Ebijiro by’Entumwa 25:1-27
25 Enyuma wa siku esharhu Festo ahikire omu provense n’okurhola obukulu, arhenga e Kayizariya azamukira e Yerusalemu.
2 Naho abakulu b’abadahwa n’abalume baherhe echeo omu Bayahudi, bamubalira oku bilolere Paulo. Barhondera kurhebereza Festo
3 ayemere arhuma Paulo e Yerusalemu. Aliko babaga bajire enama oku barhera Paulo banamuyirhira omu njira.
4 Chiro akaba ntyo, Festo ashubiza oku Paulo akwanene kubera alangirwe e Kayizariya, n’oku yewe yenyine ashuba kugaluka eyola munda enyuma wa siku zigeke.
5 Ava aderha ntya: “Akaba kweri oyula mulume akolere echintu chibi, muleke abagwerhe obukulu mu mwabo bayinje rhuyandagale nabo baje kumusidaka.”
6 Abere amala haguma nabo esiku zakahika ku munane changwa ekumi, agaluka e Kayizariya. Olusiku lwakulikiragaho, ayikala oku chichumbi ch’okuchira kw’emanja, arhegeka balerhe Paulo.
7 Paulo ahikire, Abayahudi bayandagalaga kurhenga e Yerusalemu bayimanga kumuzunguluka barhondera kumusidaka ebintu bikomere ebi bonyine barhagalaga kuyemeza.
8 Aliko Paulo aderha ntya omu kuchifasiriya: “Nta rhegeko ly’Abayahudi navunire, inta chintu chibi nakolere e hekalu changwa Kayizari.”
9 Bulala Festo alilonzeze Abayahudi bamusime, ashubiza Paulo ntya: “Olonzeze ozamukire e Yerusalemu omu kuntu oje kuchirwa olubanja eyola munda embere zani eju y’ebila bintu bakusidakire?”
10 Aliko Paulo amushubiza: “Inyimangire embere w’echichumbi ch’okuchira kw’emanja cha Kayizari aha nkwanene kuchibirwa olubanja. Inta chintu chibi najirire Abayahudi, nk’oku wenyine okala omenyere bwinja.
11 Akaba kweri indi nyakola-maligo n’akaba nakolere echintu chakarhuma banyirha, ntalahire kufa. Aliko akaba eby’abala bantu bansidakireko birhaherhe nda na mugongo, intaye ogwerhe ehaki y’okumpeba omu fune z’abola bantu omu kubasimisa konyine. Namaheka olushinja lwani emwa Kayizari!”
12 Festo amalire kuganira n’abahanuzi bage, aderha: “Wamahema olushinja lwawe luje emwa Kayizari; waja emwa Kayizari.”
13 Enyuma wa siku zilebe, mwami Agripa na Bernike bahika e Kayizariya, bayinjaga kulegereza Festo.
14 Bulala balimalire siku zinene eyola munda, Festo abalira mwami oku bilolere olushinja lwa Paulo. Amubwira:
“Hali mulume muguma Feliksi alekaga omu prizo enola munda,
15 n’amango naliri e Yerusalemu, abakulu b’abadahwa n’abashamuka b’Abayahudi balinderhere olushinja lwage, eyi bali bahema oku ahaabwe obuhane.
16 Aliko nabashubiza oku Abaroma barhahaana omuntu oku bantu bamusidakire eju y’okubasimisa konyine. Bihemere osidakirwe n’abamusidakaga barhange babuganane omu kuntu osidakirwe apate orozo l’okuchifasiriya.
17 Bobola amango bahika hanola, ntashibaga naheza ebisanzi, aliko olusiku lwakulikiragaho nayikala oku chichumbi ch’okucha emanja narhegeka balerhe oyola mulume.
18 Abamusidakaga barhondera kuderha, aliko nta chintu chibi n’echiguma bamusidakire nk’oku naliwazize.
19 Si baliri bajira obuhaka naye oku bilolere edini lyabo n’oku bilolere mulume muguma oyirikwa Yesu wafaga, aliko Paulo aliri aderha oku azene.
20 Oku bwani, intamenyaga gurhe nakamala obola buhaka, nabaza Paulo akaba akasima aje e Yerusalemu omu kuntu bachire olushinja lwage eyola munda.
21 Aliko amango Paulo ahema oku ayorha omu prizo kw’analindira esimikiro ya Shebuja,* narhegeka oku bagenderere kumulanga kuhika amango namurhuma emwa Kayizari.”
22 Agripa abwira Festo ntya: “Nakasimire nani inyunvirize oyola muntu.” Festo amushubiza: “Wamuyunviriza omusezi.”
23 Olusiku lwakulikiragaho, Agripa na Bernike bayinja n’olukengo lunene baja omu chumba ch’okusambiramo eyi bali n’abakulu b’abasoda n’abalume b’omu vile baherhe ebyeo; naho Festo arhegeka balerhe Paulo.
24 Festo aderha: “Mwami Agripa nenyu mweshi muli haguma nerhu hanola, oyula mulume mubwene, y’Abayahudi boshi baliri bambwira amango naliri e Yerusalemu na hanola, eyi bali baderha n’omulenge gunene oku arhachikwanene kulama.
25 Aliko nabona oku nta chintu chibi ajirire chikwanene olufu. Bobola amango yenyine ahema oku aja emwa Kayizari, nabona oku murhumeyo.
26 Aliko nta chintu ch’okuli ingwerhe nakayandikira Waliha oku bimulolere. Bobola namulerhere embere zenyu mweshi, ahanene embere zawe Mwami Agripa, omu kuntu nkabaga hanola amala kusamba, napata echi nakayandika.
27 Bulala nyono imbwene oku birhayunvikene okurhuma omushwekwa buzira kuyerekana bichi bamusidakire.”
Mahugulo m'efo
^ Elila lili zino ly’echeo ly’abami be Roma.
