rhulonzeze kukubwira koko bwenene, Mukengwa bwenene Feliksi.
4 Aliko yi nta kurhola kasanzi kanene, nkuhemere wekalamawe, oku bwinja bwawe, orhuyunvirize bugeke.
5 Bulala rhwabwene ok’oyula mulume ali muntu oli walerha akavulindi, ali alerha akalaba omu Bayahudi b’oku gulu lyoshi anali mukulu w’edini lihyahya ly’Abanyanazareti.
6 Kandi alilonzeze kuzingisa ehekalu, che charhumaga rhwamufarha.
7 ——
8 Wachibonera woyo wenyine hanola omusambisa oku ebila rhwamusidakireko bili by’okuli.”
9 Abayahudi nabo bamusidaka, banayemeza okw’eyola myazi eli y’okuli.
10 Amango guvernere asimira Paulo oku aderhe, Paulo ashubiza ntya:
“Inyinji bwinja oku hamagera myaka minene ey’oli muzuzi w’elila shanja che chirhumire ingwerhe obusime b’okuchifasiriya embere zawe.
11 Wenyine wakanabaza banakubwira oku harhaza kugera siku zirhalukire 12 kurhenga inzamukiire e Yerusalemu kuharamya;
12 barhambuganaga yinajira obuhaka n’omuntu yeshi-yeshi omu hekalu changwa mpu nderhe akavulindi omu bantu, habe omu masinagogi changwa omu vile.
13 Barhakagala kukuyereka bwinja-bwinja oku ebila bansidakire bili by’okuli.
14 Aliko echinyemerere embere zawe che chinola: indi nakolera Mungu akasi kachesibwa omu kukulikira enjira bali bayirika “dini lihyahya.” Omu bukweri, inankulikira byoshi bili omu Marhegeko n’ebiyandikirwe omu Balebi.
15 Inamperhe obulangalire mu Mungu, obulangalire abala bantu nabo bali balingiriza; oku nji haba obufuke bw’abanyakunali n’abarhali banyakunali.
16 Echila che chirhumire esiku zoshi inanchihangana kugwarha ezamiri zichere embere za Mungu n’abantu.
17 Bobola enyuma wa myaka minene, nava nagaluka e Yerusalemu eyi nyinjire kuha abakene b’omu shanja lyani oburhabale n’okuhaana entulo.
18 Oku nandi najira ebyola, bambugana omu hekalu eyi ndi nachichesa omu kukulikira emigenzo, aliko barhambuganaga eyi ndi omu chigusho ch’abantu changwa mpu ndi nalerha akavulindi. Aliko haliri Bayahudi baguma barhengereraga omu provense ye Aziya.
19 Abola babalikwanene kuyinja kunsidaka emunda oli akaba kweri bagwerhe echibakansidakako.
20 Changwa abala bantu bali hanola baderhe bonyine akaba hali egosa balimbweneko amango naliyimangire embere we Sanendrini,
21 olekere ogula mwazi gonyine naderhaga n’omulenge gunene amango naliyimangire ahagarhi kabo: “Indi nachirwa olubanja zene eju y’obufuke bw’abafire!’”
22 Aliko bulala Feliksi alimenyere bwinja-bwinja oku bilolere eyola Njira y’Okuli, aderha oku nji basamba agandi mango, ababwira ntya: “Nji nabachira olushinja hanola omukulu w’abasoda Lusiya ayinja.”
23 Arhegeka omukulu w’abasoda oku bagenderere kulanga Paulo, aliko bamulekere buhuru bugeke banaleke bera bage baleme bamushishikala.
24 Enyuma wa siku zilebe, Feliksi ayinja na mukage Drusila waliri Muyahudikazi, arhuma abantu baje kuhamagala Paulo, arhondera kumuyunviriza amango aliri aderha oku bilolere obwemere mu Kristu Yesu.
25 Aliko oku Paulo anali aderha oku bilolere okunali, okuchigala n’oku bilolere olusiku l’okucha olubanja lwayinjire, Feliksi ayubaha amubwira ntya: “Orhange ogende nji nashuba kukuhamagala hanola nj’impata akasanzi.
26 Agola mango gan’ago alilangalire oku Paulo amuha efuranga. Eju y’echola, aliri azigana kurhuma abantu bamuhamagale aganire naye.
27 Aliko habere hagera myaka ebiri, Porkiyo Festo agombola Feliksi; na bulala Feliksi alilonzeze Abayahudi bamusime, aleka Paulo omu prizo.
