Ebijiro by’Entumwa 13:1-52
13 Omu chibaga che Antiyokiya mwaliri abalebi n’abalimu: Barnaba, Simioni wagendaga ayirikwa kandi Nigeri, Lusiyo we Kirene, Manaeni wasomaga na guvernere Herode na Sauli.
2 Babere bali bakolera Yehova n’okuchishalisa,* eroho lichesibwa lyaderha ntya: “Mumpebere Barnaba na Sauli eburhambi eju y’akasi nabahamagaliraga.”
3 Bamalire kuchishalisa* n’okusalira, baheba Barnaba na Sauli kw’efune babarhuma bagende.
4 Abola balume barhumwaga n’eroho lichesibwa bayandagalira e Seleukiya, barhola y’echombo baja e Kipro.
5 Bahikire e Salami barhondera kutangaza echinwa cha Mungu omu masinagogi m’Abayahudi. Baliri na Yowane ey’ali abagwasa oku makasi.
6 Babere bamazunguluka echizimba choshi kuhika e Pafo, babugana Muyahudi muguma onayirikwa Bar-Yesu, waliri mushake na mulebi w’obubeshi.
7 Aliri na guvernere Sergiyo Paulo waligwerhe bwenge bunene. Oyola guvernere ahamagala Barnaba na Sauli emwage, bulala aligwerhe enyorha y’okuyunva echinwa cha Mungu.
8 Aliko Elima yekala oyola mushake (bulala ly’ezino lyage elyola amango lyamatafsiribwa) arhondera kubapinga omu kuntu abuze guvernere kugwarha obwemere.
9 Sauli oyirikwa kandi Paulo, ava ayunjula eroho lichesibwa amuseza kw’amasu
10 amubwira ntya: “Ego mulume oyunjulirene buli buko b’obulyalya na buli buko b’obubi, mugala wa Ibilisi, mwanzi wa buli chintu chikwanene; orhaleka kuyinja wahabusa enjira ya Yehova?
11 Tala! Efune ya Yehova eli enyanya zawe, waba mpumi, wamala n’esiku y’orhali wabona omwangaza gw’ezuba.” Ahola han’aho oluhomo* lunene n’omwizimya byamurhogerako, arhondera kumamarha y’ali alonza omuntu wakamufarha efune amuyereke enjira.
12 Oyola guvernere abwene ebyabere agwarha obwemere, bulala enyigirizo za Yehova zalimusomeze bwenene.
13 Paulo n’ababo barhola echombo e Pafo baja e Perga omu Pamfiliya. Yowane abalekayo agaluka e Yerusalemu.
14 Aliko bowe barhenga e Perga baja e Antiyokiya y’omu Pisidiya. Baja omu sinagogi olusiku lwe Sabato bayikalamo.
15 Enyuma y’okusomera abantu Amarhegeko n’eby’abalebi bayandikaga, abemangizi be sinagogi barhuma omuntu abwire Paulo na Barnaba ntya: “Bazawee, bene-berhu, akaba hali echinwa mugwerhe ch’okuheba abantu omurhima, muchiderhe.”
16 Paulo ava ayimanga abasimira n’efune omu kubabwira basire aderha:
“Baizraeli, nenyu mwe munayubaha Mungu, muyunve.
17 Mungu w’Abaizraeli alichishogere bashokuliza berhu, abajira bantu bakomere amango baliri benjiira omu Misri, abakula n’eyola munda kugerera okuboko kwage kugwerhe emisi.
18 N’omu chihe cha hofi myaka 40 alibalembeere amango baliri omu rungu.
19 Amalire kulimbula mashanja mushanvu omu chihugo che Kanani, abaha echola chihugo bachishokola.
20 Ebyola byoshi byabaga mu myaka hofi 450.
“Buzinda abaha abazuzi kugera amango m’omulebi Samweli.
21 Enyuma w’ahola bahema babahe omwami, na Mungu abaha Sauli mugala wa Kishi mulume w’omu buko bwa Benjame, abarhegeka mu myaka 40.
22 Abere amukula oku chirhi ch’obwami, abaha Daudi abe mwami wabo anahaana obula buhamirizi oku bimulolere: ‘Napatire Daudi mugala wa Yese muntu osimisize omurhima gwani, ajira byoshi indonzeze.’
23 Nk’oku anabaga alaganyize, Mungu akuliire Abaizraeli omuchunguzi mpu ye Yesu omu chizazi ch’oyula mulume Daudi.
24 Embere oyola ahike, Yowane abaga atangazize abantu boshi be Izraeli obubatizo buyerekene okuhungama.
25 Aliko amango Yowane aliri hofi kumala akasi kage, aliri aderha ntya: ‘Muwazize oku ndi nde? Arhali nye yewe. Aliko mulole! Hali omuntu wayinja enyuma zani, eyi ntakwanene chiro kukula ebirato bili omu magulu mage.’
