Ebijiro by’Entumwa 27:1-44
27 Babere babona oku rhubalame n’echombo rhuje e Itali, bava baheba Paulo n’abandi bafungwa omu fune z’omukulu w’abasoda w’omu chigusho cha Ogisto oyirikwa Yuliyo omu kuntu abalange.
2 Rhwaja omu chombo chaliri charhenga e Adramitiamu chaliri hofi kubalamira oku maporo malengene mali oku chinyantambi omu provense ye Aziya. Rhwabalama eyi rhuli na Aristarko Munyamakedoniya we Tesalonike.
3 Olusiku lwakulikiragaho, rhwasika e Sidoni, na Yuliyo akolera Paulo oku bwinja omu kumuyemerera aje emwa bera bage omu kuntu bamushishikale.
4 Rhwarhenga eyola munda, rhwabarabanya enyuma w’echizimba che Kipro yi rhuyaka echihusi chaliri charhengerera embere zerhu.
5 Rhwagenderera kubarabanya eburhambi bwe Kilikiya ne Pamfiliya hofi n’eshi, rhwasika oku poro ye Mira e Likiya.
6 Omukulu w’abasoda apata echombo eyola munda chili charhenga e Alegzandriya chaja e Itali, arhubwira rhuje mw’echola chombo.
7 Enyuma w’okumala siku zinene eyi rhuli rhwabalama kubuyabuya, rhwahika e Kinido eyi rhwalibukire. Bulala echihusi chalirhubuzize kugenderera, rhwabarabanya hofi ne Krete e Salmoni.
8 Rhwagenderera kubalama omu malibuko hofi-hofi n’eshi, rhwahika efasi enayirikwa Poro Nyinja yaliri hofi n’evile ye Laseya.
9 Habaga hamagera siku zinene, byanalichirhukomerere okubalama oku nyanja, bulala chiro n’echihe ch’okuchishalisa* ch’Olusiku l’Okushukulira Ebyaha chabaga chahwere, naho Paulo alerha ewazo,
10 aderha ntya: “Balume, imbwene ok’olula lugenzi luli m’obuhanya, rhwaheza bintu binene; arhali emizigo n’echombo byonyine, si n’akalamo kerhu.”
11 Aliko omukulu w’abasoda ayunviriza kapitene w’echombo na nyina echombo ahali h’okuyunviriza ebi Paulo aliri aderha.
12 Bulala eyola poro erhali fasi nyinja y’okuberako amango m’emboho, bantu banene baliri baderha oku bagenderere n’olugenzi omu kuntu balole akaba bagala kugezeza echihe ch’emboho e Feniki yaliri poro ye Krete eyerekeze emashoshokero m’ezuba.
13 Amango echihusi charhengaga engabo z’eside chiba nka charhulera, bawaza oku bahikira omuhigo gwabo, bakula enanga, babona oku bagenderere n’olugenzi eyi bali babarabanya eburhambi we Krete hofi n’eshi.
14 Aliko enyuma wa kasanzi kageke, hava harhengerera echihusi chikalihire chiyirikwa Euroakilo chashurha echola chizimba.
15 Bulala echola chihusi chalishurhire bwenene echombo, rhurhanagalaga kuchilembera, rhwaleka echihusi chiheke echombo emunda chilonzeze.
16 Rhwagera juba-juba hofi n’echizimba chigeke chiyirikwa Kauda omu kuyaka omulaba, aliko birhaliyorohere okuyokola echombo chigeke chalishwekerwe ebwerekeza bw’echombo rhwalirimo.
17 Babere bagala kurhalulira echola chombo chigeke omu chombo rhwalirimo, bashweka echola chombo m’orhwamba na bulala baliyubahire okw’echombo chahukula* akaroyi, bashwekula ebitambara, nantyo omuyaga gwarhondera kushunika echombo.
18 Bulala omulaba gwaliri gwarhuheka eyi n’eyi, olusiku lwakulikiragaho barhondera kuroha emizigo.
19 N’olusiku lwa kasharhu bonyine bakabula ebikoleso byabo by’echombo.
20 Habere hagera siku zinene ezuba n’enyenyezi birhabonekana, eyi n’omulaba gukomere guli gwarhushurha, rhwaheza loshi obulangalire b’okulama.
