Ebijiro by’Entumwa 4:1-37
4 Petro na Yowane babere bali baganira n’abantu, abadahwa, omukulu w’abapolisi b’ehekalu, Abasadukayo, bayinja emunda bali.
2 Baligayire bulala entumwa zaliri zayigiriza abantu n’okutangaza oku mugaragaro obufuke bwa Yesu.
3 Bava babafarha, babashweka kugera olusiku lwakulikiragaho bulala lyalikala lili golo.
4 Aliko banene omu bayunvaga elyola jambo baba bemezi, n’oluganjo lw’abalume lwahikira hofi 5 000.
5 Olusiku lwakulikiragaho, abarhambo, abashamuka n’abandisi bajira embuganano omu Yerusalemu,
6 haguma n’omudahwa mukulu Anasi, Kayafa, Yowane, Alegizandre, na boshi b’omu mulala g’omudahwa mukulu.
7 Bayimanza Petro na Yowane ahagarhi kabo barhondera kubabaza: “Ku buhashe buhe changwa omu zino lya nde mwajiraga ebila?”
8 Petro ababwira ntya ey’ayunjwire eroho lichesibwa:
“Barhambo n’abashamuka,
9 akaba rhuli rhwasambiswa zene eju y’echijiro chinja omuntu w’echilema akolerwe, n’akaba mulonzeze mumenye inde wamufumyaga,
10 mweshi mumenye n’abantu be Izraeli boshi bamenye oku omu zino lya Yesu Kristu we Nazareti mwamanikaga oku murhi aliko Mungu amufula, oyula muntu ayimangire hanola ey’aherhe amagala menja.
11 Yesu ye ‘bale mwabo bantu banayumbaka mwabonaga oku ntacho limalire, aliko lye lyayinjire kuba bale lizibuzibu ly’oku pembe.’
12 Echindi, nta windi muntu wakalerha obuchunguke, bulala nta lindi zino abantu bahaabirwe eshishi w’ezuba rhwakachunguka kugerera kulyo.”
13 Babwene okuntu Petro na Yowane yibaderha buzira buba, n’okumenya oku baliri bantu ba ntyantya barhajaga oku masomo,* basomerwa. Barhegera oku baliri na Yesu.
14 Bulala baliri babona oyola muntu bafumyaga ayimangire haguma nabo, babula bichi bakaderha.
15 Bava babahulusa omu chumbi lye Sanendrini, barhondera kuhanulana,
16 babazana: “Gurhe rhujirage abala bantu? Bulala kweri echisomerene chikomere chakolerwe kubagererako, abantu boshi be Yerusalemu bachibwene, rhurhakanagala kuhakana ebyabere.
17 Y’ogula mwazi gurhagenderera kushandala omu bantu boshi, rhubayubahise rhunababwire oku nta muntu n’omuguma bachibwirage oku bilolere elyola zino.”
18 Bava babahamagala bababwira oku ntacho bachiderhage changwa okuyigiriza oku bilolere ezino lya Yesu.
19 Aliko Petro na Yowane babashubiza: “Akaba bibonekene omu masu ma Mungu oku kuli kwinja okubayunviriza ahali h’okumuyunviriza, muchishoge mwenyine.
20 Aliko rhwabo rhurhakaleka kuderha oku bilolere ebintu rhwabwene n’okuyunva.”
21 Bobola bamalire kushuba kubayubahisa bwenene, babalikula bulala nta mpanvu yoshi-yoshi balibwene y’okubaha obuhane n’eju y’abantu baliri ahola, bulala boshi baliri bakuuza Mungu eju y’ebyabaga.
22 Oyola muntu bafumyaga kugerera echisomerene, aligwerhe myaka erhalukire 40.
23 Bamalire kulikulwa baja kubalira ababo banafunzi eby’abakulu b’abadahwa n’abashamuka bababwirire.
24 Bayunvirhe ntyo, boshi balika omulenge basalira Mungu baderha:
“Waliha Namahanga, woyo we walemaga embingu, egulu, enyanja na byoshi bilimo,
25 we wanaderhaga ntya omu kukolesa eroho lichesibwa kugerera obunu b’omukozi wawe shokuliza werhu Daudi: ‘Bulagurhe amashanja makalihire n’abantu bali bajira emihigo* erhagwerhe ech’emalire?
26 Abami b’egulu bachirheganyize, n’abarhegesi bachihebere haguma nka muntu muguma yi balwisa Yehova n’omushigwa wage.’
27 Bulala kweri Herode, Pontiyo Pilato haguma n’abantu b’amashanja n’Abaizraeli bachihebere haguma mw’enola vile yi balwisa omukozi wawe muchesibwa Yesu washigaga amavurha,
28 bachigusha haguma omu kujira ebi wabaga waderhere. Byabaga ntyo bulala ogwerhe emisi, byanalipatene n’obulonza bwawe.
29 Lero Yehova oyunve gurhe bali barhuyubahisa, onarhabale abaja bawe bagenderere kutangaza echinwa chawe buzira buba,
30 amango wamalambula okuboko kwawe y’ofumya, n’amango ebisomerene n’ebimenyeso byamakolwa kugerera omukozi wawe muchesibwa Yesu.”
31 Amango bamala kusalira esala ly’okulakirira Mungu, aha baliri hahinda omusisi, boshi bayunjuzwa eroho lichesibwa barhondera kuderha echinwa cha Mungu buzira buba.
32 Echindi, abantu kamama babaga bemezi baliri omu buguma, na ntaye mubo waliri aderha oku echintu aherhe chili chage yenyine, s’ahubwe baliri babiheba byoshi haguma.
33 Kugerera misi minene, entumwa zagenderera kuhaana obuhamirizi oku bilolere obufuke bwa Waliha Yesu na boshi bahaabwa olukogo lunene lwa Mungu.
34 Kweri, ntaye n’omuguma mubo walibulire echintu, bulala abaligwerhe amashwa changwa enju boshi baliri babiguza banalerha efuranga babwene,
35 banaziha entumwa. Buzinda banagabira buli muguma nk’oku obulagirire bwage bunali.
36 Yosefu, ey’entumwa zagendaga zayirika Barnaba (amango lyamatafsiribwa k’okuderha “Mwana we Chirhulirizo”), aliri Mulawi waburhwaga e Kipro,
37 aligwerhe eshwa aliguza alerha efuranga aziha entumwa.
