Ebijiro by’Entumwa 21:1-40
21 Rhwabere rhwagala kuchikula kubo, rhwarhola echombo rhwabalamira e Kosi, olusiku lwakulikiragaho rhwahika e Rode, rhwarhengere eyola rhwaja e Patara.
2 Rhwapatire echombo chili chaja e Foinike, rhwajamo rhwasuka.
3 Rhwabere rhwahika aha rhwakalangira echizimba che Kipro, rhwachileka engambo z’ekulembe rhwayerekeza e Siriya. Rhwahika e Tiro emunda echombo chalikwanene kuleka emizigo.
4 Rhwalonza abanafunzi, rhwabapatire rhwabera nabo siku mushanvu. Aliko eju y’ebintu eroho lichesibwa lyabaga lyababishulire, babwira Paulo turu zinene oku arhapimaga alabarha e Yerusalemu.
5 Bobola esiku zerhu rhwalikwanene kugeza eyola munda zabere zahwa, rhwagenderera n’olugenzi lwerhu, aliko abantu boshi kuheba mw’abakazi n’abana barhuherekeza kuhika embuga w’evile. Rhwafukama aha burhambi bw’enyanja rhwasalira
6 n’enyuma waho rhwasezerana. Rhwaja omu chombo nabo bagaluka emwababo.
7 Rhwamaliriza olugenzi lwerhu l’okurhenga e Tiro rhwahika e Tolemayi, rhwalegereza bene-berhu rhwanamala nabo lusiku luguma.
8 Olusiku lwakulikiragaho rhwarhenga eyola munda rhwahika e Kayizariya, rhwaja omu m’omuhubiri Filipo waliri muguma wa mu balala balume mushanvu, rhwaberamo.
9 Oyola mulume aligwerhe banyere bane b’abalamba* baliri bahaana obulebi.
10 Rhwabere rhwamamala yi siku zinene, mulebi muguma oyirikwa Agabo ayandagala kurhenga e Yudeya.
11 Ayinja emunda rhuli, arhola omukaba gwa Paulo achishwekago omu magulu n’omu maboko aderha ntya: “Eroho lichesibwa lyaderhere, ‘Omulume nyina gunola mukaba, intya ku Abayahudi bamushweka e Yerusalemu n’okumuheba omu fune z’abantu b’amashanja.’”
12 Rhwabere rhwayunva ntyo, rhwabo n’abandi bantu baliri ahola rhwarhondera kurhebereza Paulo amenye azamukira e Yerusalemu.
13 Paulo ava aderha: “Bulagurhe muli mwalaka n’okulonza kunvuna omurhima? Mumenye bwinja-bwinja oku ndi tayari arhali kushwekwa konyine si n’okufira e Yerusalemu eju y’ezino lya Waliha Yesu.
14 Rhwabere rhwagambwa kumuyemeza, rhwalekeraho rhwaderha: “Obulonza bwa Yehova bujirike.”
15 Enyuma w’ezola siku, rhwachirheganya, rhwarhondera olungezi l’okuja e Yerusalemu.
16 Rhwagenda n’abanafunzi baguma be Kayizariya, barhuheka emwa Munasoni we Kipro, waliri mwanafunzi wa mira rhwalikwanene kupanga omu mwage.
17 Rhwahikire e Yerusalemu, bene-berhu barhukaribisa n’obusime.
18 Aliko olusiku lwakulikiragaho, rhwagenda na Paulo emwa Yakobo n’abashamuka boshi baliri ahola.
19 Abalegereza, arhondera kubalirabo oku bunene ebintu byoshi Mungu ajirire omu bantu b’amashanja kugerera akasi kage k’okuhubiri.
20 Bamalire kumuyunviriza, barhondera kukuuza Mungu, aliko babwira Paulo ntya: “Mwene-werhu, obwene oku hali ebihumbi by’Abayahudi babere bemezi na boshi bali bakenga bwenene Amarhegeko.
21 Aliko hali emyazi bayunvirhe oku bikulolere ok’oli wayigiriza Abayahudi boshi omu bantu b’amashanja oku baleke Amarhegeko ma Musa, omu kubabwira barhakataga abana babo barhanakulikiraga emigenzo erhula ebaho.
