Ebijiro by’Entumwa 3:1-26
3 Petro na Yowane baliri bazamukira oku hekalu oku sa y’okuja kusalira, zaliri hofi sa mwenda z’egolo.
2 Hayinja abantu bahekere omulume waburhwaga ey’ali chilema. Buli lusiku bagendaga bamulerha hofi n’omulyango gw’ehekalu gunayirikwa Mulyango Gukwirire, omu kuntu ayinje ahema oburhabale oku bantu baja omu hekalu.
3 Abere alangira Petro na Yowane bakala kuja omu hekalu, arhondera kubahema bamurhabale.
4 Aliko Petro na Yowane bamulolereza, naho Petro amubwira: “Orhulole.”
5 Ava abalola, ey’anihire oku hali echi bamuha.
6 Petro amubwira: “Intagwerhe e arja changwa e oro, aliko echingwerhe chinaguha. Omu zino lya Yesu Kristu we Nazareti, lambagira!”
7 Amufarha okuboko kw’ekulyo, amuyimanza. Ahola han’aho, ebishando byage n’orhuzirabulongo rhwage byakomera.
8 Ashabira, arhondera kulambagira, aja nabo omu hekalu ey’ali alambagira n’okushimbuka-shimbuka n’okukuuza Mungu.
9 Abantu boshi bamubona ali alambagira n’okukuuza Mungu.
10 Bayinja barhegera oku oyola muntu y’olala wagendaga ayikala oku Mulyango Gukwirire Guzibuzibu gw’ehekalu y’ahema bamurhabale, basomerwa n’okusima bwenene eju y’ebyamuhikire.
11 Ok’oyola muntu achifarhire Petro na Yowane, abantu boshi bagenda balibirhira aha baliri hanayirikwa Veranda ya Sulemani, eyi basomerwe bwenene.
12 Petro abwene ntyo, aderha ntya: “Bantu be Izraeli we, bulagurhe mwasomerwe ntya? Bulagurhe muli mwarhuseza kw’amasu wamenya nk’oku misi yerhu changwa bulala rhuyubahire Mungu bwenene che charhumire rhwamujira alambagire?
13 Mungu wa Abrahamu na Isaka na Yakobo, Mungu wa bashokuliza berhu akuuzize omukozi wage, Yesu, eyi mwahaanaga mwanamulahira embere za Pilato chiro akaba okw’abaga abwene okw’amulikule.
14 Kweri mwalilahire omuchesibwa n’omunyakunali, mwahema babahe omunizi,
15 mwava mwayirha Omurongozi Mukulu w’akalamo. Chiro akaba ntyo Mungu amufulire rhunali bahamirizi b’obola bufuke.
16 Kugerera ezino lyage na kugerera obwemere rhugwerhe omu zino lyage, oyula mulume muli mwabona munamumenyere ahabirwe emisi. Obwemere rhugwerhe kugerera Yesu bo bwafumize loshi oyula mulume embere zenyu mweshi.
17 Aliko, bene-berhu, imenyere oku mwajiraga ntyo omu kurhamenya nka kulala abarhegesi benyu nabo bajiraga.
18 Aliko omu kujira ntyo, Mungu ayeneza ebintu abaga atangazize embere w’akasanzi kugerera obunu bw’abalebi boshi oku Kristu wage alikwanene kulibuka.
19 “Che chirhumire, muhungame munahindamuke y’ebyaha byenyu bishandwa, omu kuntu Yehova abahe ebihe by’okuhumuka
20 anabarhumire Kristu owachishogerwe embere zenyu, yekala Yesu.
21 Akwanene kuyorha omu mbingu kugera amango m’okushuba kukwiza ebintu byoshi nk’oku Mungu aderhaga kugerera abalebi bage bachesibwa ba mira.
22 Omu bukweri, Musa aliderhere ntya: ‘Yehova Mungu wenyu nj’abaha omulebi oli kuguma nani orhengerere mu bene-benyu. Mukwanene kuyunviriza buli choshi nj’ababwira.
23 Na buli yeshi nj’orhayunviriza oyola mulebi, nj’achibwa omu bantu n’okuharabiswa loshi.’
24 N’abalebi boshi kurhangirira ku Samweli na boshi bamukulikiraga, abanene mubo baderhere banatangazize bwinja-bwinja oku bilolere zinola siku.
25 Muli bagala b’abalebi munali bagala b’endagano Mungu ajiraga haguma na bashokuliza benyu, amango abwira Abrahamu ntya: ‘Kugerera oluburho lwawe, emilala yoshi y’oku gulu nji yagishwa.’
26 Mungu amalire kuyumanza omukozi wage, arhanga kubarhumiraye abagishe, omu kuhindamula buli muguma wenyu arhenge omu bijiro byenyu bibi.”
