Ebijiro by’Entumwa 17:1-34
17 Bagerera e Amfipoli ne Apoloniya baja e Tesalonike emunda e sinagogi y’Abayahudi yaliri.
2 Paulo aja omu sinagogi nk’oku anarhulaga ajira, na mu sabato esharhu aliri alonza abarhabale bayunve Amandiko.
3 Aliri abafasiriya n’okubayemeza omu kukolesa ebiyandikirwe oku Kristu alikwanene alibuke n’okufuka, analiri ababwira ntya: “Oyula Yesu indi nabatangaziza ye Kristu.”
4 Eju y’echola baguma mubo baba bemezi banachihira oku lunda lwa Paulo na Sila, na Bagiriki banene baliri baharamya Mungu n’abakazi banene balikengerwe bwenene baba bemezi.
5 Aliko abandi Bayahudi bayongwa, bachiheba haguma n’abalume b’ebishumusi baliri bazerera omu soko; bajira echigusho, barhondera kulerha akavulindi omu vile. Barhera enju ya Yasoni eyi bali balonza Paulo na Sila omu kuntu babalerhe emunda abantu kamama bali.
6 Bababulire, babulula Yasoni na bene-berhu baguma babaheka emw’abarhambo b’evile, bayama ntya: “Balala balume balerhere akavulindi omu gulu lyoshi bahikire n’enola munda,
7 na Yasoni abakaribisize emwage. Boshi barhali bakenga amarhegeko ma Kayizari omu kuderha oku hali owindi mwami oyirikirwe Yesu.”
8 Bayunvirhe ntyo, abantu kamama n’abarhambo b’evile boshi bayubaha.
9 Yasoni na balala bandi bamalire kuhaana efuranga zitosheze, babaleka bagende.
10 Bwabere budufu, ahola han’aho bene-berhu barhuma Paulo na Sila e Beroya. Bahikireyo, baja omu sinagogi ly’Abayahudi.
11 Abayahudi be Beroya baliherhe oborhere bwinja kulusha abe Tesalonike bulala baliyemerere echinwa cha Mungu n’omurhima goshi, banaliri basuzuma bwinja-bwinja Amandiko buli lusiku yi balola akaba ebi bababwirire bunali bukweri.
12 Echola charhuma bantu banene mubo baba bemezi. Balume bageke na bakazi banene bakengerwe b’Abagiriki nabo baba bemezi.
13 Aliko Abayahudi be Tesalonike bayunvirhe oku Paulo ali atangaza echinwa cha Mungu n’omu Beroya, bajayo omu kuntu bashumike abantu n’okubalerha mw’akalaba.
14 Ahola han’aho bene-berhu bava baherekeza Paulo kugera oku mashinji, aliko Sila na Timoteyo bayorha eyola munda.
15 Bobola, abaherekezaga Paulo bamugeza e Atene. Bagaluka eyi baherhe obwerekezi oku Sila na Timoteyo babugane Paulo juba-juba nk’oku byakanagalikana.
16 Oku Paulo anali abalingira e Atene, achiyunva kubi bwenene okubona eyola vile eyunjwire mw’esanamu.
17 Arhondera kuyigiriza Abayahudi omu sinagogi haguma n’abandi bantu baliri baharamya Mungu; analiri ajira ntyo buli lusiku haguma n’abaliri abugana omu soko.
18 Aliko basomi baguma be filozofiya b’Abaepikureya n’Ababastowa barhondera kumujisa buhaka, baguma baliri baderha ntya: “Bichi oyula nyakajege ali alonza kuderha?” Abandi banaderha: “Bibonekene oku ali arhutangaziza abandi-bandi bamungu.” Baliri baderha ntyo bulala aliri ahubiri emyazi minja ya Yesu n’obufuke.
19 Bava bamufarha bamuheka ewa Areopago, bamubaza: “Wakagala kurhubwira ezila nyigirizo zihyahya oli wahubiri zili nyigirizo nyabachi?
20 Bulala walerhere ebintu bihyahya omu marhwiri merhu, rhunalonzeze rhumenye bichi biderhere.”
21 Kweri, abanya Atene boshi n’abageni baliri eyola munda nta chintu baliri bakola omu kasanzi kabo k’okuchisimisa olekere okuderha changwa okuyunviriza chintu chilebe chihyahya.
22 Paulo ava ayimanga ahagarhi ke Areopago aderha:
“Balume be Atene, imbwene k’omu bintu byoshi mubonekene oku munayubaha bamungu bwenene kulusha abandi bantu.
23 Omufano, amango naliri nagera omu vile n’okulolereza bwinja-bwinja ebintu munakolesa omu kuharamya, nalibwene chiro n’amazabahu mayandikirweko ‘Emwa Mungu orhamenyikene.’ Bobola echi munaharamya buzira kuchimenya ch’indi nabatangaziza.
24 Mungu walemaga egulu na byoshi bibamo, nk’oku anaba Waliha w’embingu n’egulu, arhalama omu mahekalu mayumbakirwe n’efune z’abantu;
25 changwa mpu efune z’abantu zimukolere owamenya nka hali echintu choshi-choshi akenere, bulala yenaha abantu boshi akalamo, omuka na buli chintu.
26 Na kugerera muntu muguma alemere amashanja moshi m’abantu yi malama oku gulu lyoshi. Kandi ahebere h’ebihe, achirire n’abantu embibi ahabakwanene kulama,
27 yi balonza Mungu, chiro n’omu kumamarha eyi bali bamulonza banamupate bwinja-bwinja, bulala kweri arhali hale na buli muguma werhu.
28 Bulala kugerera yewe rhuli rhwayisa, rhuli rhwalambagira rhunaliho, nka kulala baguma omu bandisi benyu banaderhaga mpu ‘Bulala nerhu rhuli bana bage.’
29 “Che chirhumire, bulala rhuli bana ba Mungu, rhurhakwanene kuwaza oku Mungu ali nka chintu chikolerwe ne oro, ne arja n’ebale, changwa nka chintu abantu bachulaga n’okuchitungira.
30 Kweri, Mungu alilekerere ebyola ebihe by’obuhwinja, aliko ali atangaziza abantu boshi buli hoshi oku bakwanene kuhungama.
31 Bulala ahebere h’olusiku l’okuchira abantu boshi b’oku gulu olubanja omu haki kugerera muntu muguma achishogere, anahere abantu boshi echemezo omu kufula oyola muntu.”
32 Bayunvirhe aderha oku bilolere obufuke, baguma barhondera kumushekera, abandi baderha: “Oku bilolere eyola myazi nji rhwashuba kukuyunviriza amandi mango.”
33 Paulo ava abaleka,
34 aliko baguma mubo baja oku lunda lwage banaba bemezi. Haliri Diyonisiyo waliri muzuzi oku tribinale ye Areopago, mukazi muguma oyirikwa Damari n’abandi baliri haguma nabo.