22 Bobola, gurhe rhujage rhwajira? Okuderha okuli barhahaba oku wahikire kuno.
23 Ojire oku rhwakubwira: Rhugwerhe balume bane bajirire echilagane.
24 Ogende nabo muchichese nk’oku emigenzo eyerekene, onalipe byoshi bahema, omu kuntu babagembe enviri. Ahola abantu boshi baja bamenya oku emyazi bali bakuderhako eli y’obubeshi, s’ahubwe oli wachigendesa bwinja onakengere Amarhegeko.
25 Oku bilolere abemezi barhengaga omu bantu b’amashanja, rhwabarhumire esimikiro yerhu omu kubayandikira oku bakwanene kuchiyasa ebintu byahaanirwe nterekero oku sanamu, eshagama, enyamafu n’obumaguza bulolere obubaraga.”
26 Olusiku lwakulikiragaho, Paulo arhola abola balume baja kuchichesa omu kukulikiza emigenzo, aja n’omu hekalu yamenyesa mangochi esiku z’okuchichesa zalikwanene kuhwa na mangochi enterekero yalikwanene kuhaanwa eju ya buli muguma wabo.
27 Ezola siku mushanvu zabere zili hofi kuhwa, Abayahudi barhengereraga e Aziya babwene Paulo omu hekalu bashumika abantu kamama, bamufarha
28 baderha ntya n’omulenge gunene: “Balume be Izraeli, murhurhabale! Oyula ye mulume oli wayigiriza abantu buli hoshi oku bapinge olubaga lwerhu, Amarhegeko merhu n’enola fasi. Kandi alilerhere chiro n’Abagiriki omu hekalu anazingisize enola fasi nchesibwa.”
29 Bulala hali amango balimubwene omu vile eyi ali na Trofimo we Efeso, bawaza oku Paulo alimuhekere omu hekalu.
30 Evile yoshi yahamuka, abantu balibirha haguma bafarha Paulo bamukululira embuga we hekalu n’ahola han’aho bachinga emilyango.
31 Babere bali balonza kumuyirha, bamenyesa omukulu w’echigusho ch’abasoda oku e Yerusalemu yoshi yabere m’olwamo;
32 ahola han’aho arhola abasoda n’abakulu b’abapolisi, bayandagalira juba-juba emunda ali. Abola bantu babere babona oyola mukulu ayinjire n’abasoda, baleka kukubirha Paulo.
33 Enyuma w’ahola, oyola mukulu w’abasoda amuyegera, amufarha arhegeka oku bamushweke mu bulegule bubiri; naho abaza ali nde na bichi ajirire.
34 Aliko mw’abola bantu kamama, baguma baliri bayama chintu chiguma abandi banayama echindi. Na bulala haliri lwamo lunene arhagalaga kumenya bihe bye by’okuli, arhegeka baheke Paulo omu nkambi y’abasoda.
35 Aliko ahikire oku eskaliye, byahema abasoda bamurhalule okwenge abantu balikalihire bwenene,
36 bulala boshi balibakulikire baliri bayama ntya: “Ayirhwe!”
37 Babere balonza kumuyingiza omu nkambi y’abasoda, Paulo abaza oyola mukulu w’abasoda: “Wakanyemerera nkubwire chintu chilebe? Naye amushubiza: “Oyinji e Chigiriki si?
38 Arhali woyo w’olala Mumisri ochizindire kulerha akalaba n’okuheka balume 4 000 baherhe orhweri omu rungu?”
39 Paulo amushubiza: “Okuderha okuli, indi Muyahudi we Tarso ye Kilikiya, indi muntu w’omu vile emenyikene. Bobola inkuhemere wekalamawe, ompe oruhusa inganire n’abala bantu.”
40 Oyola mukulu w’abasoda amalire kumuha oruhusa, Paulo ayimanga oku eskaliye, asimira abantu n’efune omu kubabwira basire. Babere basira aganira nabo omu lulimi lwe Chiebraniya, ababwira ntya:
Mahugulo m'efo
^ Chinwa oku chinwa “babikira.”
