Ebijiro by’Entumwa 12:1-25
12 Mw’agola mango mwami Herode arhondera kulibuza bantu baguma b’omu chibaga.
2 Ayirha Yakobo mwene-wabo Yowane n’engorho.
3 Abere abona okw’ebyola byasimisize Abayahudi, aderha oku bafarhe Petro naye. (Ebyola byabaga olusiku lw’Emigati erhali mu Levire.*)
4 Amufarha, amuhira omu prizo, amuchungisa bigusho bine bya basoda bane-bane, eyi alonzeze amuhuluse n’okumulerha embere z’abantu enyuma we Pasaka.
5 Amango Petro aliri omu prizo, echibaga chaliri chamusalirira bwenene emwa Mungu.
6 Amango Herode aliri hofi kumuhulusa, obola budufu balishwekere Petro mu bulegule bubiri ey’alyamire ahagarhi ka basoda babiri, n’abalanzi baliri embere z’omulyango eyi bali balanga e prizo.
7 Aliko, tala! Malayika wa Yehova ayinja ayimanga ahola, n’omwangaza gwakoleza omu chumba ch’eprizo. Abanda ku Petro omu mbavu amubwira: “Yimanga juba-juba!” Obulegule bwalishwekere amaboko mage bwarhoga.
8 Malayika amubwira: “Yambala omwambaro gwawe oyambale n’ebirato.” Ava ajira ntyo. Buzinda amubwira: “Yambala egoti lyawe onkulikire.”
9 Petro ahuluka amukulikira, aliko arhalimenyere oku ebi malayika aliri ajira byaliri by’okuli. Kweri, aliwazize oku ali abona ebibonekezi.
10 Barhaluka abalanzi b’oburhanzi n’abakabiri, bahika oku mulyango guzibuzibu gw’echuma gujire omu vile, gwachichingula gonyine embere zabo. Bahulukire bagera mu njira nguma, ahola han’aho malayika amuleka.
11 Petro abere arhegera ebili byaba, aderha: “Namaja namenya oku kweri Yehova alirhumire malayika wage anyokole omu fune za Herode na mu byoshi Abayahudi balilangalire ku byarhengerera.
12 Enyuma w’okumenya ntyo, agana emwa Mariya nyina wa Yowane onayirikwa Marko. Bantu baguma balibuganene omola mwage banaliri basalira.
13 Abere akongorha oku mulyango guzibuzibu gw’embuga, mujakazi muguma mpu ye Roda aja kulola inde oyola.
14 Abere arhegera ku mulenge gwa Petro, asima bwenene omu kuntu ahali h’okumuchingulira, alibirhira omu nju aja kubwira abalimo oku Petro ayimangire oku omulyango guzibuzibu gw’embuga.
15 Bamubwira: “Inkabaga wasirehere.” Aliko agenderera kubabwira oku kweri Petro yeli oku mulyango. Barhondera kuderha: “Malayika wage oyola.”
16 Aliko Petro ayorha ahola ey’ali akongorha oku mulyango. Bachingwire, bamubona basomerwa.
17 Abasimira n’okuboko oku basire. Abalirabo gurhe Yehova amukulaga omu prizo aderha ntya: “Mubibalire Yakobo na bene-berhu.” Ahuluka agenda eyindi fasi.
18 Bwachere, abasoda bayunva bamahwerwa bwenene bulala barhalimenyere bichi byahikire Petro.
19 Herode amulonzeza buli hoshi aliko arhamubonaga, abaza abalanzi ebibazo na buzinda arhegeka baje kubaha obuhane. Arhenga e Yudeya ayandagalira e Kayizariya, aberayo siku zigeke.
20 Agola mango Herode aligwerhe oburhe eju y’abantu be Tiro n’abe Sidoni. Eju y’echola baja emwage eyi bagwerhe muhigo muguma, aliko barhanga kuyunvikana na Blasto waliri mwimangizi w’enju ya mwami, naho baja bahema bajire omurhula, bulala ebilyo bagendaga bapata omu chihugo chabo byaliri byarhenga omu chihugo cha mwami Herode.
21 Olusiku bachishogaga lwahikire, Herode ayambala emyambaro y’echami ayikala oku chichumbi ch’okucha emanja arhondera kuderha ejambo embere z’abantu.
22 Naho abantu balibuganene ahola barhondera kuderha ntya n’omulenge gunene: “Ogula guli mulenge gwa mungu, gurhali mulenge g’omuntu.”
23 Ahola han’aho malayika wa Yehova amulwaza obulwala, bulala arhahere Mungu obukuuze, emivunyu yarhondera kumulya, na buzinda afa.
24 Aliko echinwa cha Yehova chagenderera kuja embere n’okumenyikana buli hoshi.
25 Barnaba na Sauli bamalire akasi k’okuhaana oburhabale omu Yerusalemu, bagaluka barhola Yowane onayirikwa kandi Marko bagenda naye.
Mahugulo m'efo
^ Ao “ngezo.”