26 Bene-berhu, mwabo b’omu luburho l’omulala gwa Abrahamu nenyu mwabo muyubahire Mungu, echila chinwa ch’obuchunguke chirhumirwe emwerhu.
27 Bulala abantu balilamire e Yerusalemu n’abarhegesi babo, barhamumenyaga, aliko amango bakola nka bazuzi, bayeneza ebinwa byaderhwaga n’abalebi binasomwa n’omulenge buli lusiku lwe Sabato.
28 Chiro akaba oku nta gosa balimubweneko lyakarhuma ayirhwa, babwira Pilato oku ayirhwe.
29 Bamalire kuyeneza byoshi biyandikirwe oku bimulolere, bamuyandagaza oku murhi bamulyamikiza omu shinda.
30 Aliko Mungu amufula,
31 na mu siku zinene aliri abonekera balala bagendaga naye kurhenga e Galilaya kuja e Yerusalemu. N’abola babali baha abantu zene obuhamirizi oku bimulolere.
32 Che chirhumire rhuli rhwabatangaziza emyazi minja oku bilolere echilagane bashokuliza bahabwaga.
33 Mungu arhuyenezeze bwinja-bwinja echola chilagane rhwabo bana babo omu kufula Yesu, nk’oku biyandikirwe ntya omu lwimpo lwakabiri: ‘Oli mugala wani; zene nabere yisho.’
34 Mungu amufula omu kuntu arhachigwarhaga omubiri gwakafa changwa gwakabola, ayemeza oku ebyola bili by’okuli omu kuderha ntya: ‘Nji nayeneza echilagane ch’obwimana najiraga na Daudi, echilagane chakachizerwa.’
35 Che chirhumire omu lwindi lwimpo aderhere ntya: ‘Orhakayemera omwimana wawe abola.’
36 Daudi alikolere Mungu omu chizazi chage, afa bamuhamba haguma na bashokuliza bage, ava abola.
37 Aliko olala Mungu afulaga, yewe arhabolaga.
38 “Bobola bene-berhu mumenye oku kugerera oyola muntu indi nabatangaziza obubabale bw’ebyaha.
39 Amarhegeko ma Musa marhakagalire kubajira banyakunali, aliko kugerera olufu l’oyola muntu, Mungu atangaza boshi bagwerhe obwemere oku bali banyakunali.
40 Bobola muchilange omu kuntu ebila byaderhwaga omu bitabu by’abalebi birhabahikira:
41 ‘Muyunve mwabo bagwerhe akasuzaguro, musomerwe munaharabiswe, bulala hali akasi indi nakola omu siku zenyu, akasi murhakayemera chiro hajira omuntu wababwira bwinja-bwinja oku bilolere akola kasi.’”
42 Paulo na Barnaba babere bahuluka, abantu babarhebereza oku nji bashube bababwire kw’eyola myazi oku Sabato yakulikiraho.
43 Bobola embuganano yabere yahwa omu sinagogi, Bayahudi banene n’abantu bayemeraga edini lye Chiyahudi baliri baharamya Mungu, bakulikira Paulo na Barnaba. Paulo na Barnaba baganira nabo omu kubaheba omurhima bayorhe omu lukogo lwa Mungu rhurhakwanene.
44 Olusiku lwe Sabato yakulikiragaho, hofi abantu boshi b’omu vile balibuganene yi bayunviriza echinwa cha Yehova.
45 Abayahudi babwene abola bantu kamama, bayunva obongwa banarhondera kuderha ebinwa by’okudukanga Mungu omu kupinga ebi Paulo aliri aderha.
46 Paulo na Barnaba bava bababwira ntya buzira buba: “Byalihemere echinwa cha Mungu chirhange chitangazwe emwenyu. Aliko bulala mwamachilahira munali mwachibona oku murhakwanene akalamo k’esiku n’amango; mulole! Rhwamaja emw’abantu b’amashanja.
47 Bulala Yehova arhubwirire ntya: ‘Nakushimikire y’oba mwangaza gw’amashanja, omu kuntu oheke obuchunguke kugera oku buzinda bw’egulu.’”
48 Abantu b’amashanja bayunvirhe ntyo, barhondera kusima n’okukuuza echinwa cha Yehova, na boshi baligwerhe omurhima gukwanene akalamo k’esiku n’amango baba bemezi.
49 Olekere nantyo, echinwa cha Yehova chagenderera kuyenera omu chihugo choshi.
50 Aliko Abayahudi bashumika abakazi bakengerwe bwenene banayubahire Mungu n’abashamuka bagwerhe echeo omu vile omu kuntu balibuze Paulo n’okumukabula embuga w’eteritware yabo.
51 Bava babakungurhira oluchuchu lwaliri oku magulu mabo, baja e Ikoniyamu.
52 N’abanafunzi bagenderera kuyunjulirana obusime n’eroho lichesibwa.
