Ebijiro by’Entumwa 26:1-32
26 Agripa abwira Paulo ntya: “Okala ogwerhe oruhusa l’okuchifasiriya.” Paulo alambula efune aderha:
2 “Mwami Agripa, ingwerhe busime bunene okubona embere zawe y’inyumangire zene y’inchifasiriya eju ya byoshi Abayahudi bansidakire,
3 ahanene bulala oyinji bwinja-bwinja emigenzo yoshi y’Abayahudi n’obuhaka bwabo. Bobola inkuhemere ondembere amango waba oli wanyunviriza.
4 Kweri, okuntu nalilamire ahagarhi k’abantu b’eshanja lyani n’omu Yerusalemu kurhenga nchili musole, kumenyikene bwinja oku Bayahudi boshi
5 banyinji kurhenga mira, n’akaba balonzeze bakahamiriza oku nalilamire nka Mufarisayo, n’Abafarisayo babanachihangana bwenene kulusha abandi Bayahudi oku bilolere okukulikira amarhegeko.
6 Lero zene, indi nachirwa olubanja bulala nahebere obulangalire bwani omu chilagane Mungu ahaaga bashokuliza berhu,
7 echola chilagane chen’echola ch’amoko merhu 12 mali malindira gurhe chayenera omu kumukolera akasi kachesibwa n’obushiru ezuba n’ebudufu. Waliha Mwami, Abayahudi bansidakire eju y’obola bulangalire.
8 “Bulagurhe muli mwabona oku birhakashobokana Mungu afule abafire?
9 Nyono naliyemerere oku nkwanene kujira koshi nakagala yi mpinga ezino lya Yesu we Nazareti.
10 Intyo kon’okola ku nalijirire omu Yerusalemu, nalikabwire bachesibwa banene omu prizo, bulala abakulu b’abadahwa balimpere obola buhashe; n’amango balikwanene kuyirhwa, nani naliri nayemera oku bayirhwe.
11 Naliri nazigana kugera omu masinagogi moshi eyi ndi nabaha obuhane omu kuntu mbaseze balahire obwemere bwabo; na bulala nabaga nabayunvirhiire burhe bunene, nagendaga naja chiro n’omu mandi mavile kubalibuza.
12 “Lusiku luguma naliri omu njira eyi ndi naja e Damasko kujira ebyola bye n’ebyola, eyi ngwerhe obuhashe n’obwerekezi burhengere oku bakulu b’abadahwa.
13 Mwami wee, aha midi y’ezuba eyi ndi omu barabara, nabona omwangaza gunene gurhengere embingu gulushire ogw’ezuba, gwanzunguluka n’abanaliri nabalama nabo.
14 Rhwabere rhwagwa ahashi nayunva omulenge gwambwira ntya omu lulimi lwe Chiebraniya: ‘Sauli, Sauli, bulagurhe oli wantesa? Okugenderera kushurha amagulu mawe oku nkoni eshongwerwe kwakulibuza.’
15 Namubaza: ‘Woyo nde si Waliha?’ Waliha naye ashubiza: ‘Nyono Yesu oli walibuza.
16 Aliko yinamuka onayimange. Tala echirhumire nakurhengerera: Inshondere obe mukozi wani na muhamirizi w’ebintu wabwene n’ebi nakuyereka oku bindolere.
17 Nakuyokola kurhenga mw’abala bantu n’omu mashanja emunda nakurhuma
18 y’obahumula amesho, omu kuntu barhenge omu mwizimya n’okuja omu mwangaza, barhenge omu buhashe bwa Shetani baje emwa Mungu, yi bababalirwa ebyaha byabo n’okushokola mu balala bachesezwe kugerera obwemere bwabo mu nyono.’
19 “Bobola Mwami Agripa, ntafundaga kukenga ebyola bibonekezi byarhengaga embingu,
20 si narhonderera oku bantu baliri e Damasko, naho oku baliri e Yerusalemu, omu chihugo choshi che Yudeya n’oku bantu b’amashanja; naliri nabahekera oburhumwa oku bakwanene kuhungama banagalukire Mungu omu kujira ebijiro biyerekene oku bahungamire.
21 Ebyola bye byarhumaga Abayahudi banfarhira omu hekalu n’okulonza kunyirha.
22 Aliko bulala napatire oburhabale burhengere emwa Mungu, kuhika zene indi nagenderera kuhaana obuhamirizi oku badorho n’oku bakulu, buzira kuderha echintu choshi-choshi olekere ebi Abalebi na Musa baderhaga oku nji byaba;
23 oku Kristu alikwanene kulibuka, na bulala akabere w’oburhanzi kufuka, alikwanene kutangaziza abala Bayahudi n’abantu b’amashanja omwangaza.”
24 Oku Paulo anali aderha ebyola binwa omu kuchifasiriya, Festo ava aderha ntya n’omulenge gunene: “Paulo wasirehere si! Amasomo manene wasomere makujirire musire!”
25 Aliko Paulo amushubiza: “Mukengwa Festo, ntasirehere, s’indi naderha ebinwa by’okuli, binali by’akamaro.
26 Bulala kweri, oyula mwami indi naganira naye n’obuhuru ayinji bwinja eyila myazi; inanchizerere oku nta mwazi n’omuguma arhenji muyo, bulala ntacho n’echiguma chakolerwe omu bwibisho.
27 Mwami Agripa, oba oyemerere Abalebi si? Imenyere k’oba obayemerere.”
28 Aliko Agripa abwira Paulo: “Mu kasanzi kageke rhwamaganira, wali wamampindamula Mukristu.”
29 Eju y’echola Paulo amushubiza: “Bibe bisanzi bigeke changwa binene, mpemere Mungu arhabaga woyo wenyine si na boshi bali banyunviriza zene babe kuguma nani, aliko bowe barhabaga eyi bashwekerwe mw’amala mapingu.”
30 Mwami, guvernere, Bernike na boshi baliyikere haguma nabo bayimanga.
31 Aliko oku banali bagenda, barhondera kubwirana ntya: “Oyula muntu ntacho ajirire chakarhuma ayirhwa changwa mpu ahirwe omu prizo.”
32 Agripa ava abwira Festo ntya: “Oyula muntu akashwekwirwe nk’arhabaga ahemere olushinja lwage luhekwe emwa Kayizari.”
