Ebijiro by’Entumwa 6:1-15
6 Mw’ezola siku, ey’oluganjo lw’entumwa lwachiyongerere, Abayahudi baliri baganira olulimi lwe Chigiriki barhondera kulundumira Abayahudi banaderha olulimi lwe Chiebraniya, bulala abashumbakazi babo barhaliri bahaabwa echabo chigabi amango m’okugaba ebilyo bya buli lusiku.
2 Balala 12 bagusha abanafunzi banene haguma bababwira: “Kurhali kwinja rhuleke kuyigiriza echinwa cha Mungu yi rhuyinja rhwagabira abantu ebilyo.
3 Bobola bene-berhu, muchishoge balume mushanvu mu mwabo bamenyikene oku bagwerhe erenge linja, bayunjwire eroho lichesibwa n’obwengehe, omu kuntu rhubashingize akala kasi k’akamaro.
4 Aliko rhwabo rhwachihangana rhugenderere kusalira emwa Mungu n’okuyigiriza echinwa chage.”
5 Ebibaderhaga byasimisa abantu boshi, bava bachishoga Stefano waligwerhe obwemere bukomere waliyunjwire n’eroho lichesibwa na Filipo, Prokoro, Nikanori, Timoni, Parmena, na Nikola we Antiyokiya wayemeraga edini ly’Abayahudi.
6 Babalerha emunda entumwa zili, zamalire kusalira zabaheba kw’efune.
7 Eju y’echola echinwa cha Mungu chagenderera kuhika ku bantu banene n’oluganjo lw’abanafunzi lwagenderera kuluga omu Yerusalemu; n’abadahwa banene barhondera kugwarha obwemere.
8 Naho Stefano waliyunjulirene olukogo lwa Mungu n’emisi, aliri akola ebimenyeso n’ebisomerene binene omu bantu.
9 Aliko bantu baguma b’omu Sinagogi enayirikwa Sinagogi y’Abantu Babere Huru, na baguma be Kirene na bantu balebe be Alegzandriya n’abandi be Kilikiya ne Aziya, bayinja yi bajira obuhaka na Stefano.
10 Aliko barhakamuyazize eju y’obwengehe bwage, n’eroho lichesibwa lye lyaliri lyamuyerekeza amango aliri aderha.
11 Omu bwibisho, bava bashumika abantu baderhe ntya: “Rhwamuyunvirhe aderha ebinwa by’okudukanga* Musa na Mungu.”
12 Bashumika abantu, abashamuka n’abandisi bamurhogerako bamushweka oku chingufu bamuheka ewa Sanendrini.
13 Balerha n’abahamirizi b’obubeshi, baderha: “Oyula muntu arhali aleka kuderha ebintu bibi oku bilolere hanola hantu hachesibwa n’oku bilolere Amarhegeko.
14 Omufano, rhwalimuyunvirhe y’aderha oku oyula Yesu we Nazareti ashanda linola hekalu n’okuhindamula emicho Musa arhulekeraga.”
15 Oku abantu boshi banayikere omu Sanendrini bali bamulolereza, bava babona amasu mage makala mali nka ma malayika.
Mahugulo m'efo
^ Ao “okujachira.”
