Ebijiro by’Entumwa 14:1-28
14 Bahikire e Ikoniyamu, baja omu sinagogi y’Abayahudi barhondera kuyigiriza bwinja omu kuntu Abayahudi na Bagiriki banene baba bemezi.
2 Aliko Bayahudi baguma barhagwarhaga obwemere, bava bashumika abantu b’amashanja bapinge bene-berhu.
3 Paulo na Barnaba balegama eyola munda eyi bali bayigiriza buzira buba oku buhashe bwa Yehova wahaanaga obuhamirizi bw’emyazi oku bilolere olukogo lwage rhurhakwanene, omu kuyemera ebisomerene n’ebimenyeso bikolwe kugerera abola balume.
4 Chiro akaba ntyo, abantu b’omu vile bachigabamo, baguma baja oku lunda lw’Abayahudi n’abandi oku lunda lw’entumwa.
5 Abantu b’amashanja, Abayahudi n’abarhambo babo balonza babakolere oku kasuzaguro n’okubabanda amabale.
6 Bamenyere ntyo, balibirhira omu mavile me Likaoniya, e Listra, e Derbe n’omu mavilaje malizungulukire amola mavile.
7 Bagenderera kutangaza emyazi minja eyola munda.
8 Omu Listra mwaliri mulume muguma w’echilema waliyikere ahashi. Aliri chilema ch’amagulu kurhenga aburhwa. Arhachigeraga alambagira haba n’eliguma.
9 Oyola mulume aliri ayunviriza amango Paulo aliri aderha. Paulo abere amulola bwenene, abona okw’aherhe obwemere oku akamufumya,
10 amubwira ntya n’omulenge gunene: “Yimanga.” Oyola mulume ava ashabira arhondera kulambagira.
11 Abantu kamama babwene ebi Paulo ajirire, bayama ntya omu lulimi lwe Chilikaoniya: “Bamungu bachijirire nka bantu bamarhuyandagalira!”
12 Barhondera kuhamagala Barnaba Zeu na Paulo Herme, bulala yewaliri ayerekeza enganiro.
13 Omudahwa wa Zeu, waligwerhe ehekalu oku mulyango gw’evile, alerha empanzi n’ebintu bili nka bishema by’amauwa oku milyango mizibuzibu. Yewe n’abantu kamama balilonzeze kuhaana enterekero.
14 Entumwa Barnaba na Paulo bayunvirhe ntyo, babera emyambaro yabo, bashabira omu bantu n’okuderha n’omulenge gunene:
15 “Bazawee, bulagurhe muli mwajira ebili ntya? Nerhu rhuli bantu bagwerhe obuzamba buli kuguma n’obwenyu. Rhunali rhwabatangaziza emyazi minja yi mulekana n’ebila bintu birhagwerhe kamaro, muyinje emwa Mungu olamire walemaga embingu, egulu, enyanja na byoshi bilimo.
16 Omu bizazi bya mira, Mungu alilekere abantu ba buli shanja bajire ebi balonzeze,
17 chiro akaba ntyo, arhalekaga kuyerekana gurhe aba omu kukola ebinja; abaha envula, ebihe by’okuyeza, abaha bilyo binene n’okuyunjuza emirhima yenyu m’obusime.”
18 Na chiro akaba oku balibabwirire ebyola byoshi, birhalibayorohere okubuza abola bantu kamama babahe enterekero.
19 Aliko Bayahudi baguma bahika ahola eyi barhenga e Antiyokiya ne Ikoniyamu bashumika abola bantu kamama, babanda Paulo amabale n’okumubululira embuga w’evile eyi bawazize oku afire.
20 Abanafunzi bamuzungulukire, ayimanga agaluka omu vile. Olusiku lwakulikiragaho, aja e Derbe na Barnaba.
21 Bamalire kutangaza emyazi minja mw’eyola vile n’okujira mu banafunzi banene, bagaluka e Listra, e Ikoniyamu ne Antiyokiya.
22 Oku banali eyola munda, bakomeza abanafunzi n’okubahira omurhima basere omu bwemere omu kubabwira ntya: “Rhukwanene kugera mu malibuko manene embere rhuje omu Bwami bwa Mungu.”
23 Echindi, bashimika abashamuka mu buli chibaga, basalira n’okuchishalisa,* babahira omu fune za Yehova eyi balikala bagwerhe m’obwemere.
24 Buzinda, bagerera omu Pisidiya baja e Pamfiliya.
25 Bamalire kutangaza echinwa omu Perga, bayandagalira e Ataliya.
26 Eyola munda barhola echombo baja e Antiyokiya, emunda bene-berhu bahemaga Mungu omu sala ayereke Paulo na Barnaba olukogo rhurhakwanene, eju y’akasi babaga bamamala.
27 Bahikireyo, bahamagala abantu boshi b’omu chibaga, barhondera kubalirabo byoshi Mungu ali akolere kubagererako, n’okuntu achinguliraga abantu b’amashanja omulyango g’obwemere.
28 Nantyo bageza bisanzi binene haguma n’abanafunzi.
Mahugulo m'efo
^ Ao “okujira amafungo, okuchibuza kulya n’okunywa.”