21 Abantu babere bamala siku zinene burhalya, Paulo ayimanga ahagarhi kabo aderha ntya: “Balume, kweri nka mwayunvaga ehano lyani, murhakabalamire omu nyanja kurhenga e Krete, murhakalibukire ntya na nta bintu mwakahezeze.
22 Aliko mbahemere murhayubahaga, bulala ntaye n’omuguma mu mwabo wafa; chombo chonyine che chashenyaguka.
23 Obudufu bwa zene, Mungu inamparamya n’okukolera akasi kachesibwa, alirhumire malayika wage amayimanga hofi nani,
24 amambwira: ‘Paulo orhayubahaga. Okwanene kuyimanga embere za Kayizari. Tala! Mungu akuyokola woyo n’abala boshi oli wabalama nabo.’
25 Balume, murhayubahaga bulala inchizerere Mungu, byoshi byaba nk’oku banambwiraga.
26 Aliko rhukwanene kukabulwa ku chizimba chiguma ntya.”
27 Obudufu bwe 14 ey’omulaba guli gwarhuheka eyi n’eyi omu nyanja ye Adriya, aha midi y’obola budufu bamatelo barhondera kubona nka rhukala kugera eshi.
28 Bapima enkumbo bapata hofi metre 36, bashegera embere bugeke bashuba kupima bapata hofi metre 27.
29 Na bulala baliyubahire oku echombo chahukula* entaza, barhoza nanga ene engambo z’ebwerekeza barhondera kuchifija buche.
30 Aliko bamatelo babere bali balonza gurhe bakatoroka barhenge omu chombo bayandagazize na chila chombo chigeke omu nyanja, barhondera kuchijirisa nka bakala kurhoza enanga engambo z’emulemu,
31 Paulo abwira omukulu w’abasoda n’abasoda ntya: “Akaba abala bantu barhayorhere omu chombo, murhafuma ahala.”
32 Nantyo abasoda bacha orhwamba rhwalifarhire echola chombo chigeke, bachileka chirhogere omu nyanja.
33 Bwabere buli hofi kucha, Paulo aheba abantu boshi omurhima balye, ababwira: “Zene luli lusiku lwe 14 eyi muli mwalingiriza munayubahire buzira kujira echi mwalya.
34 Bobola mbahebere omurhima mulye; bili by’akamaro oku magala menyu, bulala ntaye n’omuguma mu mwabo waheza chiro luviri luguma l’oku rhwe lyage.”
35 Amalire kuderha ntyo, arhola omugati abwira Mungu koko embere zabo boshi, aguchagulanga, naho arhondera kulya.
36 Boshi barhulera, nabo barhondera kulya.
37 Mw’echola chombo rhweshi rhwaliri bantu 276.
38 Babere bamalya n’okuyugurha, barhondera kuroha engano omu nyanja y’echombo chiyanguha.
39 Bwachere, barharhegeraga echola chihugo, aliko balangira omweya guli k’omuchanga balonza okuntu bakaheka h’echombo akaba byakagalikana.
40 Bacha orhwamba rhwalishwekere enanga zarhogera omu nyanja, ahola han’aho bashunula n’orhwamba rhwalifarhire engasi z’okuyerekeza; baja bazamula echitambara ch’embere omu kuntu omuyaga guheke echombo, bayerekeza eshi.
41 Bahukwire echilundo chizibuzibu ch’omuchanga chaliri chashurhwa n’enyanja enyunda zombi, bayumanza echombo, omulemu gwahukula ogola muchanga gwananira omola, ebivundu byarhondera kuvunangula etensi.
42 Abasoda bava babona oku bayirhe abashwekwa boshi omu kuntu nta muntu n’omuguma oyogage akatoroka.
43 Aliko bulala omukulu w’abasoda alilonzeze ahise Paulo omu bulanzi, abuza abasoda kukola ebyola balilonzeze bakole. Arhegeka boshi bakagala kuyoga bachikabule oku nyanja babe babarhanga eshi,
44 n’abandi bakajire babakulikira eyi bafarhire oku mpaho changwa oku bisharhe by’echombo. Nantyo abantu boshi bahika eshi eyi bali bagumaguma.
